ភ្ជាប់​ទៅ​គេហទំព័រ​ទាក់ទង

រដ្ឋាភិបាល​​​អូស្រ្ដាលី​ពន្យា​ពេល​ការ​ផ្សព្វផ្សាយ​សេចក្ដី​រាយការណ៍​អំពី​មហន្ដរាយ​លេច​ប្រេង​កាល​ពីខែ​សីហា​មុន​ក្នុង​សមុទ្រ ​Timor Sea​


អស់​រយៈ​ពេល​ ១០​ សប្ដាហ៍ ​អណ្ដូង​ប្រេង Montara (មុនតារា ) បាន​លេច​ប្រេងនិងឧស្ម័ន​ចូល​ទៅក្នុងសមុទ្រ Timor Sea ដែល ​ស្ថិត​នៅ​ទិស​ពាយព្យ​ប្រទេស​អូស្រ្ដាលី។​ ការ​លេច​ចេញ​នូវវ​ត្ថុ​ពុល​បាន​ត្រូវ​បិត​ជិត​ទៅ​វិញ​កាល​ពី​ដើមខែ​វិ​ច្ឆកា ក្រោយ​ពី​ការ​ប្រឹង​ប្រែងបាន​ទទួល​បរាជ័យ​ជា​ច្រើន​ដង។​ ក្រុម​អ្នក​គាំទ្រ​បរិដ្ឋាន​ចង់​ដឹង​ថា​ ​ហេតុអ្វី​បាន​ជា​គេ​ត្រូវការ​ពេល​យូរ​ដូច្នេះ​ក្នុង​ការ​ទប់​ស្កាត់​មិន​ឲ្យ​ប្រេង​លេច​ដ៏​អាក្រក់​បំផុត​របស់​ប្រទេស​អូស្ដ្រាលី។

គណកម្មការ​ទទួល​បន្ទុក​ខាង​ការ​ស៊ើប​អង្កេត​ការ​លេច​ប្រេង បានសរសេរ​សេចក្ដី​រាយការណ៍​បង្ហាញ​ការ​រក​ឃើញរបស់​ខ្លួន​ដាក់​ជូន​រដ្ឋាភិបាល។​ តែ​រដ្ឋមន្ដ្រី​ក្រសួង​ធនធាន​ លោក Martin​ Ferguson ថ្លែង​ថា​ លោក​មិន​អាច​ផ្យព្វផ្សាយ​ពត៌មាន​ភ្លាមៗ​បាន​នៅ​ឡើយ​ទេ​ ដោយ​សារ​តែ​មាន​រឿង​ច្បាប់​ រាប់​ទាំង​លទ្ឋភាព​នៃ​ការ​ដាក់​ពាក្យ​ប្ដឹង​ពី​បទ​ឧក្រិដ្ឋកម្ម​ផង​ដែរ។

អ្នក​អភិរក្សនិយមមាន​ជំនឿ​ថា​ សេចក្ដី​រាយការណ៍​នោះ​ត្រូវ​ផ្សព្វផ្សាយ​ជា​សាធារណៈ​ឲ្យ​បាន​ឆាប់​រហ័ស​ ដើម្បី​រៀបចំ​សរសេរ​ច្បាប់​ថ្មី​ទូលំ​ទូលាយ ​អំពី​ការ​ការពារ​មិន​ឲ្យគ្រោះថ្នាក់​ដូច្នោះ​កើត​ឡើង​ម្ដង​ទៀត​ទៅ​អនាគត។

ព្រឹទ្ឋសមាជិកា​របស់​គណបក្ស Green Party មក​ពី​រដ្ឋ​ខាងលិច​ប្រទេស​អូស្រ្ដាលី ​លោកស្រី Rachel Siewert ថ្លែង​ថា​ រឿង​ច្បាប់​មិន​ត្រូវ​ចូល​មករាំង​ខ្ទប់​មិន​ឲ្យ​ផ្សព្វ​ផ្សាយសេចក្ដី​រាយការណ៍​របស់​គណកម្មការ​នោះ​បាន​ទេ​។

“គណកម្មការ​ស៊ើបអង្កេត​ជា​ពិធីការ​សាធារណៈ។​ ហេតុ​ដូច្នេះហើយ​ សេចក្ដី​រាយការណ៍​នោះ​ត្រូវ​ផ្សព្វ​ផ្សាយ​ឲ្យ​សាធារណជន​ដឹង។ ​ការ​លេច​ប្រេង​នោះ​កើត​មាន​ឡើង​កាល​ពីខែសីហាឆ្នាំ​មុន​ រួច​យើង​មិន​ទាន់​ឃើញ​មាន​ការ​ផ្លាស់​ប្ដូរ​ធំ​ដុំ​ទេនៅ​ក្នុងវិធានការ​ឲ្យគោរព​តាម​បទ​បញ្ជា​របស់យើង​ ហើយ​យើង​មិន​ទាន់​ឃើញ​តំបន់​ថ្មី​តាម​ឆ្នេរ​សមុទ្របាន​ត្រូវការពារ​នៅឡើយ​ទៀត”។

ក្រុម​អភិរក្សនិយមបាន​និយាយ​ត​វ៉ា​ថា ​ប្រទេសអូស្រ្ដាលី​ត្រូវ​ចេញ​ច្បាប់​បញ្ឈប់​បណ្ដោះអាសន្នមក​លើ​ការ​រុក​រកប្រេង​និង​ឧស្ម័នក្នុង​សមុទ្រ​ជ្រៅ ​លុះ​ត្រា​តែសេចក្ដី​រាយការណ៍​ពី​តំបន់​សមុទ្រ​មុនតារាបាន​ត្រូវ​ផ្សព្វ​ផ្សាយ​ឲ្យ​ដឹង​រួច​ជា​មុន​សិន។​ ក្រុម​នោះ​ចង្អុល​បង្ហាញ​វិធានការ​របស់ប្រធានាធីបតីសរអា​ លោក ​បារ៉ាក់ ​អូបាមា ​ដែល​ចេញ​បញ្ជា​ឲ្យ​បញ្ឈប់​សកម្មភាព​រុករក​ប្រេង​នៅ​បាត​សមុទ្រ​ ក្រោយពី​មាន​ការ​លេច​ប្រេង​នៅឈូងសមុទ្រ​មិចសិកូ​ នោះមក។

ខណៈ ​ដែល​រដ្ឋាភិបាល​ ក្រុង កិនបារ៉ា​ និយាយ​ថា ខ្លួន​បាន​តាំង​ចិត្ដ​ថា​នឹង​ធ្វើ​ឲ្យ​មាន​សុវត្ថភាព​ដល់ឧស្សហកម្ម​ប្រេង​និង​ឧស្ម័ន​របស់​ប្រទេស​ជាតិ​ មន្ដ្រី​រដ្ឋាភិបាលនិយាយថា ​ការ​ប្រែ​ប្រួល​ណា​មួយ​នៅ​ក្នុងបទ​បញ្ជា​មិន​ត្រូវធ្វើ​ឲ្យ​ប៉ះពាល់​ដល់​សន្ដិសុខ​ថាមពលប្រទេស​ ឬ​ការងារ​របស់​ប្រទេស​អូស្រ្ដាលី​ឡើយ ។

ការ​លេច​ប្រេង​នៅ​ក្នុង​សមុទ្រ Timor Sea មាន​ចំនួន ​៤០០ ​ធុង​ក្នុង​មួយ​ថ្ងៃបានធ្វើឲ្យប្រឡាក់​ដល់ឆ្នេរសមុទ្រ​ ​ឥណ្ឌូនេស៊ី​ និង​កោះ​ទីម៉រ​ ភាគ​ខាងកើត៕

ប្រែ​សម្រួល​ដោយលោក​ អ៊ូ ធួក។

XS
SM
MD
LG