ភ្ជាប់​ទៅ​គេហទំព័រ​ទាក់ទង

សមាជ​គណបក្ស​កុម្មុយនិស្ត​ឡាវ​រក្សា​ស្ថានភាព​នៅ​ដដែល


នាយករដ្ឋមន្រ្តី​ឡាវលោក​ ថុងស៊ីង ថាំម៉ាវង្ស (ឆ្វេង) និង អគ្គលេខាធិការ​គណបក្ស​​កុម្មុយនិស្ត​ និង​ជា​ប្រធាន​រដ្ឋសភា​​វៀតណាម​លោក​ វិន ហ្វូ ចុង (Nguyen Phu Trong) (ស្តាំ) ពិភាក្សា​នៅ​ឯ​ទីស្នាក់ការ​ធំ​របស់​គណបក្ស​នេះ​ ក្នុង​ទីក្រុង​ហាណូយ​នៅថ្ងៃទី២៨ ខែកុម្ភៈ ឆ្ន

នៅ​សមាជ​គណបក្ស​ដែល​ធ្វើឡើង​ជា​រៀងរាល់​ប្រាំ​ឆ្នាំ​ម្តង​ គណបក្ស​កុម្មុយនិស្ត​ដែល​កំពុង​កាន់​អំណាច​ក្នុង​ប្រទេស​ឡាវ ​បាន​បោះ​ឆ្នោត​ជ្រើសរើស​មេដឹកនាំ​ថ្មី​ហើយនឹង​បង្ហាញ​ពី​ទិសដៅ​អភិវឌ្ឍន៍​សង្គម​និង​សេដ្ឋកិច្ច។ ពួក​អ្នក​វិភាគ​និយាយ​ថា​ សមាជ​នេះ​នឹង​មិន​នាំ​ឲ្យមាន​ការផ្លាស់​ប្តូរ​នយោបាយ​និង​សេដ្ឋកិច្ច​ទាំងស្រុង​នៅក្នុង​ប្រទេស​ជាតិ​ដ៏​តូច​មួយ​ក្នុង​តំបន់​អាស៊ី​អា​គ្នេយ៍​នោះ​ទេ។

ពួក​មេដឹកនាំ​កុម្មុយនិស្ត​ឡាវ​ បាន​ជួប​ប្រជុំ​គ្នា​នៅ​ខែ​នេះ​ដែល​ជា​សមាជ​គណបក្ស​ធ្វើ​ឡើង​ជា​រៀងរាល់​៥​ឆ្នាំ​ម្តង។ ពួក​អ្នកវិភាគ​ និយាយ​ថា​សមាជ​នេះ​ បាន​ពង្រឹង​លក្ខណៈ​អំណាច​ដែល​បាន​ចាក់ឬស​ ហើយ​នឹង​មិន​ធ្វើ​ឲ្យ​មាន​ការផ្លាស់​ប្តូរ​ជា​ដុំ​កំភួន​ដល់​យុទ្ធសាស្រ្ត​ការអភិវឌ្ឍ ​ឬ​ នយោបាយ​ការបរទេស​របស់​រដ្ឋ​ដ៏​ក្រីក្រ​ដែល​មាន​គណបក្ស​តែ​មួយ​នេះ។

ប្រទេស​ឡាវ ​ដែល​មាន​ប្រជាពលរដ្ឋ​ប្រហែល​៦​លាន​នាក់​ហើយ​មាន​ព្រំដែនជាមួយ​ប្រទេស​ចិន​ វៀតណាម ​កម្ពុជា​ ថៃ ​និង​ប្រទេស​ភូមា​ ស្ថិត​ក្នុង​ចំណោមប្រទេស​ដ៏​ក្រីក្រ​បំផុត​មួយ​នៅ​ក្នុង​ពិភពលោក​ហើយ​ពឹងពាក់​យ៉ាង​ខ្លាំង​លើ​ជំនួយ​និង​ការវិនិយោគ​ទុន​បរទេស។

នៅ​ឯ​សមាជ​ដែល​ធ្វើឡើង​ពីថ្ងៃ​ទី​១៧​ ដល់​ថ្ងៃទី​២១​ ខែ​មិនា​នៅ​ក្នុង​រដ្ឋធានី​វៀងច័ន្ទ​នៃ​ប្រទេស​ឡាវ​ គណៈប្រតិភូ​បាន​បោះឆ្នោត​ជ្រើស​រើស​លោក​ជូម៉ាលី សាយាសូសាន (Choumaly ​Sayasosane)​ អាយុ​៧៥​ឆ្នាំ​ឲ្យធ្វើ​ជា​អគ្គលេខាធិការ​គណបក្ស​ប្រជាជន​បដិវត្តន៍​ឡាវ​ម្តង​ទៀត​ហើយ​បាន​បោះឆ្នោត​ជ្រើសរើស​សមាជិក​ថ្មី​ចូលក្នុង​គណៈកម្មាធិការ​និង​ការិយាល័យនយោបាយ​មជ្ឈិម​បក្ស។

ពួកគេ​ក៏​បាន​អនុម័ត​គោលដៅ​ធ្វើឲ្យ​សម្រេច​ការរីក​លូតលាស់​ម៉ាក្រូ​សេដ្ឋកិច្ចប្រចាំ​ឆ្នាំ​ប្រហែល​៨​ភាគរយ​សម្រាប់​ឆ្នាំ​២០១១​ដល់​ឆ្នាំ​២០១៥​ហើយ​បាន​បញ្ជាក់សាជា​ថ្មី​ក្នុង​គោលដៅ​ឲ្យ​បាន​សម្រេច​ឋានៈ​ជា​ប្រទេស​រកបាន​ប្រាក់​ចំណូល​មធ្យម​មិន​ឲ្យ​ហួស​ពី​ឆ្នាំ​២០២០។

លោក​ ម៉ាទីន ស្ទួត ហ្វក(Martin ​Stuart-Fox) ​ជា​អ្នក​ជំនាញ​ស្តីពី​ប្រទេស​ឡាវ​ហើយ​នឹង​ជា​សាស្ត្រាចារ្យ​ចូលនិវត្តន៍​នៅ​សកលវិទ្យាល័យ​ Queensland ​នៃ​ប្រទេស​អូស្រ្តាលី​មាន​ប្រសាសន៍​ថា​សមាជ​បាន​ពង្រឹង​អំណាច​របស់​គណបក្ស​ប្រជាជន​បដិវត្តន៍​ឡាវ​ហើយនឹង​កងទ័ព​ឡាវ​ដែល​តំណាង​ឲ្យ​គណបក្ស។

លោក​មាន​ប្រសាសន៍​បន្ត​ទៀត​ថា​សមាជ​ មិន​បាន​ផ្តល់​សញ្ញា​ពីការផ្លាស់ប្តូរ​ឆ្ពោះ​ទៅកាន់​លទ្ធិ​ប្រជាធិបតេយ្យ​ទេ។

លោក ស្ទួត ហ្វក មាន​ប្រសាសន៍​បន្ត​ទៀត​ថា​ ឡាវ​បាន​ស្វាគមន៍​ជំនួយ​និង​ការវិនិយោគទុន​មកពី​ប្រទេស​មហាអំណាច​ជិតខាង​រួមមាន​ប្រទេស​ចិន​ វៀតណាម​ និង​ថៃ ​ដែលជា​ប្រទេស​វិនិយោគទុន​សំខាន់​ៗបី​របស់​ខ្លួន​ ក៏​ដូចជាប្រទេស​មូលធន​លោក​ខាងលិច​ដែរ។

«គោលនយោបាយ​ការបរទេស​ឡាវ​ ត្រូវ​គេ​សំអាង​ថា​ធ្វើ​មិត្តភ័ក្រ​ជាមួយ​ប្រ​ទេស​ទាំងអស់​ ហើយ​ខ្ញុំ​គិត​ថា​ពួកមេដឹកនាំ​នឹង​បន្ត​ព្យាយាម​ធ្វើ​ដូច្នេះ​ ហើយ​ខ្ញុំ​គិត​ថា ​ពួកគេ​ប្រហែល​នឹង​ធ្វើ​បាន​យ៉ាង​ល្អ​បំផុត»។

អ្នក​វិភាគ​ខ្លះ​និយាយ​ថា​ការតែងតាំង​នាយក​រដ្ឋមន្ត្រី​ថុងស៊ីង ថាំម៉ាវង្ស(Thongsing​ Thammavong)​ កាលពី​ខែ​ធ្នូ ​បាន​បញ្ជូន​សញ្ញា​នៃ​ការផ្លាស់ប្តូរ​ទៅរក​ក្រុម​ដែល​មាន​ការ​លំអៀង​ទៅកាន់​ប្រទេស​វៀត​ណាម​ ជា​ជាង​ក្រុម​លំអៀង​ទៅកាន់​ប្រទេស​ចិន​ នៅ​ក្នុង​ក្រុម​មេដឹក​នាំ​បក្ស​កុម្មុយ​និស្ត​ឡាវ​ ក៏ប៉ុន្តែ​ ពួក​អ្នកវិភាគ​ផ្សេង​ទៀត​ និយាយ​ថា ​ការវាយ​តម្លៃ​នេះ​មិន​អើពើ​ដល់​ភាពចម្រុះ​នៃ​នយោបាយ​របស់​ឡាវ។

លោក​ ម៉ាទីន ស្ទួត ហ្វក​ បាន​ប្រាប់ ​VOA ​សំឡេង​សហរដ្ឋ​អាមេរិក​ថា​ដោយមិន​គិត​ពី​ការផ្លាស់​ប្តូរ​គណបក្ស ​ឡាវ​នឹង​បន្ត​ទាក់ទាញ​ការវិនិយោគ​ទុន​បរទេស​ដោយ​ការលក់​ធនធាន​ធម្មជាតិ​ក្នុង​ប្រទេស​ ជា​ពិសេស​ឈើ ​រ៉ែ​និង​ផ្នែកវារី​អគ្គិសនី។

លោក​និយាយ​ទៀតថា​ វា​អាច​មាន​លទ្ធភាព​ថា​ឡាវ​ដែល​មាន​អត្រា​រីកលូត​លាស់​ផលិតផល​សរុប​ក្នុង​ស្រុក​ GDP​ ៧​ភាគរយ​ក្នុង​ឆ្នាំ​២០០៩ ​នឹង​សម្រេច​អត្រា​រីកលូតលាស់​៨​ភាគរយ​នៅ​ឆ្នាំ​នេះ។ ទោះជា​យ៉ាងណា​ក៏ដោយ ​លោកបាន​កត់សម្គាល់​ថា​មិនមែន​ប្រជាពលរដ្ឋ​ឡាវ​ទាំងអស់ ​បាន​ទទួល​ផល​ប្រយោជន៍​ពី​ការរីកលូត​លាស់​សេដ្ឋកិច្ច​របស់​ប្រទេស​ជាតិ​ទេ។

«បញ្ហា​ក្នុង​ប្រទេស​ឡាវ​គឺថា​ធនធាន​នោះ​មិនបាន​បែងចែក​ឲ្យ​ស្មើគ្នា​ទេ​ ដូច្នេះ​ធនធាន​ត្រូវបាន​ធ្លាក់​ក្នុង​ទីក្រុង​នានា​នៅ​ជ្រលង​ទន្លេមេគង្គ​ហើយ​មាន​ធនធានបន្តិច​បន្តួច​ណាស់​ដែល​បានចូល​ទៅក្នុង​ប្រទេស​ហើយនឹង​ចូល​ក្នុង​តំបន់​ភ្នំដែល​ពួក​ជនជាតិ​ភាគតិច​រស់​នៅ​ ដោយ​ហេតុ​ដូច្នេះ​ហើយ​ ពួកគេ ​នឹង​មាន​កម្រិត​ភាពក្រីក្រ​នៅ​តំបន់​ដាច់ស្រយាល​បន្ត​នៅ​ខ្ពស់​ក្នុង​ប្រទេស​ឡាវ»។

លោក​មាន​ប្រសាសន៍​បន្ត​ទៀត​ថា​គេ​ប្រហែល​នៅមាន​ការមន្ទិល​សង្ស័យ​ថា​ប្រទេស​ឡាវ​ នឹង​ធ្វើ​ឲ្យ​សម្រេច​គោលដៅ​របស់​ខ្លួន​ដោយ​ចាកចេញ​ពី​ឋានៈ​ប្រទេស​ប្រទេស​មិន​សូវ​អភិវឌ្ឍន៍​មិន​ឲ្យហួស​ពីឆ្នាំ​២០២០។

យោង​ទៅតាម​ការប៉ាន់​ស្មាន​របស់​ក្រសួង​ការបរទេស​សហរដ្ឋ​អាមេរិក​ ប្រាប់​ឲ្យ​ដឹង​ថា​ប្រាក់​ចំណូល​មនុស្ស​ម្នាក់​ៗក្នុង​ប្រទេស​ឡាវ​មាន​តិច​ជាង​១​ពាន់​ដុល្លារ​ក្នុង​ឆ្នាំ​២០១០ ។

ពួក​កុម្មុយនិស្ត ​បាន​ត្រួតត្រា​ប្រទេស​ឡាវ​ចាប់តាំង​ពី​បញ្ចប់​សង្គ្រាម​ស៊ីវិល​ក្នុង​ឆ្នាំ​១៩៧៥​មក។​សហរដ្ឋ​អាមេរិក​ បាន​ទម្លាក់​គ្រាប់បែក​លើ​ប្រទេស​ឡាវ​យ៉ាង​ខ្លាំង​ក្នុង​សង្គ្រាមវៀតណាម​ ហើយ​ពួក​មន្ត្រី​ឡាវ​ បាន​អះអាង​ថា ​ប្រទេស​របស់​ខ្លួន ​បាន​ទទួលរង​ការទម្លាក់​គ្រាប់បែក​ជាង​គេ​នៅ​លើផែន​ដី​នេះ។

ក្នុង​ប៉ុន្មាន​ខែ​ថ្មីៗ​នេះ​ ឡាវ​បាន​ធ្វើ​ឲ្យមាន​ការរិះគន់​យ៉ាង​ខ្លាំង​ពី​ពួកអ្នក​បរិដ្ឋានអង្គការ​មិនមែន​រដ្ឋាភិបាល​ហើយនឹង​ពួក​មន្ត្រី​វៀតណាម​ដោយ​ការយល់ព្រមលើ​ផែនការ​របស់​ក្រុមហ៊ុន​ថៃ​មួយ​ស្ថាបនា​ទំនប់​វារី​អគ្គិសនី​ចំនួន​១២​ជា​លើក​ដំបូង​ដែល​គេ​មាន​ផែនការ​សាងសង់​នៅ​ទន្លេ​មេគង្គ​ក្រោម។

ពួក​មន្រ្តី​ឡាវ​និយាយ​ថា ​ការស្ថាបនា​ទំនប់​ទឹក​លើ​ទន្លេ​មេគង្គ​ នឹង​ធ្វើ​ឲ្យ​សេដ្ឋ​កិច្ច​រីកលូតលាស់​ហើយនឹង​ជួយ​ប្រទេស​ឲ្យ​ងើបចេញ​ពី​ភាព​ក្រីក្រ។ប្រទេស​ចិន​ដែល​ជា​ប្រទេស​ជិតខាង​បាន​ប្រតិបត្តិការ​ទំនប់​ទឹក​៤​លើ​ចរន្ត​ទឹកទន្លេ​ខាងលើ៕

ប្រែ​សម្រួល​ដោយ​ ជឹង ប៉ូជីន

XS
SM
MD
LG