អាជ្ញាធររាជធានីភ្នំពេញបានអំពាវនាវឱ្យពលរដ្ឋមានការស្ងៀមស្ងាត់ និងកុំភ្ញាក់ផ្អើលចំពោះការចល័តអាវុធ និងរថពាសដែករបស់កងទ័ពជើងគោក ដែលគ្រោងនឹងធ្វើឡើងថ្ងៃព្រហស្បតិ៍ សប្តាហ៍ខាងមុខនេះ។ នេះបើតាមសេចក្តីជូនដំណឹងដែល VOA បានទទួល។
ក្នុងសេចក្តីជូនដំណឹងចុះថ្ងៃទី១៧ខែមករា សាលារាជធានីភ្នំពេញបានអះអាងថាការចល័តអាវុធ និងរថពាសដែកនេះធ្វើឡើងក្នុងគោលបំណងដើម្បីរៀបចំប្រារព្ធខួបគម្រប់ ២០ឆ្នាំ នៃការបង្កើតបញ្ជាការដ្ឋានកងទ័ពជើងគោក។ បញ្ជាការដ្ឋានអង្គរក្សនឹងចល័តអាវុធ និងរថពាសដែកពីក្រុងតាខ្មៅ ខេត្តកណ្តាល ទៅទីតាំងប្រារព្ធពិធីនៅឯបញ្ជាការដ្ឋានកងទ័ពជើងគោក ស្ថិតក្នុងសង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។
ការប្រារព្ធខួបគម្រប់ ២០ឆ្នាំនៃការបង្កើតបញ្ជាការដ្ឋានកងទ័ពជើងគោកនេះធ្វើឡើង បន្ទាប់ពីរដ្ឋាភិបាលរបស់លោកនាយករដ្ឋមន្រ្តីហ៊ុន សែន ទើបនឹងសម្ពោធវិមានឈ្នះ-ឈ្នះ កាលពីចុងខែធ្នូកន្លងទៅនេះ ដើម្បីបង្ហាញពី «នយោបាយឈ្នះ-ឈ្នះ» របស់លោក ហ៊ុន សែន ដែលបានបញ្ចប់សង្រ្គាមក្នុងស្រុកទាំងស្រុងនៅកម្ពុជាកាលពីចុងឆ្នាំ ១៩៩៨ និងការប្រារព្ធ «ខួបទី ៤០ ៧មករា» ក្នុងទ្រង់ទ្រាយធំមួយនៅពហុកីឡាដ្ឋានជាតិអូឡាំពិក ដើម្បីរំឭកពីការផ្តួលរំលំរបបខ្មែរក្រហមរបស់ប៉ុល ពត ក្រោមការជួយពីកងទ័ពវៀតណាម៕
