មេដឹកនាំស៊ីវិលលោកស្រី Aung San Suu Kyi ដែលត្រូវបណ្តេញចេញពីតំណែងដោយរដ្ឋប្រហារយោធានៅក្នុងប្រទេសមីយ៉ាន់ម៉ា បានស្នើដល់ពលរដ្ឋរបស់លោកស្រីឲ្យរក្សាការ«រួបរួមគ្នា» នៅក្នុងការប្រឈមការគ្រប់គ្រងរបស់ពួកយោធា។ នេះបើយោងតាមការលើកឡើងរបស់មេធាវីការពារក្តីរបស់លោកស្រីនៅថ្ងៃអង្គារម្សិលមិញ ខណៈដែលលោកស្រីបានចូលរួមក្នុងសវនាការកាត់ក្តីរបស់លោកស្រីជាថ្មីទៀត នៅក្នុងតុលាការនៃរបបយោធា។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AFP។
ជ័យលាភីណូបែលសន្តិភាពនិងជាកូនស្រីរបស់វីរបុរសឯករាជ្យជាតិមីយ៉ាន់ម៉ាគឺលោកឧត្តមសេនីយ៍ Aung Sanត្រូវបានរបបយោធាចាប់ឃុំខ្លួនក្នុងផ្ទះ ចាប់តាំងពីក្រោយថ្ងៃរដ្ឋប្រហារយោធាកាលពីដើមខែកុម្ភៈកន្លងទៅ ដែលបណ្តាលឲ្យមានការប្រឆាំងតវ៉ាដោយអ្នកគាំទ្រប្រជាធិបតេយ្យនៅទូទាំងប្រទេសមីយ៉ាន់ម៉ា។ ពួកគេត្រូវទទួលការបង្ក្រាបយ៉ាងប្រល័យពីរដ្ឋអំណាចយោធា។
ការឡើងតុលាការរបស់លោកស្រី Suu Kyi ដែលមានវ័យ៧៦ឆ្នាំនោះ មិនត្រូវបានបើកឲ្យពិភពខាងក្រៅមើលឃើញនោះទេ។ លោកស្រីអាចត្រូវជាប់ពន្ធនាគារជាង១០ឆ្នាំ បើតុលាការនៃរបបយោធាកាត់ឲ្យជាប់ទោស នៅគ្រប់ការចោទប្រកាន់ទាំងអស់នោះ។
កាលពីថ្ងៃអង្គារម្សិលមិញ លោកស្រី Suu Kyi បានផ្តល់សក្ខីកម្មលើបទចោទប្រកាន់ថា លោកស្រីបានរំលោភបំពានលើការរឹតបន្តឹងជំងឺកូវីដ១៩ នៅក្នុងយុទ្ធនាការរកសំឡេងឆ្នោតនៃគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រីដែលបានទទួលជ័យជម្នះភ្លូកទឹកភ្លូកដីកាលពីឆ្នាំទៅ។
នេះបើតាមការបញ្ជាក់របស់មេធាវីការពារក្តីរបស់លោកស្រី Suu Kyi គឺអ្នកស្រី Min Min Soe ដែលបានប្រាប់ក្រុមអ្នកសារព័ត៌មាន។
មេធាវីរូបនោះបានបញ្ជាក់ថា៖ «លោកស្រី Suu Kyi បានស្នើដល់ពលរដ្ឋមីយ៉ាន់ម៉ាឲ្យរក្សាការរួបរួមគ្នា និងមានជំហរស្របគ្នា»។
អតីតប្រធានាធិបតីមីយ៉ាន់ម៉ាលោកWin Myint និងលោកMyo Aung មេដឹកនាំជាន់ខ្ពស់នៃគណបក្សសម្ព័ន្ធជាតិដើម្បីលទ្ធិប្រជាធិបតេយ្យក៏បានឡើងតុលាការផងដែរកាលពីថ្ងៃអង្គារលើបទបង្កឲ្យមានការបះបោរហើយបានបង្ហាញខ្លួនក្នុងតុលាការដោយឈរទន្ទឹមនឹងលោកស្រី Suu Kyi ផងដែរ។
បើយោងទៅលើក្រុមតាមដានស្ថានភាពក្នុងស្រុកមួយបានឲ្យដឹងថា រហូតមកដល់ពេលនេះ មានក្រុមអ្នកប្រឆាំងតវ៉ាប្រមាណជាង៨៨០នាក់ ត្រូវបានសម្លាប់ដោយអាជ្ញាធរមីយ៉ាន់ម៉ា នៅក្នុងការបង្ក្រាបដ៏ឃោរឃៅរបស់ពួកគេ៕
