នាយកដ្ឋានប្រឆាំងបទល្មើសបច្ចេកវិទ្យា អំពាវនាវដល់អ្នកប្រើប្រាស់កម្មវិធីតេឡេក្រាម (Telegram) ទាំងអស់ ឱ្យប្រុងប្រយ័ត្ន និងកុំចុចលើតំណភ្ជាប់ណាដែលមិនច្បាស់លាស់ ជៀសវាងការបាត់បង់ព័ត៌មាន និងខាតបង់ថវិកាដោយការបោកបញ្ឆោតផ្សេងៗ។
នៅថ្ងៃអង្គារនេះ នាយកដ្ឋានប្រឆាំងបទល្មើសបច្ចេកវិទ្យា បានបង្ហោះសារលើទំព័រហ្វេសប៊ុករបស់ខ្លួនដោយបញ្ជាក់ថា នាយកដ្ឋានទទួលបានព័ត៌មានស្តីពីការបោកបញ្ឆោតថ្មីមួយ ដែលកើតឡើងលើអ្នកប្រើប្រាស់កម្មវិធីតេឡេក្រាម តាមរយៈជនអនាមិកផ្ញើតំណភ្ជាប់បោកបញ្ឆោតទៅកាន់សារទូរស័ព្ទ ឬ SMS ដើម្បីឱ្យអ្នកប្រើប្រាស់បំពេញព័ត៌មាន និងឈានដល់ការយកគណនីអ្នកប្រើប្រាស់មកគ្រប់គ្រង។
នាយកដ្ឋានប្រឆាំងបទល្មើសបច្ចេកវិទ្យាបន្ថែមតាមន័យដើមថា៖ «សូមអ្នកប្រើប្រាស់កម្មវិធី Telegram ទាំងអស់មេត្តាប្រុងប្រយ័ត្ន និងកុំចុចលើតំណភ្ជាប់ Telegram.org តំណភ្ជាប់ណាដែលមិនច្បាស់លាស់ និងបំពេញព័ត៌មានផ្ទាល់ខ្លួនឱ្យសោះ»។
អគ្គស្នងការរងនគរបាលជាតិ លោក ជា ពៅ ប្រាប់វីអូអេនៅថ្ងៃអង្គារនេះថា នៅពេលដែលអ្នកប្រើប្រាស់ចុចលើតំណភ្ជាប់ និងបំពេញព័ត៌មានផ្ទាល់ខ្លួន នោះនឹងអាចធ្វើឱ្យបាត់បង់គណនីតេឡេក្រាមរបស់ខ្លួន និងអាចប្រឈមនឹងការចាញ់បោក ឬបាត់បង់ថវិកាផ្សេងៗ។
លោកថ្លែងថា៖ «យើងអប់រំក្នុងគោលបំណងអ៊ីចឹង កុំឱ្យប្រជាជនយើងគាត់ទៅខុសឆ្គង ឬក៏ចាញ់បោកអ្នកដែលប្រើតេឡេក្រាមក្នុងបំណងអាក្រក់។ អ៊ីចឹងបើគាត់អត់ស្គាល់ អត់ដឹងថាជាតេឡេក្រាមហ្នឹងទេ យើងកុំចុច យើងកុំភ្ជាប់ ព្រោះអាហ្នឹងជារឿងគ្រោះថ្នាក់»។
លោកបន្ថែមថា ក្នុងពេលបច្ចុប្បន្ន ករណីចាញ់បោកតាមបណ្តាញសង្គមតេឡេក្រាមនេះមិនមានចំនួនច្រើនដូចពេលកន្លងទៅនោះទេ ដោយសារសមត្ថកិច្ចបានអប់រំ និងបង្រ្កាបការឆបោកតាមបណ្តាញសង្គមតេឡេក្រាមនេះជាច្រើនករណី ជាបន្តបន្ទាប់។
ជារឿយៗ គេតែងឃើញមានការផ្សព្វផ្សាយពីការលួចចូលប្រើប្រាស់គណនី និងការឆបោកផ្សេងៗ លើបណ្តាញសង្គមតេឡេក្រាម និងប្រព័ន្ធទំនាក់ទំនងសង្គមផ្សេងទៀត ដូចជាហ្វេសប៊ុកជាដើម។
លោក ង៉ែត ម៉ូសេ អ្នកប្រឹក្សាផ្នែកសន្តិសុខឌីជីថលលើកឡើងថា ការឆបោកក្នុងបណ្តាញសង្គមតេឡេក្រាមនៅកម្ពុជា កើតមានយ៉ាងច្រើនករណី និងជាច្រើនប្រភេទផ្សេងៗគ្នា ដោយសារជនល្មើសប្រើប្រាស់កម្មវិធីនេះក្នុងគោលដៅដើម្បីស្វែងរកលុយ។ លោកថា ករណីនៃការឆបោកនៅតាមបណ្តាញសង្គមតេឡេក្រាម ជាទូទៅបណ្តាលឱ្យមានការបន្លំអត្តសញ្ញាណ ការបែកធ្លាយព័ត៌មានផ្ទាល់ខ្លួន និងការបាត់បង់ថវិកាជាដើម។
លោកប្រាប់វីអូអេថា៖ «ពេលដែលជនឆបោកលួចបានគណនីរបស់យើងទៅ វាបន្លំជាយើង ទៅធ្វើបាបអ្នកដទៃ ជាពិសេសគឺទៅធ្វើបាបអ្នកដែលនៅក្នុង contact list [បញ្ជីឈ្មោះទំនាក់ទំនង] ជាប់ក្នុងតេឡេក្រាមហ្នឹងឯង។ អ៊ីចឹងគេស្មានតែយើង គេអាចធ្វើអ្វីតាមសេចក្តីណែនាំរបស់ជនឆបោកនោះឯង។ ទម្រាំតែពួកគាត់ដឹងថាគណនីរបស់យើងត្រូវបានគេលួច វាចង់ហួសពេលទៅហើយ។ អ្នកខ្លះបាត់បង់ថវិកា អ្នកខ្លះបាត់បង់គណនីរបស់ខ្លួនឯងហ្នឹងទៅទៀត»។
លោក ង៉ែត ម៉ូសេ បន្ថែមថា ប្រជាពលរដ្ឋត្រូវស្វែងយល់អំពីការប្រើប្រាស់បណ្តាញសង្គមតេឡេក្រាមឱ្យមានសុវត្ថិភាព និងត្រូវប្រមូលភស្តុតាងដើម្បីដាក់ពាក្យប្តឹង ក្នុងករណីដែលមានការឆបោកកើតឡើង។
លោកថ្លែងថា៖ «បើទោះបីជាយើងដឹងថាគេយក យើងឃើញគណនីរបស់យើងត្រូវគេយកក្តី ក៏យើងអត់អាចយកមកវិញបានដែរ ក្នុងពេលខ្ញុំកំពុងនិយាយនេះ។ អ្វីដែលគួរអ្នកប្រើប្រាស់ ជាពិសេសអ្នកដែលរងគ្រោះក្នុងការលួចគណនីនេះធ្វើបាន ខ្ញុំលើកទឹកចិត្តឱ្យ ទី១ដាក់ពាក្យបណ្តឹងទៅកាន់អាជ្ញាធរមានសមត្ថកិច្ចទៅ ទី២គឺប្រមូលនូវព័ត៌មាន ឬភស្តុតាងឱ្យបានច្រើនតាមតែអាចធ្វើទៅបាន screen shot [ថតអេក្រង់ទូរស័ព្ទ] ទាំងអស់ហ្នឹងឯង ហើយទុកជាភស្តុតាងខ្លួនឯង។ ពេលយើងមានបញ្ហាយើងអាចប្រាប់ថា គណនីហ្នឹងត្រូវបានគេលួចហើយ»។
កាលពីដើមឆ្នាំ២០២៣ នាយកដ្ឋានព័ត៌មានវិទ្យានៃក្រសួងមហាផ្ទៃ បានផ្សព្វផ្សាយអំពីបទល្មើសបច្ចេកវិទ្យាធំៗចំនួន៥។ ក្នុងនោះមានដូចជា ការដាក់ធ្នាក់លួចយកនូវព័ត៌មាន ការហៅទូរសព្ទបញ្ឆោតលួចព័ត៌មាន ការវាយប្រហារផ្អាកដំណើរការប្រព័ន្ធ ការលួចអត្តសញ្ញាណ និងមេរោគជម្រិតទារប្រាក់៕
