កាលពីថ្ងៃអង្គារម្សិលមិញ លោក Joe Biden បានក្លាយជាប្រធានាធិបតីអាមេរិកាំងដំបូងគេដែលបានប្រារព្ធពិធីរំឭកខួបនៃការបំផ្លាញសហគមន៍ស្បែកខ្មៅដោយក្រុមជនជាតិស្បែកសដែលបានសម្លាប់មនុស្សរហូតដល់៣០០នាក់ និងធ្វើឲ្យមនុស្ស១ម៉ឺននាក់គ្មានផ្ទះសម្បែងរស់នៅ។
នៅឯមជ្ឈមណ្ឌលវប្បធម៌ Greenwood លោក Biden បានថ្លែងនៅក្នុងសុន្ទរកថាទៅកាន់អ្នកនៅរស់រានមានជីវិតពីការសម្លាប់រង្គាល និងក្រុមគ្រួសាររបស់ពួកគេថា «គ្មានការនិយាយអំពីប្រវត្តិនេះ វាមិនមានន័យថា រឿងនេះមិនបានកើតឡើងនោះទេ។ ភាពអយុត្តិធម៌ខ្លះ សាហាវយង់ឃ្នងគួរឱ្យរន្ធត់ខ្លោចផ្សាណាស់ដែលគេមិនអាចបំភ្លេចបាន ទោះបីជាខំប្រឹងយ៉ាងណាក៏ដោយ»។
កាលពី១០០ឆ្នាំមុន នៅថ្ងៃទី៣១ ខែឧសភា និងថ្ងៃទី១ ខែមិថុនា នៅសង្កាត់ Greenwood ដែលត្រូវបានគេស្គាល់ថា Black Wall Street ត្រូវបានប្រជាជនស្បែកសប្លន់ និងដុតបំផ្លាញចោលនៅ Tulsa ដោយមានការគាំទ្រពីប៉ូលិស Tulsa។ ការសម្លាប់រង្គាលនេះ បង្កឡើងដោយការចោទប្រកាន់ថា បុរសស្បែកខ្មៅអាយុ១៩ ឆ្នាំម្នាក់ បានរំលោភក្មេងស្រីស្បែកសអាយុ១៧ ឆ្នាំនៅក្នុងជណ្តើរយន្ត។
អស់រយៈពេលជាច្រើនទសវត្សរ៍បន្ទាប់ពីការសម្លាប់រង្គាល ការវាយប្រហារដ៏ឃោរឃៅនេះ ត្រូវបានបិទបាំង ហើយមិនត្រូវបានគេដឹងឮទូទាំងប្រទេសទេ។ ក៏ប៉ុន្តែនៅពេលមានការសន្ទនាថ្នាក់ជាតិផ្តោតសំខាន់ទៅលើបញ្ហាប្រកាន់ពូជសាសន៍ និងអំពើហិង្សារបស់ប៉ូលិសហេតុការណ៍នេះ មានការចាប់អារម្មណ៍កាន់តែខ្លាំងនៅក្នុងប្រព័ន្ធផ្សព្វផ្សាយនិងវប្បធម៌ប្រជាប្រិយ។
លោកប្រធានាធិបតី Biden បានជួបជាមួយសមាជិកបីនាក់ ដែលបានរួចជីវិតពីការសម្លាប់រង្គាល គឺលោកយាយ Viola លោកតា Hughes Van Ellis និងលោកយាយ Lessie Benningfield Randle ដែលឥឡូវនេះ មានអាយុជាង១០០ឆ្នាំហើយ។
បន្ទាប់ពីពិធីស្មឹងស្មាធលោក Biden និយាយថា៖ «បងប្អូនជនជាតិអាមេរិករបស់ខ្ញុំ នេះ មិនមែនជាកុប្បកម្មទេ។ នេះ គឺជាការសម្លាប់រង្គាលមួយ»៕
