សាលាឧទ្ធរណ៍សហព័ន្ធមួយកាលពីថ្ងៃព្រហស្បតិ៍បានបដិសេធមិនឲ្យអនុវត្តឡើងវិញនូវបទបញ្ជារបស់លោកប្រធានាធិបតី ដូណាល់ ត្រាំ ក្នុងការហាមឃាត់មិនឲ្យពលរដ្ឋមកពីប្រទេសកាន់សាសនាឥស្លាមភាគច្រើនទាំង៧ចូលមកកាន់សហរដ្ឋអាមេរិក។
អង្គតុលាការមួយដែលមានចៅក្រម៣នាក់មកពីសាលាឧទ្ធរណ៍អាមេរិកទី៩នៅក្នុងទីក្រុង San Francisco បានសម្រេចជាឯកច្ឆន្ទក្នុងការរក្សាសាលក្រមរបស់សាលាដំបូងដែលព្យួរការហាមឃាត់មិនឲ្យពលរដ្ឋកាន់សាសនាឥស្លាមមកពីប្រទេសទាំង៧ចូលមកសហរដ្ឋអាមេរិក និងអនុញ្ញាតឲ្យអ្នកដំណើរដែលត្រូវបានហាមឃាត់កាលពីមុនអាចចូលមកកាន់សហរដ្ឋអាមេរិកបាន។
លោកប្រធានាធិបតី ដូណាល់ ត្រាំ បានបង្ហោះសារមួយភ្លាមៗក្រោយពីតុលាការបានប្រកាសអំពីសេចក្តីសម្រេចនេះថា «ជួបគ្នានៅតុលាការ ហើយសន្តិសុខនៅក្នុងប្រទេសរបស់យើងកំពុងតែប្រឈមនឹងគ្រោះថ្នាក់ហើយ»។ បន្តិចក្រោយមក លោក ត្រាំ បានត្អូញត្អែរទៅកាន់អ្នកយកព័ត៌មាននៅសេតវិមានថា តុលាការធ្វើ «សេចក្តីសម្រេចដែលមានលក្ខណៈនយោបាយ» ហើយនៅទីបំផុត រដ្ឋបាលរបស់លោកនឹងឈ្នះក្នុងករណីនេះ «ដោយងាយស្រួល»។
នៅក្នុងសន្និសីទសារព័ត៌មានមួយនៅទីក្រុង Seattle លោក Bob Ferguson រដ្ឋអាជ្ញានៃរដ្ឋ Washington ដែលប្រឆាំងនឹងការអនុវត្តបទបញ្ជារបស់លោកប្រធានាធិបតីឡើងវិញបានមានប្រសាសន៍ថា «ប្រទេសយើងមានច្បាប់ ហើយគ្រប់គ្នាត្រូវតែអនុវត្តច្បាប់ទាំងនោះ ហើយប្រធានាធិបតីអាមេរិកក៏ត្រូវអនុវត្តដែរ។ តាមគំនិតរបស់ខ្ញុំ អនាគតរបស់រដ្ឋធម្មនុញ្ញយើងកំពុងតែប្រឈមនឹងបញ្ហាហើយ»៕
