ខណៈសេដ្ឋកិច្ចចិនដើរយឺត មន្ត្រីពីស្ថាប័នរដ្ឋាភិបាល និងស្ថាប័នឯកជននឹងជួបគ្នាក្នុងសប្តាហ៍នេះនៅទីក្រុង ប៉េកាំង ក្នុងកិច្ចប្រជុំរវាងរដ្ឋមន្ត្រីហិរញ្ញវត្ថុនៃកិច្ចសហប្រតិបត្តិការសេដ្ឋកិច្ចតំបន់អាស៊ីប៉ាស៊ីហ្វិក ហៅកាត់ថា APEC។ ខណៈតួលេខសេដ្ឋកិច្ចថ្មីៗនេះបង្ហាញពីកំណើនដ៏យឺតរបស់ចិន ការពន្លឿនសេដ្ឋកិច្ចជាតិ គឺជារបៀបវារៈដ៏សំខាន់បំផុត។
តម្លៃផលិតផលសរុបក្នុងស្រុករបស់ចិនបានកើនក្នុងអាត្រា៧កន្តក់សញ្ញា៣ភាគរយនៅក្នុងត្រីមាសទី៣នេះ។
នេះគឺជាតួលេខដ៏ទាបបំផុតតាំងពីឆ្នាំ២០០៩មក នៅពេលដែលសេដ្ឋកិច្ចចិនបានកំពុងតែងើបចេញពីវិបត្តិហិរញ្ញវត្ថុពិភពលោក។ អត្រាកំណើននេះក៏ទាបជាងគោលដៅដែលរដ្ឋាភិបាលចិនបានកំណត់។
កំណើនសេដ្ឋកិច្ចយឺតអាចជាបញ្ហាដ៏សំខាន់មួយសម្រាប់កិច្ចប្រជុំក្នុងសប្តាហ៍នេះរបស់រដ្ឋមន្ត្រីហិរញ្ញវត្ថុ APEC នៅទីក្រុង ប៉េកាំង។ រដ្ឋមន្ត្រីហិរញ្ញវត្ថុមកពីប្រទេសជាសមាជិកAPEC ចំនួន២១ប្រទេស មេដឹកនាំអង្គការអន្តរជាតិ និងអ្នកតំណាងជាន់ខ្ពស់មកពីស្ថាប័នឯកជននឹងចូលរួមក្នុងកិច្ចពិភាក្សានេះដែលនឹងចាប់ផ្តើមនៅថ្ងៃចន្ទនេះ។
លោកស្រី Hua Chunying អ្នកនាំពាក្យក្រសួងការបរទេសចិន បានរៀបរាប់ពីគោលបំណងនៃការប្រជុំក្នុងសប្តាហ៍នេះ។
លោកស្រីនិយាយថា ប្រធានបទនៃកិច្ចប្រជុំនេះគឺការកំណត់អនាគតសេដ្ឋកិច្ចតាមរយៈដៃគូសេដ្ឋកិច្ចនៅអាស៊ី។ កិច្ចប្រជុំរវាងរដ្ឋមន្ត្រីហិរញ្ញវត្ថុនឹងសម្រេចឲ្យបាននូវគោលបំណងបី។ លោកស្រី Hua ថា គោលបំណងទី១គឺ ដើម្បីសម្រេចឲ្យបាននូវសេ្ថរភាពសេដ្ឋកិច្ច និងផ្តល់វិភាគទានដល់ការពង្រឹងសេដ្ឋកិច្ចនៅអាស៊ី។ ចិនក៏នឹងបង្ហាញដំណោះស្រាយរបស់ខ្លួនក្នុងការធ្វើកំណែទម្រង់ស៊ីជម្រៅ និងបង្កើតកាលៈទេសៈដ៏សមប្រកបមួយដល់មេដឹកនាំ APEC ដែលនឹងជួបប្រជុំនៅដើមខែវិច្ឆិកានេះ។
គេនៅតែមិនទាន់មានចម្លើយ ថាតើចិនអាចធានាឲ្យបាននូវសេ្ថរភាពហិរញ្ញវត្ថុសម្រាប់តំបន់អាស៊ី ខណៈដែលកំណើនសេដ្ឋកិច្ចរបស់ខ្លួនទំនងនឹងធ្លាក់ចុះ។ ទំនិញ និងតម្លៃអចលទ្រព្យកំពុងតែធ្លាក់ចុះយ៉ាងរហ័ស។ កាលពីមួយទសវត្សមុន អាជ្ញាធរបានប្រើប្រាស់គម្រោងហេដ្ឋារចនាសម្ព័ន្ធរដ្ឋដ៏ធំ ដើម្បីរក្សាកំណើនសេដ្ឋកិច្ច នៅពេលដែលតម្រូវការនាំចេញពិភពលោកថយចុះ។ ប៉ុន្តែមួយឆ្នាំមុននេះ មន្ត្រីរដ្ឋាភិបាលបាននិយាយថា ខ្លួនកំពុងតែព្យាយាមបន្តធ្វើកំណែទម្រង់សេដ្ឋកិច្ចដ៏ធំ ជាជាងអនុវត្តគោលនយោបាយសំដៅយកកំណើនសេដ្ឋកិច្ចក្នុងរយៈពេលខ្លី។
កាលពីដើមឆ្នាំនេះ លោកនាយករដ្ឋមន្ត្រី Li Keqiang បាននិយាយថា កំណើនសេដ្ឋកិច្ចយឺតជាងមុនគឺជាផ្នែកមួយនៃគម្រោងរបស់រដ្ឋាភិបាលចិនដើម្បីសង្កត់ធ្ងន់លើកំណែទម្រង់សម្រាប់ការអភិវឌ្ឍសេដ្ឋកិច្ចដ៏លឿន។ លោកនាយករដ្ឋមន្ត្រី និងមេដឹកនាំរដ្ឋាភិបាលផ្សេងៗបានសន្យាថានឹងកាត់បន្ថយបំណុលរបស់រដ្ឋាភិបាល និងបង្កើនការប្រើប្រាស់ទំនិញក្នុងស្រុក។
លោក Wang Dong គឺជាសាស្ត្រាចារ្យនៅសាកលវិទ្យាល័យ ប៉េកាំង។ លោកនិយាយថា៖
“ខ្ញុំយល់ថា សេដ្ឋកិច្ចរបស់ចិនដើរយឺត ពីព្រោះនេះគឺជាការចាំបាច់ដែលមេដឹកនាំចិនយកចិត្តទុកដាក់លើគុណភាពនៃកំណើន ជាជាងបរិមាណនៃកំណើនសេដ្ឋកិច្ច ហើយខ្ញុំគិតថានេះគឺជារឿងត្រឹមត្រូវ ហើយនេះគឺជាទិសដៅមួយដែលចិនគួរតែដើរទៅរក”។
សប្តាហ៍នេះ រដ្ឋមន្ត្រីហិរញ្ញវត្ថុ APEC ក៏នឹងពិភាក្សាអំពីសំណើរបស់ធានាគារអភិវឌ្ឍហេដ្ឋារចនាសម្ព័ន្ធអាស៊ីរបស់ចិន ដែលអាចជាដៃគូប្រឆាំងនឹងធានាគារពិភពលោកនាពេលអនាគត។ ធានាគារនេះអាចនឹងផ្តល់មូលនិធិសម្រាប់គម្រោងហេដ្ឋារចនាសម្ព័ន្ធនៅអាស៊ី ហើយចិនបានធ្វើការបញ្ចុះបញ្ចូលប្រទេសដទៃទៀតឲ្យចូលរួមជាថវិកាក្នុងគម្រោងរដ្ឋាភិបាលប៉េកាំង ដែលមានទឹកប្រាក់ចំនួន៥០ពាន់លានដុល្លារសម្រាប់គម្រោងមូលនិធិដំបូង។
ប៉ុន្តែគម្រោងនេះទទួលបានការរិះគន់ពីក្រសួងរតនាគារសហរដ្ឋអាមេរិកអំពីសក្តា នុពលរបស់គម្រោងនេះដែលអាចនឹងប៉ះពាល់ឥទ្ធិពលរបស់ធានាគារពិភពលោក និងធានាគារអភិវឌ្ឍអាស៊ី។ អាជ្ញាធរសហរដ្ឋអាមេរិកក៏បាននិយាយថាធានាគារនេះអាចនឹងខ្វះបទដ្ឋានបរិយាកាសបំពេញការងារ និងកត្តាការពារផ្សេងទៀតដែលតាមធម្មតាគ្រប់គ្រងគម្រោងផ្តល់ប្រាក់កំច្ចីដោយស្ថាប័នអន្តរជាតិធំៗ។
ប៉ុន្តែចំណាប់អារម្មណ៍លើគម្រោងអភិវឌ្ឍក្នុងតំបន់អាស៊ីនៅតែខ្ពស់ដដែល ហើយលោកសាស្ត្រចារ្យ Dong និយាយថាប្រទេសផ្សេងៗក្នុងតំបន់អាចនឹងមិនជំទាស់រដ្ឋាភិបាលទីក្រុង វ៉ាស៊ីនតោន ទេ។
លោក Dong ថា៖
“ខ្ញុំយល់ថាការជំទាស់ពីសហរដ្ឋអាមេរិកមិនមែនជារឿងត្រឹមត្រូវទេ ហើយវាមិនមានប្រយោជន៍ទៀត។ ខ្ញុំយល់ថាប្រទេសភាគច្រើននៅតំបន់អាស៊ីខាងកើតមិនយល់ឃើញដូចសហរដ្ឋអាមេរិកទេ។ ហើយខ្ញុំក៏យល់ថា សហរដ្ឋអាមេរិកអាចនឹងផ្តល់ទស្សនៈមានប្រយោជន៍ជាងនេះ មានឥរិយាបថមិនសូវរឹងទទឹង ហើយព្យាយាមជួយ និងធ្វើឲ្យប្រសើរឡើង ពីព្រោះថាគម្រោងធានាគារនេះគឺពិតជាផ្នែកបន្ទាប់បន្សំជួយដល់ស្ថាប័នហិរញ្ញវត្ថុដែលមានស្រាប់”។
កិច្ចប្រជុំរបស់រដ្ឋមន្ត្រីហិរញ្ញវត្ថុនៅសប្តាហ៍នេះប្រារព្ធឡើងស្របពេលនឹងកិច្ចប្រជុំ Fourth Plenum របស់ចិន ដែលជាកិច្ចប្រជុំរបស់គណៈកម្មាការអចិន្ត្រៃយ៍ដ៏មានអំណាចរបស់ចិន។ របៀបវារៈដ៏សំខាន់សម្រាប់កិច្ចប្រជុំ Plenum នេះនឹងផ្តោតលើបញ្ហាពីរដែលធ្វើឲ្យសេដ្ឋកិច្ចជាតិរបស់ចិនដើរយឺតគឺ អំពើពុករលួយ និងការខ្វះនិតិវិធី៕
ប្រែសម្រួលដោយ ទែន សុខស្រីនិត
