សាលាឧទ្ធរណ៍ នៅថ្ងៃព្រហស្បតិ៍នេះ បានបដិសេធសំណើសុំនៅក្រៅឃុំរបស់លោក ថាច់ សេដ្ឋា អនុប្រធានគណបក្សភ្លើងទៀន ទោះជាមានការបង់ប្រាក់តម្កល់ដើម្បីធានាតាមច្បាប់ក្តី។ នេះបើតាមលោក ជូង ជូងី មេធាវីរបស់លោក ថាច់ សេដ្ឋា ដែលត្រូវបានឃុំខ្លួនកាលពីខែមករា ឆ្នាំ២០២៣ ពីបទចោទពាក់ព័ន្ធនឹងសែកគ្មានប្រាក់។
ក្រោយបញ្ចប់សវនាការនារសៀលថ្ងៃព្រហស្បតិ៍ លោក ជូង ជូងី ប្រាប់វីអូអេថាការសម្រេចរបស់តុលាការ «មិនត្រឹមត្រូវ» ហើយលោកបដិសេធមិនអត្ថាធិប្បាយអ្វីបន្ថែមលើសពីនេះ។
លោកបញ្ជាក់ថា៖ «...យើងសុំតម្កល់ប្រាក់៣ម៉ឺន[ដុល្លារអាមេរិក] ធានាដោះលែងមនុស្សនៅក្រៅឃុំ អញ្ចឹងគេបដិសេធក្នុងន័យមិនទទួលប្រាក់តម្កល់ហើយក៏មិនព្រមដោះលែង»។
លោក ជូង ជូងី បន្ថែមថាលោកនឹងពិភាក្សាជាមួយកូនក្តីរបស់លោក ដើម្បីប្តឹងសាទុក្ខទៅតុលាការកំពូល។
កាលពីថ្ងៃទី១៦ ខែមករា ឆ្នាំ២០២៣ សមត្ថកិច្ចរាជធានីភ្នំពេញបានចាប់ខ្លួនលោក ថាច់ សេដ្ឋា ពីបទល្មើសដែលកើតឡើងកាលពីចុងឆ្នាំ២០១៩ ពាក់ព័ន្ធនឹងការចោទប្រកាន់ចេញសែកអត់ប្រាក់។
តុលាការបញ្ជាក់កាលពីកន្លងទៅថាលោក ថាច់ សេដ្ឋា មិនព្រមចូលខ្លួនតាមដីកាបង្គាប់ឲ្យចូលខ្លួនចំនួនពីរលើក៕
