រដូវកាលឡើងលើកំពូលភ្នំ អេវ៉ឺរេស បានមកដល់ទៀតហើយ ហើយកាលពីថ្ងៃចន្ទ មានអ្នកឡើងភ្នំយ៉ាងហោចណាស់៣០នាក់ បានឡើងទៅដល់កំពូលភ្នំនេះ ដែលក្នុងនោះក៏រួមមានអ្នកឡើងភ្នំពិការជើងទាំងពីរជនជាតិចិន និងជនជាតិអូស្ត្រាលី ម្នាក់ដែលបានឡើងដល់កំពូលភ្នំខ្ពស់ៗបំផុតនៅគ្រប់ទ្វីបទាំងអស់ផងដែរ។
លោក Xia Boyu ដែលជាអ្នកឡើងភ្នំជនជាតិចិន បានក្លាយទៅជាជនពិការជើងទាំងសងខាងដំបូងបង្អស់ដែលអាចឡើងដល់កំពូលភ្នំនេះពីខាងប្រទេសនេប៉ាល់។ ជនពិការជើងទាំងសងខាងម្នាក់ទៀតគឺលោក Mark Inglis មកពីប្រទេសនូវែលសេឡង់ បានឡើងដល់កំពូលភ្នំ អេវ៉ឺរេស ពីខាងតំបន់ទីបេ កាលពីឆ្នាំ២០០៦។
លោក Xia ដែលមានអាយុ ៦៩ឆ្នាំ ក៏បានក្លាយទៅជាជនពិការជើងទាំងសងខាងដែលមានវ័យចាស់ជាងគេបំផុតដែលអាចឡើងដល់កំពូលភ្នំនេះ។ លោកធ្លាប់សាកឡើងភ្នំនេះកាលពីឆ្នាំ១៩៧៥ ប៉ុន្តែលោកបានបាត់បង់ជើងទាំងសងខាងក្នុងអំឡុងពេលឡើង ដោយសារតែអាកាសធាតុត្រជាក់ខ្លាំងធ្វើឲ្យជាលិកាជើងរបស់លោកងាប់រហូតធ្វើឲ្យលោកពិការជើងទាំងសងខាង។
ទីភ្នាក់ងារសារព័ត៌មានផ្លូវការ Xinhua របស់រដ្ឋក្នុងប្រទេសចិនបានឲ្យដឹងថា លោក Xia បានព្យាយាមឡើងឲ្យដល់កំពូលភ្នំនេះក្នុងឆ្នាំ២០១៤ ឆ្នាំ២០១៥ និងឆ្នាំ២០១៦ ប៉ុន្តែលោកមិនអាចសម្រេចជោគជ័យបាន ហើយទើបតែសម្រេចជោគជ័យក្នុងពេលនេះ៕