សាក្សីនិងមន្រ្តីបាននិយាយថា ការប្រយុទ្ធគ្នាវាងកងទ័ពតំបន់របស់សូម៉ាលីនិងពួកសកម្មប្រយុទ្ធអាល់សាបាប់ កាលពីថ្ងៃសៅរ៍បានធ្វើឱ្យមនុស្សយ៉ាងតិច២២នាក់ស្លាប់។
ការប្រយុទ្ធគ្នានៅភាគនិរតីសូម៉ាលីនេះបានចាប់ផ្តើមបន្ទាប់ពីពួកសកម្មប្រយុទ្ធអាល់សាបាប់ដែលមានអាវុធធុនធ្ងន់បានប៉ុនប៉ងវាយលុកយកមូលដ្ឋានយោធាមួយនៅក្នុងតំបន់ឆកសមុទ្រ។
មន្ត្រីរដ្ឋាភិបាលសូម៉ាលីម្នាក់បានប្រាប់វីអូអេភាសាសូម៉ាលីថា ពួកទាហានបានប្រយុទ្ធយ៉ាងស្វិតស្វាញអស់រយៈពេលជាង៦ម៉ោងជាមួយពួកសកម្មប្រយុទ្ធដែលបានវាយប្រហារបួនមុខព្រួញលើមូលដ្ឋានទ័ព។
លោកឧត្តមសេនីយ៍ Osman Nurow និយាយថា៖ «ពួកគេបានវាយប្រហារយើងបួនមុខព្រួញដោយមានគោលបំណងកាន់កាប់មូលដ្ឋានរបស់យើងនៅប្រហែលម៉ោង៧ព្រឹក។ បន្ទាប់ពីការប្រយុទ្ធគ្នាដ៏ខ្លាំងក្លាបំផុតរយៈពេលប្រាំម៉ោង យើងបានបង្ខំពួកគេឱ្យដកចេញហើយបានបង្ខំពួកគេរត់ប្រាសអាយុ»។
លោក Nurow បាននិយាយថា កងកម្លាំងប្រដាប់អាវុធរដ្ឋាភិបាលដែលបញ្ជូនមកពីមូលដ្ឋានយោធានៅក្រុង Baidoa ក្បែរនោះបានជួយពង្រឹងមូលដ្ឋាននេះភ្លាមៗដោយបានចូលរួមក្នុងសមរភូមិ ហើយបានសម្លាប់ពួកសកម្មប្រយុទ្ធយ៉ាងហោចណាស់១៤នាក់។
លោក Abdiaziz Hassan Mohamed ប្រធានាធិបតីដែលត្រូវបានជ្រើសតាំងថ្មីបាននិយាយថា កងកម្លាំងតំបន់បាត់បង់ទាហាន៨នាក់នៅក្នុងសមរភូមិនេះ។
សាក្សីឯករាជ្យជាច្រើនដែលវីអូអេបានទាក់ទងបានបញ្ជាក់ការអះអាងរបស់រដ្ឋាភិបាល ដោយនិយាយថា ពួកគេបានឃើញសាកសពពួកសកម្មប្រយុទ្ធយ៉ាងហោចណាស់១៤នាក់៕
