សេចក្តីថ្លែងការណ៍របស់យោធាមីយ៉ាន់ម៉ាបានបញ្ជាក់ថា លោកសាស្ត្រាចារ្យ Sean Turnell និងជនបរទេស៣នាក់ទៀតនឹងត្រូវដោះលែងដើម្បីបញ្ជាក់ពី«សុឆន្ទៈល្អរវាងប្រទេសទាំងនេះ»ហើយនឹងជាផ្នែកមួយនៃការលើកលែងទោសដ៏ធំមួយសម្រាប់ពួកអ្នកទោស។
អតីតឯកអគ្គរាជទូតចក្រភពអង់គ្លេសលោកស្រី Vicky Bowman និងស្វាមីរបស់លោកស្រីគឺលោក Ko Htein Lin និងអ្នកថតខ្សែភាពយន្តជនជាតិជប៉ុនលោក Toru Kubotaក៏ត្រូវបានគេរំពឹងថានឹងត្រូវបានដោះលែងផងដែរ។
សេចក្តីរាយការណ៍នានានៅក្នុងប្រទេសមីយ៉ាន់ម៉ាបានឱ្យដឹងថា ការលើកលែងទោសនេះត្រូវបានធ្វើឡើងដើម្បីប្រារព្ធបុណ្យជាតិមីយ៉ាន់ម៉ា។
លោក Turnell ត្រូវបានកាត់ទោសឱ្យជាប់ពន្ធនាគាររយៈពេល ៣ ឆ្នាំកាលពីខែកញ្ញាចំពោះ«ការរំលោភច្បាប់ការសម្ងាត់រដ្ឋផ្លូវការរបស់មីយ៉ាន់ម៉ា»។ ជនជាតិអូស្ត្រាលីរូបនេះដែលជាទីប្រឹក្សាសេដ្ឋកិច្ចរបស់លោកស្រី Aung San Suu Kyi មេដឹកនាំដែលត្រូវបានគេបណ្តេញចេញពីតំណែង តែងតែបដិសេធចំពោះការចោទប្រកាន់ទាំងនេះ។
លោកស្រី Elaine Pearson នាយិកានៃអង្គការសិទ្ធិមនុស្ស Human Rights Watch ប្រចាំតំបន់អាស៊ីបានប្រាប់វីអូអេថាលោកស្រីស្វាគមន៍ចំពោះការដោះលែងនេះ។ ក៏ប៉ុន្តែលោកស្រីជំរុញឱ្យពិភពលោកកុំបំភ្លេចអ្នកទោសនយោបាយផ្សេងទៀត។
លោកស្រីថ្លែងថា៖ «លោក Sean Turnell មិនគួរត្រូវជាប់ពន្ធនាគារសូម្បីមួយវិនាទីឡើយ។ ព័ត៌មានអំពីការលើកលែងទោសនេះប្រាកដជាការធូរស្បើយយ៉ាងធំមួយសម្រាប់ក្រុមគ្រួសាររបស់លោក។ ក៏ប៉ុន្តែវាក៏ជាការដាស់តឿនមួយថា មានពលរដ្ឋមីយ៉ាន់ម៉ារាប់ពាន់នាក់ទៀតដែលត្រូវបានគេឃុំខ្លួននៅក្នុងស្ថានភាពដ៏រន្ធត់ ហើយពួកគេមិនមានការគាំទ្រខ្លាំងបែបនេះពីអន្តរជាតិនោះទេ។ ដូច្នេះ ខ្ញុំសង្ឃឹមថារដ្ឋាភិបាលអូស្ត្រាលី ចក្រភពអង់គ្លេស សហរដ្ឋអាមេរិកនិងរដ្ឋាភិបាលផ្សេងទៀត ទាមទារឱ្យពួកយោធាមីយ៉ាន់ម៉ាដោះលែងអ្នកទោសនយោបាយទាំងអស់ដែលត្រូវបានគេឃុំខ្លួនចាប់តាំងពីរដ្ឋប្រហារយោធាមក»។
ការប្រកាសដោះលែងអ្នកទោសនេះកើតមានឡើងនៅមុនសន្និសីទកំពូលកិច្ច សហប្រតិបត្តិការសេដ្ឋកិច្ចតំបន់អាស៊ីប៉ាស៊ីហ្វិកនៅក្នុងទីក្រុងបាងកក ប្រទេសថៃ។
រដ្ឋមន្ត្រីក្រសួងការបរទេសអូស្ត្រាលីលោកស្រី Penny Wong បានអំពាវនាវឱ្យដោះលែងលោក Turnell ។ អតីតរដ្ឋាភិបាលកណ្តាលស្តាំនិយមរបស់អូស្ត្រាលីកាលពីពេលមុនបាននិយាយថា ការចាប់លោកដាក់ពន្ធនាគារជា«អំពើអយុត្តិធម៌»និង«តាមទំនើងចិត្ត»។
លោក Turnell ត្រូវគេរំពឹងថា នឹងត្រូវចាប់បញ្ជូនខ្លួនទៅកាន់ប្រទេសអូស្ត្រាលីវិញ ដែលនៅទីនោះ លោកនឹងជួបជុំភរិយារបស់លោកគឺលោកស្រី Ha Vu ដែលជាសាស្ត្រាចារ្យសេដ្ឋកិច្ចម្នាក់ដែរ៕
ប្រែសម្រួលដោយលោក ជឹង ប៉ូជីន
