កាលពីព្រឹកថ្ងៃពុធនេះ គណៈកម្មាធិការប្រយុទ្ធប្រឆាំងផលិតផលក្លែងក្លាយ បានបើកវគ្គបណ្តុះបណ្តាលបន្ថែមដល់មន្រ្តីរបស់ខ្លួន និងបានអំពាវនាវឲ្យប្រជាពលរដ្ឋរាយការណ៍ទៅសមត្ថកិច្ចអំពីសកម្មភាពល្មើសពាក់ព័ន្ធនឹងផលិតផលក្លែងក្លាយ ឬខូចគុណភាព។ សង្គមស៊ីវិលដែលធ្វើការលើសុវត្ថិភាពចំណីអាហារ លើកឡើងថា រដ្ឋាភិបាលត្រូវពង្រឹងប្រព័ន្ធច្បាប់ដើម្បីធានាដល់ការត្រួតពិនិត្យ និងគ្រប់គ្រងការនាំចូលទំនិញទាំងនោះឲ្យទទួលបានប្រសិទ្ធភាព។
គណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ នៅថ្ងៃពុធនេះ បានអំពាវនាវឲ្យមានការចូលរួមពីប្រជាពលរដ្ឋ ដោយរាយការណ៍ទៅសមត្ថកិច្ច អំពីទីតាំងផលិត សកម្មភាព ឬផលិតផលក្លែងក្លាយនានា ដែលបង្កគ្រោះថ្នាក់ខ្ពស់ដល់សុខភាព និងសុវត្ថិភាពសង្គម ដើម្បីសមត្ថកិច្ចអាចចាត់វិធានការលើជនល្មើសបានទាន់ពេល។
លោក មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ ថ្លែងបែបនេះក្នុងវគ្គបណ្តុះបណ្តាលស្តីពីការស្រាវជ្រាវ និងស៊ើបអង្កេតពាក់ព័ន្ធនឹងការប្រយុទ្ធប្រឆាំងផលិតផលក្លែងក្លាយ នៅព្រឹកថ្ងៃទី១៦ ខែសីហា។ លោកលើកឡើងថា ផលិតផលក្លែងក្លាយមួយចំនួនដែលកំពុងចរាចរលើទីផ្សារមានដូចជា ឱសថ គ្រឿងសម្អាង ភេសជ្ជៈ និងគ្រឿងបរិភោគ ព្រមទាំងគ្រឿងបរិភោគ ដែលលាយសារធាតុគីមីជាដើម កំពុងធ្វើឲ្យប៉ះពាល់ដល់សុខភាពធ្ងន់ធ្ងរ ទាំងក្នុងរយៈពេលខ្លី និងរយៈពេលវែង។ លោកបន្ថែមថា ប្រជាពលរដ្ឋត្រូវមានការប្រុងប្រយ័ត្នរាល់ការប្រើប្រាស់ផលិតផល ដែលកំពុងដាក់លក់លើទីផ្សារ និងត្រូវជូនដំណឹងមកសមត្ថកិច្ច ប្រសិនបើសង្ស័យថា មានករណីផលិត និងនាំចូលផលិតផលក្លែងក្លាយទាំងនោះ ដើម្បីសមត្ថកិច្ចចាត់វិធានការលើជនល្មើសឲ្យបានទាន់ពេល។
លោកមៀច សុផាន់ណា អំពាវនាវយ៉ាងដូច្នេះ៖ «ប្រជាពលរដ្ឋ អ្នកប្រើប្រាស់ ក៏ដូចជាក្រុមហ៊ុនដែលនាំចូលរបស់ពិតប្រាកដ ដែលមានគុណភាព ប្រសិនបើមានព័ត៌មានអី គឺសហការជាមួយគណៈកម្មាធិការ។ យើងនឹងប្រឹងប្រែងឲ្យពេញទំហឹងដើម្បីប្រយោជន៍ប្រជាពលរដ្ឋ ដើម្បីប្រយោជន៍អ្នកប្រើប្រាស់ ក៏ដូចប្រយោជន៍អ្នកផលិត និងអ្នកដែលធ្វើ Business [អាជីវកម្ម] ដើម្បីឲ្យគាត់មានឱកាសធ្វើ Business [អាជីវកម្ម] ប្រកបរបរ មុខជំនួញដោយជោគជ័យ ដោយមិនឲ្យយកប្រៀបធ្វើឲ្យខូចផលប្រយោជន៍អ្នកផលិត តាមរយៈការក្លែងក្លាយផលិតផលរបស់គាត់នោះទេ»។
មន្ត្រីរូបនេះ ក៏បានឲ្យដឹងផងដែរថាផលិតផលក្លែងក្លាយមួយចំនួន ក៏អាចបង្ករឱ្យកើតជាជំងឺមហារីក និងប៉ះពាល់សុខភាពរយៈពេលយូរផងដែរ។
«យើងហូបទៅមានការវិលមុខ មានការក្អួតចង្អោរ លាបប៉ះគ្រឿងសម្អាងនេះវាឡើងកន្ទួល ដែលយើងថាចេញអេលែកហ្ស៊ី ចេញប្រតិកម្ម ហើយអាហ្នឹងគឺជាប្រតិកម្មរយៈពេលខ្លី។ រយៈពេលវែង វាធ្វើឲ្យប៉ះពាល់ដល់សុខភាព ធ្វើឲ្យប៉ះពាល់ដល់គ្រលៀន ដល់ថ្លើម បង្កជាមហារីក បង្កជាមេរោគផ្សេងៗដូចដែលយើងស្តាប់ឮ ហើយវាមានបាតុភាពនៃជំងឺប្លែកៗ ចេញគីសក្នុងនេះក្នុងនោះទៅ ក្នុងខួរក្បាលក៏មាន អីក៏មាន»។
បើតាមប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយឲ្យដឹងថា រយៈពេល៧ខែ ក្នុងឆ្នាំ២០១៧នេះ សមត្ថកិច្ចបានផ្អាកការចែកចាយផលិតផលមួយចំនួនក្នុងទីផ្សារ ប្រមាណជាជិត២០០តោន។ ក្នុងនោះមានផលិតផលថ្នាំពេទ្យ គ្រឿងសម្អាង និងផលិតផលអាហារជាដើម។
គណៈកម្មាធិការប្រយុទ្ធប្រឆាំងផលិតផលក្លែងក្លាយ បានអំពាវនាវឲ្យសាធារណជនផ្តល់ព័ត៌មានអំពីទីតាំងផលិត ឬជនដែលផលិត ចែកចាយផលិតផលក្លែងក្លាយធ្វើឲ្យប៉ះពាល់ធ្ងន់ធ្ងរដល់សុខភាព និងសុវត្ថិភាពសង្គម តាមរយៈទូរស័ព្ទលេខ ០៨១ ៩៩៩ ៨០៨ ឬតាមរយៈអ៊ីមែល info@ccc.gov.kh ឬតាមទំព័រហ្វេសប៊ុករបស់គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលរាល់ការជូនដំណឹងនឹងត្រូវបានរក្សាការសម្ងាត់។
លោក ស ម៉ូរ៉ា ប្រធានសហព័ន្ធសហជីពចំណីអាហារ និងសេវាកម្មកម្ពុជាប្រាប់ VOA ថា លោកសាទរចំពោះការពង្រឹងបន្ថែមលើការគ្រប់គ្រងផលិតផលក្លែងក្លាយ និងខូចគុណភាពនេះ។ ទោះជាយ៉ាងណាលោកថា ចំណីអាហារ និងផលិតផលដែលធ្វើឲ្យប៉ះពាល់ដល់សុខភាពកំពុងចរាចរជាច្រើនលើទីផ្សារ ដោយសារការគ្រប់គ្រងការនាំចូលទំនិញខូចគុណភាពទាំងនោះនៅមានភាពខ្វះចន្លោះនៅឡើយ។
លោក ស ម៉ូរ៉ា បញ្ជាក់ថា៖
«ប្រហែលជាមានបញ្ហាអំពើពុករលួយ ឬក៏អីផ្សេងៗនៅលើបញ្ហាហ្នឹងបានជារឿងហ្នឹងនៅតែកកើតឡើងដដែលៗ។ ហើយការអនុវត្តន៍ច្បាប់កន្លងមកក៏ប្រហែលជាយើងដាក់ទោសទណ្ឌវាស្ទើរពេកទៅដល់មន្រ្តីជនល្មើសហ្នឹង ឬក៏ក្រោយពីចាប់ខ្លួនអីអញ្ចឹងទៅ គាត់មិនបានដាក់ទោសទណ្ឌ គាត់នៅតែរួចខ្លួនដដែល។ អញ្ចឹងហើយអ្នកផលិតនូវទំនិញ ឬក៏ផលិតផលក្លែងក្លាយ ឬក៏អ្នកដែលនាំចូលទំនិញ ឬក៏ផលិតផលក្លែងក្លាយ គេនៅតែបន្តនាំដដែល»។
លោក ស ម៉ូរ៉ា បន្ថែមថា រដ្ឋាភិបាលត្រូវពង្រឹងបន្ថែមនូវសមត្ថភាពរបស់សមត្ថកិច្ចថ្នាក់ក្រោម និងប្រព័ន្ធច្បាប់ ដើម្បីធានាដល់ការត្រួតពិនិត្យ និងគ្រប់គ្រងការនាំចូលទំនិញទាំងនោះឲ្យទទួលបានប្រសិទ្ធភាព៕
