ភ្ជាប់​ទៅ​គេហទំព័រ​ទាក់ទង

ការ​បាញ់​ប្រហារ​នៅ​អារីហ្សូណា​នាំ​ឲ្យ​មាន​ការ​វែកញែក​គ្នា

  • Jim Malone

សមាជិក​សភា​អាមេរិក​ឈរ​ស្មឹង​ស្មាធិ៍​​ចំពោះ​​សហការី​ខ្លួន​​និង​ជន​រង​គ្រោះ​ដទៃ​ទៀត​ដែល​ត្រូវ​បាន​បាញ់​​ប្រហារ​នៅ​ក្នុង​រដ្ឋ​អារីហ្សូណា​កាល​ពី​ពេល​ថ្មីៗ​នេះ។

លោក​ប្រធានាធិបតី​បារ៉ាក់​អូបាម៉ា​ និង​សមាជិក​សភា​បាន​ដឹកនាំ​ការ​ស្មឹង​ស្មាធិ៍​ទូទាំង​ប្រទេស​ដើម្បី​គោរព​វិញ្ញាណ​ក្ខន្ធអ្នក​ដែល​បាន​បាត់បង់​ជីវិត​ និង​សម្តែង​ការ​គោរព​ចំពោះ​អ្នក​រងរបួស​ក្នុង​ការ​បាញ់​ប្រហារ​មិន​រើស​មុខ​នៅ​ រដ្ឋ​អារីហ្សូណា​(Arizona )​ កាលពី​ថ្ងៃ​សៅរ៍​ ដែល​បាន​ធ្វើឲ្យ​លោកស្រី​តំណាង​រាស្ត្រ ​Gabrielle​ Giffords ​រង​របួស​ជាទម្ងន់។ ​ ក្រោយ​ពី​មាន​ព្រឹត្តិការណ៍​បាញ់​ប្រហារ​នោះ​ ពលរដ្ឋ​អាមេរិកាំង​ជាច្រើន​ឆ្ងល់​ថា​ ​តើ​ការ​ដេញ​ដោល​គ្នា​ដោយ​ខឹង​សម្បារ​ខាង​នយោបាយ​ជាតិ​ ក្នុងពេល​ប៉ុន្មាន​ឆ្នាំ​ថ្មីៗ​នេះ​ អាច​មាន​ចំណែក​ក្នុង​សោកនាដ​កម្ម​នេះ​ឬ​យ៉ាង​ណា?

លោក​ប្រធានាធិបតី​អូបាម៉ា​ និង​លោកស្រី​ជំទាវ​ ម៉ីស្ហែល អូបាម៉ា (Michelle Obama)​ បានឈរ​យ៉ាង​ស្ងៀមស្ងាត់​នៅ​សេតវិមាន​ នៅ​ពេល​ដែល​ប្រទេស​ជាតិ​អាមេរិក​ធ្វើ​ពិធី​ស្មឹង​ស្មាធិ៍​គោរព​វិញ្ញាណក្ខន្ធ។

នៅ​វិមាន​រដ្ឋសភា​ ​ប៉ុន្មាន​ផ្លូវ​ប៉ុណ្ណោះ​ពី​សេតវិមាន Emanuel Cleaver​ តំណាងរាស្ត្រ​គណបក្ស​ប្រជាធិបតេយ្យ​និយម​មក​ពី​រដ្ឋមីស៊ូរី ​Missouri​ ដែល​ជា​អ្នក​ប្រដៅ​សាសនា​ផង​នោះ​ បាន​ធ្វើ​ពិធី​បូងសួង​ក្នុង​នាម​តំណាង​រាស្ត្រ​និង​បុគ្គលិក​សភា​តំណាង​រាស្ត្រ​ទាំងអស់។

«យើង​បួងសួង​សូម​ប្រទានពរ​ដល់​ព្រលឹង​ជាតិ​នេះ​ ​សូម​ឲ្យ​ជួយ​យើង​ចាក​ផុត​ពី​ភាព​ខ្មៅ​ងងឹត​នេះ​ ទៅ​រក​ភាព​ភ្លឺស្វាង​ និង​ប្រកប​ដោយ​ក្តី​សង្ឃឹម»។

បន្ទាប់​មក​នៅ​សេតវិមាន​ ​លោក​ប្រធានាធិបតី​បារ៉ាក់​អូបាម៉ា​ បាន​សម្តែង​នូវ​ក្តី​សង្ឃឹម​ថា​ ពលរដ្ឋ​អាមេរិកាំង​នឹង​រួបរួម​គ្នា​ក្រោយពី​មាន​ព្រឹត្តិ​ការណ៍​បាញ់​ប្រហារ​នៅ​រដ្ឋអារីហ្សូណា (Arizona ) ​នេះ។

«ក្នុងពេល​ប៉ុនា្មន​ថ្ងៃ​ខាងមុខ​នេះ​ ​យើង​មាន​រឿង​ច្រើន​ដែល​ត្រូវ​ឆ្លុះ​បញ្ចាំង​មើល​ឡើង​វិញ។ ​នៅ​ពេលនេះ​ ​រឿង​សំខាន់​ដែល​យើង​កំពុង​ធ្វើ​ គឺ​ផ្តល់​យោបល់​របស់​យើង​ និង​បួងសួង​ដល់​អ្នក​រងគ្រោះ​ទាំង​នោះ ​ដោយ​ធានា​ថា​ ​យើង​នឹង​រួបរួម​គ្នា​ក្នុង​សង្គម​ជាតិ​តែមួយ»។

ការ​បាញ់​ប្រហារ​មិន​រើសមុខ​ដែល​បាន​ឆក់​យក​ជីវិត​មនុស្ស៦នាក់ និ​ង​ធ្វើឲ្យ​លោក​ស្រី​តំណាង​រាស្ត្រ ​Giffords​ និង​ជន​រង​គ្រោះ​ជាច្រើន​ទៀត​រង​របួស​នោះ​ បាន​នាំ​ឲ្យ​មាន​ការ​ពិភាក្សា​គ្នា​ទូទាំង​ប្រទេស​ ហើយ​ក្នុង​ករណី​ខ្លះ​មាន​ការ​ជជែក​គ្នា​ខ្លាំងៗថា​ តើ​វោហាស៍​នយោបាយ​វាយ​ប្រហារ​គ្នា​ នៅ​សរអ​ដែល​បាន​ក្លាយ​ទៅ​ជាជា​ធម្មតា​ទៅ​ហើយ​នោះ​ មាន​ចំណែក​ដល់​អំពើ​ហិង្សា​ជា​សក្តានុ​ពល​នេះ​ឬ​យ៉ាងណា។

លោក​ George ​Miller​ គឺ​ជា​អតីត​អភិបាល​ក្រុង​ Tucson​ រដ្ឋ​អារីហ្សូណា (Arizona ) ទី​ដែល​មាន​ការ​បាញ់​ប្រហារ​នោះ។ ​លោក​និយាយ​ថា​ លោក​ជឿថា​ ​បរិយាកាស​នយោបាយ​ជាតិ​ដ៏​អាប់អួរ​ដែល​កើត​មាន​ជា​ញឹកញាប់​នេះ​ ទំនង​ណាស់​ថា​ មាន​ការ​ប៉ះពាល់​ដល់​មនុស្ស​វ័យក្មេង​ Jared Loughner ​ដែល​គេ​សង្ស័យ​ថា​ ​ធ្វើការ​បាញ់​ប្រហារ​នេះ។

«គំនិត​របស់​បុរស​វ័យ​ក្មេង​នេះ​ ដែល​ជា​គំនិត​មិនល្អ​ ពិតជា​មិន​ល្អ​រួច​ទៅ​ហើយ​នោះ​ ​កាន់​តែ​អាក្រក់​ឡើង​ដោយសារ​ការ​ស្អប់គ្នា​ដែល​មាន​ក្នុងការ​ដេញ​ដោល​គ្នា ដែល​យើង​ឮ​ក្នុង​យុទ្ធនាការ​មិន​ចប់​មិន​ហើយ​នេះ​ ហើយ​ចំពោះ​ខ្ញុំ​ ខ្ញុំ​បារម្ភ​ចំពោះ​ប្រទេស​របស់​យើង»។

ក៏​ប៉ុន្តែ​មិនមាន​ភស្តុតាង​បញ្ជាក់​ថា​ ​ជន​ប្រដាប់​អាវុធ​នេះ​ប្រព្រឹត្ត​ការ​បាញ់​ប្រហារ​ដោយសារ​ហេតុ​ផល​នយោបាយ​នោះ​ទេ។

Jon Kyl ​សមាជិក​ព្រឹទ្ធ​សភា​មកពី​រដ្ឋអារីហ្សូណា (Arizona ) បាន​ចូល​ក្នុង​កម្មវិធី​ទូរទស្សន៍ ​Face The Nation​ របស់ទូរទស្សន៍ ​CBS។

«យើង​ពិត​ជា​មិន​ដឹង​ថា​ ​តើ​រឿង​អ្វី​បណ្តាល​ឲ្យ​ក្មេង​នេះ​ធ្វើ​អញ្ចឹង​ទេ។ ​យើង​គ្រាន់​តែ​ដឹង​ថា​ ​ក្មេងនេះ​មាន​បញ្ហា​សុខភាព​ផ្លូវចិត្ត​មិន​នឹង​ន។ ​ប្រហែល​ជា​ឲ្យ​តម្លៃ​ក្មេង​នេះ​ខ្លាំង​ពេក​ហើយ​ ដោយ​និយាយ​ថា​ រឿង​នេះ​ជាប់ទាក់​ទង​នឹង​ទស្សនៈ​នយោបាយ​នោះ»។

អ្នក​ជំនាញ​ខាង​នយោបាយ​និយាយ​ថា​ ពាក្យ​សម្តី​បក្សនិយម​ និង​ប្រកាន់​ម្ខាងៗ​របស់​អ្នក​នយោបាយ​អាមេរិក​ បាន​កើន​ឡើង​ខ្លាំង​អំឡុង​ទសវត្ស​១៩៩០​ ជា​ពិសេស​អំឡុង​ពេល​មាន​ការ​ប៉ះ​ទង្គិច​គ្នា​ផ្នែក​នយោបាយ​ រវាង​លោក​ប្រធានាធិបតី​ប៊ីលគ្លីនតុន​ (Bill Clinton) ​កាល​ណោះ​ និង​តំណាង​រាស្ត្រ​អ្នក​សាធារណរដ្ឋ​និយម៕

ប្រែ​សម្រួល​ដោយ ពិន ស៊ីសុវណ្ណ

XS
SM
MD
LG