ភ្ជាប់​ទៅ​គេហទំព័រ​ទាក់ទង

បាតុកម្ម​នៅ​ថៃ​រីក​រាល​ដាល​ពី​រឿង​លោក​ Thaksin​ ដល់​រឿង​ប្រជាធិប​តេយ្យ


បាតុករ​ប្រឆាំង​រដ្ឋាភិបាល​ថៃ​កំពុង​បួង​សួង។​

ចំពោះ​ជន​ជាតិ​ថៃ​មិន​មាន​មនុស្ស​ណា​ដែល​ធ្វើ​ឲ្យ​មាន​ការ​បែក​បាក់​ជាង​លោក Thaksin Shinawatra ​ទៀត​ទេ ។ ​ចំពោះ​ពួក​បាតុករ​ប្រឆាំង​រដ្ឋា​ភិបាល​ថៃ​រាប់​ពាន់​នាក់​ដែល​កំពុង​ឡោម​ព័ទ្ធ​រាជ​ធានី​បាងកក ​លោក ​Thaksin​ ជា​អ្នក​ជួយ​ឧប្បត្ថម្ភ​ពួក​គេ ។ ​ចំពោះ​មនុស្ស​ផ្សេង​ទៀត​ លោក​ជា​អ្នក​នយោ​បាយ​ពុក​រលួយ ។​ ក៏​ប៉ុន្តែ ​ពួក​អ្នក​វិភាគ​នយោ​បាយ​និយាយ​ថា៖​ បាតុ​កម្ម​បាន​រាល​ដាលហួស​ពី​រឿង​ទាក់​ទង​នឹង​អតីត​នាយក​រដ្ឋ​មន្រ្តី​ដ៏​ចម្រូង​ចម្រាស់​រូប​នេះ​ទៅ​ដល់​បញ្ហា​នៃ​ការ​ចូល​រួម​នៃ​លទ្ធិ​ប្រជាធិប​តេយ្យ​ផង។

អ្នក​ឆ្លើយឆ្លង​ព័ត៌មាន​របស់ ​VOA​ លោក​Daniel Schearf រាយ​ការណ៍​រឿង​នេះ​ពី​ទី​ក្រុង​ បាងកក ហើយ​លោក​ជឹង ​ប៉ូជីន​ប្រែ​សម្រួល​សេចក្តី​រាយ​ការណ៍​នេះ​ជូន​ដូច​ត​ទៅ៖

រូប​ភាព​របស់​លោក​ Thaksin​ Shinawatra​ មាន​តាំង​នៅ​ខាង​ពួក​បាតុ​ករ​ប្រឆាំង​រដ្ឋា​ភិបាល​នៅ​កណ្តាល​ទី​ក្រុង​បាង​កក ​លើ​បដា ​ផ្ទាំង​រូប​ភាព​ធំៗ​ មួក​ និង​អាវ​យឺត។

អតីត​នាយក​រដ្ឋ​មន្ត្រី​បាន​ថ្លែង​ស្ទើរ​តែ​រាល់​ថ្ងៃ​ទៅ​កាន់​ពួក​បាតុករ​ពាក់​អាវ​ក្រហម​តាម​ប្រព័ន្ធ​ផ្កាយ​រណប ។​ លោក​បាន​លើក​ទឹក​ចិត្ត​យុទ្ធនាការរយៈពេល​៧​សប្តាហ៍​របស់​ពួក​គេ​បង្ខំ​ឲ្យ​នាយក​រដ្ឋ​មន្រ្តី​នា​ពេល​បច្ចុប្បន្ន​ Abhisit​ Vejjajiva​ចុះ​ចេញ​ពី​តំណែង ​ហើយ​ធ្វើ​ការ​បោះ​ឆ្នោត​ថ្មី។

ទោះ​បី​ឋានៈ​របស់​លោក​ជា​មហា​សេដ្ឋី​បណ្តាញ​ផ្សាយ​ព័ត៌មាន​ក៏​ដោយ​ ពួក​កសិករ​និង​ពួក​កម្មករ​រាប់​ពាន់​នាក់​ដែល​បង្កើត​បាន​ជា​ពួក​បាតុករ​មើល​ឃើញ​លោក​ Thaksin​ ថា​ ជា​អ្នក​ជួយ​ជ្រោម​ជ្រែង​របស់​ពួក​គេ។

នៅ​ពេល​ជា​នាយក​រដ្ឋ​មន្រ្តី ​លោក​បាន​ដាក់​ស្នើ​ការ​ថែ​ទាំ​សុខ​ភាព​ដែល​មាន​តម្លៃ​ថោក​ ហើយ​និង​ជួយ​បន្ធូរ​បន្ថយ​បំណុល​ក្នុង​យុទ្ធនា​ការ​ឃោសនា​សាធា​រណៈ​ដ៏​ខ្លាំង​មួយ។

ពួក​អ្នក​រិះ​គន់​លោក​និយាយ​ថា៖​ លោក ​Thaksin ​ជា​ជន​ពុក​រលួយ​និង​ជន​ផ្តាច់​ការ​ ហើយ​និង​ប្រើ​ប្រាស់​អំណាច​របស់​លោក​ហួស​ហេតុ។

លោក​ Pavin ​Chachavalpongpun ​ជា​អ្នក​ស្រាវ​ជ្រាវ​នៅ​វិទ្យា​ស្ថាន​សម្រាប់​ការសិក្សា​ភូមិ​ភាគ​អាស៊ី​អាគ្នេយ៍​របស់​ប្រទេស​សិង្ហ​បូរី ។​ លោក​មាន​ប្រសាសន៍​ថា៖

ការ​យក​ចិត្ត​ទុក​ដាក់​របស់​លោក​ Thaksin​ លើ​តំបន់​ជនបទ​មិន​ធ្លាប់​មាន​កាល​ពី​ពេល​មុន​ដែល​ពួក​អ្នក​គាំទ្រ​របស់​លោក​មិន​បាន​ខ្វល់​ខ្វាយ​ការ​ចោទ​ប្រកាន់​អំពី​អំពើ​ពុក​រលួយ។

«លោក​អ្នក​ដឹង​ទេ ​ទោះ​បី​ពួក​គេ​ដឹង​ថា៖ ​លោក ​Thakisn​ ក៏​ជា​អ្នក​នយោ​បាយពុក​រលួយ​ដែរ​ក៏​ដោយ ​ក៏​ប៉ុន្តែ​បន្ទាប់​មក​ពួក​គេ​និយាយ​ថា៖ ​ហេតុ​អ្វី​យើង​ត្រូវ​ខ្វល់​ខ្វាយ ​នៅ​ពេល​ដែល​គ្មាន​មនុស្ស​ណា​ម្នាក់​ក្នុង​ប្រទេស​ថៃ​មាន​ការ​ស្អាត​ស្អំពិត​ប្រាកដ​សោះ​នោះ។ ​លោក​អ្នក​ដឹង​ទេ​ មាន​ពួក​អ្នក​នយោ​បាយ​ពុក​រលួយ​ច្រើន​ណាស់។ ​ក៏ប៉ុន្តែ​យ៉ាង​ហោច​ណាស់​លោក​ Thaksin​ បាន​ឲ្យ​ប្រាក់​ត្រឡប់​ទៅ​វិញ​ដែរ» ។

ដូច​ជា​អ្នក​គាំទ្រ​របស់​លោក​ដែរ លោក​Thaksin​មក​ពី​ប្រទេស​ថៃ​ភាគ​ខាង​ត្បូង ។

លោក​បាន​ចាប់​តើម​អាជីព​របស់​លោក​ក្នុង​អង្គ​ភាព​ប្រតិ​បត្តិ​ច្បាប់​ដោយ​ដែល​ធ្វើ​ឲ្យ​លោក​បាន​ទទួល​ស្វាមី​ភក្តិ​ពី​ចំណោម​នគរ​បាល ។

លោក​បាន​ប្រមូល​សម្បត្តិ​យ៉ាង​ច្រើន​ក្នុង​ទស​វត្សរ៍​១៩៨០​ ដោយ​ការ​ស្ថាបនា​អាណា​ចក្រ​ទូរ​គមនាគមន៍។ ​ពួក​អ្នក​រិះ​គន់​របស់​លោក​បាន​ចោទ​ប្រកាន់​អំពី​អំពើ​ទុច្ច​រិត​របស់​លោក​ក្នុង​ឆ្នាំ​២០០៦​ នៅ​ពេល​ដែល​ក្រុម​គ្រួសារ​របស់​លោកបាន​លក់​ភាគ​ហ៊ុន​ក្នុង​ទ្រព្យ​សម្បត្តិ​របស់​ខ្លួន​គឺ​ក្រុម​ហ៊ុន ​Shin​ Corporation​ទៅ​ឲ្យ​ពួក​អ្នក​វិនិ​យោគ​ទុន​សិង្ហបូរី។

ការ​លក់​នេះ ​ត្រូវ​បាន​គេ​រិះ​គន់​ថា​ ​ផ្តល់​ឲ្យ​ពួក​បរទេស​ត្រួត​ត្រា​ច្រើន​ពេក​លើ​ គមនាគមន៍​របស់​ប្រទេស​ថៃ ហើយ​និង​អនុញ្ញាត​ឲ្យ​គ្រួសារ​របស់​លោក​ ​Thaksin ​ជៀស​វាង​ការ​បង់​ពន្ធ​តាម​រយៈ​ការ​ធ្វើ​វិសោធន​កម្ម​ច្បាប់​ទូរ​គមនាគមន៍ ។

លោក​ក៏​ត្រូវ​បាន​គេ​រិះ​គន់​ដែរ​ចំពោះ​ការ​រិត​ត្បិត​លើ​បណ្តាញ​ផ្សាយ​ព័ត៌មានហើយ​នឹង​យុទ្ធ​នាការ​ប្រឆាំង​ថ្នាំ​ញៀន​ដែល​នាំ​ឲ្យ​មាន​ការ​សម្លាប់​មនុស្ស​រាប់រយ​នាក់​ក្រៅ​ប្រព័ន្ធ​តុលាការ។

ទោះ​បី​មាន​ការ​ចម្រូង​ចម្រាស់​ក៏​ដោយ ​លោក​ Thaksin​ ត្រូវ​គេ​មើល​ឃើញ​ថា បាន​ផ្តល់​ការ​សន្យា​ដើម្បី​ជួយ​តំបន់​ដាច់​ស្រយាល​ភាគ​ខាង​ជើង​ដោយ​ធ្វើ​ឲ្យ​លោក​បាន​ទទួល​ការ​ជឿ​ទុក​ចិត្ត​ដែល​ពួក​អ្នក​បោះ​ឆ្នោត​ជា​ច្រើន​និយាយ​ថា៖​ ជា​ការ​កម្រ​មាន​ក្នុង​ចំណោម​អ្នក​នយោ​បាយ​ថៃ។

នយោ​បាយ​ប្រជា​និយម​របស់​លោក ​Thaksin​ បាន​ធ្វើ​ឲ្យ​លោក​ជាប់​ឆ្នោត​ពីរ​ដង​ ក៏​ប៉ុន្តែ​របៀប​ដែល​ធ្វើ​ឲ្យ​អ្នក​ដទៃ​ជិន​ឆ្អន់​លោក​ក៏​បាន​បង្កើត​សត្រូវ​ក្នុង​ចំណោមវរ​ជន​កំពុង​កាន់​អំណាច​តាម​របៀប​ប្រពៃណី​របស់​ទី​ក្រុង​បាងកក​ដែរ។

លោក​ Marco​ Bunte​ធ្វើ​ការ​ស្រាវ​ជ្រាវ​អំពី​នយោ​បាយ​ថៃ​នៅ​វិទ្យា​ស្ថាន​ការ​សិក្សាសកល​លោក​និង​តំបន់​ក្នុង​ទី​ក្រុង Hamburg ​ប្រទេស​អាល្លឺម៉ង់។​ លោក​មាន​ប្រសាសន៍​ថា៖ ​ការ​ផ្លាស់​ប្តូរ​បាន​កើត​មាន​ឡើង​នៅ​ពេល​ដែល​លោក​ Thaksin​បាន​ដាក់​ពួក​អ្នក​គាំទ្រ​របស់​លោក​ច្រើន​ពេក​ចូល​ក្នុង​តួនាទី​សំខាន់ៗ​ក្នុង​កង​យោធា​ដែល​ជា​ស្ថាប័ន​ដ៏​មាន​អំណាច​បំផុត​របស់​ប្រទេស​ថៃ​ ដែល​ទទួល​ខុស​ត្រូវ​ការ​ពារ​ប្រទេស​ជាតិ​និង​រាជាធិប​តេយ្យ។

លោក​ Marco​ Bunte​និយាយ​ថា ​ និយាយ​ឲ្យ​ស្រួល​ស្តាប់ ​ លោក ​Thaksin​ មាន​អំណាច​ខ្លាំង​ពេក ។​ ហើយ​វា​ជា​ការ​គ្រោះ​ថ្នាក់​មួយ​ដែល​កង​ទ័ព​ស្ថិត​នៅ​ក្រោម​លោក​Thaksin​ទាំង​ស្រុង​នោះ។​ ហើយ​រឿង​ផ្សេង​ទៀត​អ្វី​ដែល​ស្ថិត​នៅ​ក្រោយ​នោះ​គឺ​ព្រះ​មហា​ក្សត្រ។ ​កង​ទ័ព​ជិត​ស្និទ្ធ​ណាស់​ជា​មួយ​ព្រះ​មហា​ក្សត្រ ។

ក្នុង​ឆ្នាំ​២០០៦ ​កង​ទ័ព​បាន​ទម្លាក់​លោក ​Thaksin។ ​ភ្លាមៗ​បន្ទាប់​ពី​ការ​ទម្លាក់​នោះ​ ពួក​អ្នក​គាំទ្រ​របស់​លោក​ដែល​គេ​ស្គាល់​ថា ​ជា​ពួក​អាវ​ក្រហម​បាន​លេច​ខ្លួន​ជា​លើក​តំបូង ​ដោយ​ធ្វើ​ការ​ថ្កោល​ទោស​អន្តរាគមន៍​របស់​ពួក​យោធា​ដោយអំពាវ​នាវ​ពួក​យោធា​នៅ​ក្រៅ​នយោ​បាយ។

ការ​បោះ​ឆ្នោត​ឆ្នាំ​២០០៧​បាន​ផ្តល់​អំណាច​ដល់​រដ្ឋា​ភិបាល​ដែល​មាន​ការ​ជិត​ស្និទ្ធ​ជា​មួយ​លោក​ Thaksin ​ដែល​ជា​ការ​បញ្ជាក់​អំពី​ការ​បន្ត​មាន​ប្រជាប្រីយ៍​ភាព​របស់​លោក។

ពួក​បាតុករ​ពាក់​អាវ​លឿង​ប្រឆាំង​លោក​ Thaksin​រាប់​ពាន់​នាក់​បាន​ធ្វើ​បាតុ​កម្ម​នៅ​តាម​ផ្លូវ ។​ ពួក​គេ​បាន​កាន់​កាប់​អគារ​សំខាន់ៗ​របស់​រដ្ឋា​ភិបាល​អស់​រយៈ​ពេល​ជា​ច្រើន​ខែ ​ក្នុង​ការ​ប្រឆាំង​តវ៉ា​ដែល​បាន​ឡើង​ដល់​កម្រិត​ខ្ពស់​នៅ​ក្នុង​ការឡោម​ព័ទ្ធ​ចំណត​អាកាស​យាន្ត​ដ្ឋាន​អន្តរ​ជាតិ​ដ៏​សំខាន់​មួយ​របស់​ទី​ក្រុង​បាង​កក​អស់​រយៈ​ពេល​មួយ​អាទិត្យ។

ជា​ទី​បញ្ចប់ ​ការ​កាត់​សេចក្តី​របស់​តុលាការ​ដែល​មាន​លក្ខណៈ​នយោ​បាយ​បាន​ដក​សម្ព័ន្ធ​មិត្រ​របស់​លោក​ Thaksin​ ចេញ​ពី​អំណាច​ក្នុង​ឆ្នាំ​២០០៨។

រដ្ឋ​សភា​បាន​ជ្រើស​រើស​លោក​ Abhisit ​មេ​ដឹក​នាំ​គណ​បក្ស​ប្រជាធិប​តេយ្យ​ឲ្យ​ធ្វើ​ជា​នាយក​រដ្ឋ​មន្រ្តី។ ​គណៈ​រដ្ឋ​មន្រ្តី​របស់​លោក​ រួម​មាន​ពួក​អាវ​លឿង​ជា​ច្រើន​នាក់​ផង។

តុលាការ​បាន​កាត់​ទោស​លោក​ Thaksin ​ឲ្យ​មាន​ទោស​ពី​រឿង​ពុក​រលួយ​ហើយ​នឹង​កាត់​ទោស​លោក​ឲ្យ​ជាប់​គុក​២​ឆ្នាំ។ ​លោក​បាន​រត់​គេច​ខ្លួន ​ហើយ​ចាប់​តាំង​ពី​ពេល​នោះ​មក​ លោក​បាន​ចាក​ចេញ​ពី​ប្រទេស​មួយ​ទៅ​កាន់​ប្រទេស​មួយ​ទៀតដើម្បី​បញ្ចៀស​ការ​ធ្វើ​បត្យា​ប័ន។

ពួក​អ្នក​វិភាគ​និយាយ​ថា៖ ​ចាប់​តាំង​ពី​ពេល​នោះ​មក​ ការ​ប្រឆាំង​តវ៉ា​របស់​ពួកអាវ​ក្រហម​បាន​រីក​រាល​ដាល​ពី​ចលនា​គាំទ្រ​លោក ​Thaksin ​ទៅ​ដល់​ចលនា​មួយដែល​រួម​បញ្ចូល​ទាំង​ជន​ទាំង​ឡាយ​ណា​ដែល​ជិន​ណាយ​ជា​វរ​ជន​ក្នុង​កង​ទ័ពនិង​វណ្ណៈ​ថ្នាក់​កណ្តាល ​ដែល​បាន​រារាំង​លទ្ធិ​ប្រជាធិប​តេយ្យ។

លោក ​Tongchai ​Winichakul ជា​សាស្រ្តា​ចារ្យ​ប្រវត្តិសាស្រ្ត​នៅ​សកល​វិទ្យា​ល័យ​ ​Wisconsin។

លោក​និយាយដូច្នេះ​ថា ​មនុស្ស​ជា​ច្រើន​នៅ​តែ​គិត​ថា៖​ ពួក​បាតុករ​មក​ធ្វើ​បាតុ​កម្ម​នេះ​ ពីព្រោះ​តែ​លោក ​Thaksin​បាន​ផ្តល់​ប្រាក់​ឲ្យ​ពួក​គេ។​ នេះ​ជា​ការ​សើរៗ។​ ពួក​គេ​មិន​បាន​មើល​ឃើញ​ថា៖​ការ​ផ្លាស់​ប្តូរ​មាន​ជម្រៅ​ល្មម​ ហើយ​មិន​មាន​មធ្យោ​បាយ​ណា​ផ្សេង​ទៀត​ទេ​ ពីព្រោះ​តែ​ការ​ផ្លាស់​ប្តូរ​បាន​កើត​ឡើង​រួច​ទៅ​ហើយ។​ មិន​មាន​មធ្យោ​បាយ​ដើម្បី​ដាក់​ពួក​បាតុករ​តំបន់​ជន​បទ​ទាំង​នោះ​ មនុស្ស​តំបន់​ជន​បទ​ទាំង​នោះ​ឲ្យ​ត្រឡប់​ទៅ​កាន់​ស្ថាន​ភាព​នយោ​បាយ​កាល​ពី​១០ - ២០​ឆ្នាំ​មុន​ទេ។​ ខ្ញុំ​គិត​ថា​ មិនអាច​ទៅ​រួច​ទេ។​ ឥឡូវ​នេះ​ពួក​គេ​អំពាវ​នាវ​ឲ្យ​បែង​ចែក​អំណាច​របស់​ពួក​គេ ។​ ដូច្នេះ​ តាម​ទស្សនៈ​របស់​ខ្ញុំ​ គឺ​ជា​ការ​ប្រយុទ្ធ​ដើម្បីសិទ្ធិ​ស្មើ​គ្នា​ ក្រោម​លទ្ធិ​ប្រជាធិប​តេយ្យ ។

រដ្ឋា​ភិបាល​បាន​ស្នើ​ធ្វើ​ការ​បោះ​ឆ្នោត​នៅ​ចុង​ឆ្នាំ​នេះ​ ក៏​ប៉ុន្តែ​ពួក​មេ​ដឹក​នាំ​បាតុ​កម្ម​និយាយ​ថា៖ ​ការ​បោះ​ឆ្នោត​ត្រូវ​ធ្វើ​ឡើង​ក្នុង​រយៈ​ពេល​៣​ខែ។ នៅ​ពេល​ណា​ការ​បោះ​ឆ្នោត​ធ្វើ​ឡើង​ ពួក​បេក្ខ​ជន​អាវ​ក្រហម​ត្រូវ​គេ​រំពឹង​ថា​ នឹង​បាន​ទទួល​ជ័យ​ជំនះ​ រួម​បញ្ចូល​ទាំង​អ្នក​ណា​ដែល​ជិត​ស្និទ្ធ​នឹង​លោក​ Thaksin​ ផង។

ជន​ជាតិ​ថៃ​ជា​ច្រើន​រំពឹង​ថា៖ ​អ្នក​ឈ្នះ​នឹង​បោះ​បង់​ចោល​ការ​កាត់​ទោស​ពុករលួយ​របស់​លោក​Thaksin ​ដោយ​ធ្វើ​ដូច្នេះ​ លោក​អាច​វិល​ត្រឡប់​ទៅ​កាន់​ប្រទេស​ថៃ​វិញ។​ ហើយ​ករណី​នេះ​អាច​នាំ​ពួក​អាវ​លឿង​ត្រឡប់​ទៅ​លើ​ផ្លូវ​វិញ ហើយ​អាច​ធ្វើ​ឲ្យ​ប្រទេស​ធ្លាក់​ចូល​ក្នុង​វិបត្តិ​ម្តង​ទៀត៕

XS
SM
MD
LG