ទិន្នន័យរបស់គណៈកម្មាធិការជាតិរៀបចំការបោះឆ្នោត(គ.ជ.ប) បង្ហាញថា សន្លឹកឆ្នោតមិនបានការ មានប្រមាណ១៦ម៉ឺនសន្លឹកសម្រាប់ការបោះឆ្នោតក្រុមប្រឹក្សាឃុំសង្កាត់ អាណត្តិទី៥ ដែលធ្វើឡើងកាលពីថ្ងៃទី៥ ខែមិថុនា ឆ្នាំ២០២២។
នៅក្នុងសេចក្តីប្រកាសព័ត៌មានមួយចេញផ្សាយនៅថ្ងៃសុក្រនេះ គ.ជ.ប ឱ្យដឹងថាប្រជាពលរដ្ឋប្រមាណ៧លាន៤សែននាក់ គឺស្មើនឹង៨០,៣២%នៃអ្នកមានឈ្មោះក្នុងបញ្ជីបោះឆ្នោតបានចេញទៅបោះឆ្នោត ។ ហើយសន្លឹកឆ្នោតមិនបានការមានចំនួន១៥៧.៣៩០សន្លឹក។
កាលពីការបោះឆ្នោតថ្នាក់ជាតិឆ្នាំ២០១៨ ដែលអវត្តមានគណបក្សប្រឆាំងដ៏ធំ គឺអតីតគណបក្សសង្គ្រោះជាតិ សន្លឹកឆ្នោតមិនបានការ មានប្រមាណ៦០ម៉ឺនសន្លឹក។ នេះបើយោងតាមទិន្នន័យរបស់គ.ជ.ប។
គ.ជ.បឱ្យដឹងថាគណបក្សចំនួន៩ ក្នុងចំណោមគណបក្សនយោបាយចំនួន១៧ ដែលចូលរួមប្រកួតប្រជែងបានទទួលអាសនៈក្រុមប្រឹក្សាឃុំសង្កាត់នៅទូទាំងប្រទេស ដែលសរុបមាន១១.៦២២អាសនៈ។ ក្នុងនោះ គណបក្សប្រជាជនកម្ពុជាទទួលបានអាសនៈ៩.៣៧៦អាសនៈ ប្រមាណ៨០%នៃអាសនៈសរុប។ គណបក្សភ្លើងទៀន ដែលជាគណបក្សប្រឆាំងដ៏ធំមួយ ទទួលបាន២.១៩៨អាសនៈ គឺស្មើប្រមាណ១៨%នៃអាសនៈសរុប។ គណបក្សដទៃទៀតដែលទទួលបានអាសនៈ រួមមានគណបក្សហ៊្វុនស៊ិនប៉ិចទទួលបាន១៩អាសនៈ គណបក្សខ្មែររួបរួមជាតិទទួលបាន១៣អាសនៈ គណបក្សប្រជាធិបតេយ្យមូលដ្ឋានទទួលបាន៦អាសនៈ គណបក្សខ្មែរស្រឡាញ់ជាតិ ទទួលបាន៥អាសនៈ គណបក្សយុវជនកម្ពុជា ទទួលបាន៣អាសនៈ គណបក្សកម្ពុជានិយម ទទួលបាន១អាសនៈ និងគណបក្សសំបុកឃ្មុំសង្គមប្រជាធិបតេយ្យ ទទួលបាន១អាសនៈ។
គណបក្សភ្លើងទៀនធ្លាប់បានប្រកាសថា ខ្លួនទទួលបានតំណែងមេឃុំតែ៤ប៉ុណ្ណោះ ក្នុងចំណោមឃុំសង្កាត់សរុបចំនួន១.៦៥២ទូទាំងប្រទេស។
គ.ជ.ប មិនទាន់បានបង្ហាញចំនួនអ្នកបោះឆ្នោតដែលបានបោះឱ្យគណបក្សប្រជាជនកម្ពុជា និងគណបក្សភ្លើងទៀននៅឡើយទេ។ ស្ថាប័នរៀបចំការបោះឆ្នោតនេះនឹងប្រកាសលទ្ធផលលម្អិត និងផ្លូវការនៅថ្ងៃអាទិត្យ ទី២៦ ខែមិថុនា ឆ្នាំ២០២២៕
