ប្រទេសកម្ពុជាបានធ្វើការបោះឆ្នោតជ្រើសរើសក្រុមប្រឹក្សារាជធានីខេត្តក្រុងស្រុកខណ្ឌនៅតាមការិយាល័យបោះឆ្នោតចំនួន២០៣ដែលមតិជាច្រើននិយាយថា ជាការបោះឆ្នោតបង្គ្រប់កិច្ច ព្រោះគ្មានការប្រកួតប្រជែងពិតប្រាកដក្រោយពីតុលាការគណបក្សកាន់អំណាចរបស់លោកនាយករដ្ឋមន្ត្រីហ៊ុន សែនបានរំលាយគណបក្សសង្គ្រោះជាតិកាលពីខែវិច្ឆិកាឆ្នាំ២០១៧។
គណបក្សកាន់អំណាចរបស់លោកនាយករដ្ឋមន្ត្រី ហ៊ុន សែន ត្រូវអ្នកឃ្លាំមើលនយោបាយកម្ពុជា មើលឃើញជាមុនថា នឹងក្តោបយកអាសនៈក្រុមប្រឹក្សារាជធានីខេត្ត ក្រុង ស្រុកខណ្ឌ ស្ទើរតែទាំងអស់ ជាង៤០០០ ព្រោះអង្គបោះឆ្នោតស្ទើរតែទាំងអស់ជារបស់គណបក្សប្រជាជនកម្ពុជារបស់លោកនាយករដ្ឋមន្ត្រីក្រោយពីគណៈកម្មាធិការជាតិរៀបចំការបោះឆ្នោត (គ.ជ.ប.) បានដកអាសនៈក្រុមក្រុមប្រឹក្សាឃុំសង្កាត់របស់គណបក្សសង្គ្រោះជាតិជាង៥ពាន់ដែលជាអង្គបោះឆ្នោតអសកលនេះ ហើយឲ្យទៅគណបក្សរបស់លោកហ៊ុន សែន ភាគច្រើនតាមរូបមន្តបែងចែកអាសនៈឡើងវិញ។
ដូចការរំពឹងទុកការបោះឆ្នោតនេះមិនមានការតវ៉ា ឬអំពើហិង្សាទេ ហើយលទ្ធផលក៏នឹងមិនខុសពីការរំពឹងទុកដែរគឺគណបក្សរបស់លោកហ៊ុន សែននឹងឈ្នះភ្លូកទឹកភ្លូកដីតែម្នាក់ឯង។
តាមច្បាប់បោះឆ្នោតកម្ពុជា អាសនៈចំនួន៤ពាន់១១៤ សម្រាប់ក្រុមប្រឹក្សារាជធានីខេត្ត ក្រុងស្រុកខណ្ឌ មិនត្រូវបានជ្រើសរើសដោយសាធារណជននោះទេ ប៉ុន្តែអ្នកដែលអាចជ្រើសរើសបាននោះ មានតែក្រុមប្រឹក្សាឃុំសង្កាត់ចំនួន១ម៉ឺន១ពាន់៥៧២នាក់ ដែលភាគច្រើនមកពីគណបក្សកាន់អំណាច។
តាមសេចក្តីប្រកាសរបស់គ.ជ.ប.ចេញផ្សាយនៅថ្ងៃអាទិត្យបានឲ្យដឹងថា ដំណើរការបោះឆ្នោតនៅតាមការិយាល័យទូទាំងប្រទេសសរុប២០៣ បានប្រព្រឹត្តទៅដោយរលូន គ្មានការរាំងស្ទះ និងគ្មានអំពើហិង្សា។ តែជាអកសល មានអង្គបោះឆ្នោតមួយរូបបានស្លាប់ដោយគ្រោះថ្នាក់ចរាចរណ៍ នៅក្នុងឃុំក្រែក ស្រុកពញាក្រែង ខេត្តត្បូងឃ្មុំ។
គ.ជ.ប.បានចេញលទ្ធផលបណ្តើរៗអំពីការបោះឆ្នោតដែលមានគណបក្សចំនួន៦ចូលរួម។ ដូចរំពឹងទុកយោងតាមលទ្ធផលបណ្តើរៗនេះ គណបក្សប្រជាជនកម្ពុជារបស់លោកហ៊ុន សែនឈ្នះដាច់៕
