ប្រធានាធិបតីអាមេរិកលោក Joe Biden បានរិះគន់សមាជិកសភាគណបក្សសាធារណរដ្ឋកាលពីថ្ងៃចន្ទសប្តាហ៍នេះ ចំពោះការរារាំងមិនឱ្យគណបក្សប្រជាធិបតេយ្យបង្កើនសិទ្ធិខ្ចីប្រាក់ដើម្បីបញ្ចៀសវិបត្តិជាសក្តានុពលនៅថ្ងៃទី១៨ ខែតុលា នៅពេលរដ្ឋាភិបាលរំពឹងថា នឹងអស់ប្រាក់សម្រាប់ចំណាយ។
លោក Biden បាននិយាយថា លោកមិនអាចធានាថា សហរដ្ឋអាមេរិក នឹងមិនជាប់គាំងជាលើកដំបូងទេ។ លោកអះអាងថា វាអាស្រ័យលើលោក Mitch McConnell មេដឹកនាំគណបក្សសាធារណរដ្ឋនៅព្រឹទ្ធសភាអនុញ្ញាតឱ្យគណបក្សប្រជាធិបតេយ្យនៅព្រឹទ្ធសភា បង្កើនកម្រិតបំណុលលើសកំហិតបច្ចុប្បន្នចំនួន ២៨,៤ លាន លានដុល្លារ ដោយគ្មានការគំរាមកំហែងពីគណបក្សសាធារណរដ្ឋរារាំងសកម្មភាពបន្ទាន់នេះ។
លោក Biden បានប្រាប់គណបក្សសាធារណរដ្ឋនៅក្នុងសន្និសីទសារព័ត៌មាននៅសេតវិមានថា « គ្រាន់តែកុំរាំងផ្លូវ»។ លោកបានមានប្រសាសន៍ទៀតថា «បើអ្នកមិនចង់ជួយសង្រ្គោះប្រទេសទេ សូមកុំរាំងផ្លូវ កុំបំផ្លាញវា»។
លោក Biden បាននិយាយថា ប្រសិនបើរដ្ឋាភិបាលលង់ក្នុងបំណុល គណបក្សសាធារណរដ្ឋ នឹងទទួលខុសត្រូវ។ អ្នកសេដ្ឋកិច្ចព្យាករថា ការលង់ក្នុងបំណុល អាចនាំឱ្យមានផលវិបាកធ្ងន់ធ្ងរចំពោះសន្ទស្សន៍ភាគហ៊ុនអាមេរិក និងសេដ្ឋកិច្ចពិភពលោក ហើយអាចបង្ខំឲ្យរដ្ឋាភិបាលពន្យារពេលប្រាក់សោធននិវត្តន៍សម្រាប់ជនជាតិអាមេរិកវ័យចំណាស់ ឬមិនអាចទូទាត់លុយឱ្យអ្នកធ្វើកិច្ចសន្យាការងាររដ្ឋាភិបាលទាន់ពេលវេលា។
លោក Biden និយាយថា «ខ្ញុំមិនអាចជឿថា លទ្ធផលចុងក្រោយ គឺយើងលង់ក្នុងបំណុលទេ ព្រោះផលវិបាក នឹងធ្ងន់ធ្ងរខ្លាំងណាស់ ... ប៉ុន្តែ តើខ្ញុំអាចធានាបានទេ? បើខ្ញុំអាច ខ្ញុំនឹងធ្វើ។ ប៉ុន្តែ ខ្ញុំមិនអាចធានាបានទេ»។
លោក Biden បាននិយាយថា បរាជ័យនេះ ស្រដៀងទៅនឹង«អាចម៍ផ្កាយកំពុងធ្លាក់បុកសេដ្ឋកិច្ចរបស់យើង»។ លោកព្រមានអំពីអត្រាការប្រាក់ខ្ពស់ និងការធ្លាក់ចុះតម្លៃភាគហ៊ុនដែលប៉ះពាល់ដល់ការវិនិយោគរបស់ជនជាតិអាមេរិករាប់លាននាក់។
លោក McConnell បានផ្ញើលិខិតមួយកាលពីថ្ងៃចន្ទទៅកាន់សេតវិមាន ដោយបញ្ជាក់ឡើងវិញថា គណបក្សសាធារណរដ្ឋ នឹងមិនជួយគណបក្សប្រជាធិបតេយ្យបោះឆ្នោតដោះស្រាយការជាប់គាំងបំណុលអតិបរមាទេ។
មេដឹកនាំភាគច្រើននៃព្រឹទ្ធសភាលោក Chuck Schumer និយាយថា នៅក្នុងព្រឹទ្ធសភាដែលគណបក្សទាំងពីរមានសំឡេង៥០ស្មើគ្នា គណបក្សប្រជាធិបតេយ្យបូកនឹងសំឡេងអនុប្រធានាធិបតីអ្នកស្រី Kamala Harris នឹងដំឡើងកំហិតបំណុលអតិបរមាដោយសម្លេងភាគច្រើន ៥០%+១ ដោយគ្មានការគាំទ្រពីគណបក្សសាធារណរដ្ឋ៕
