យោធាចិនបានបញ្ជាក់នៅថ្ងៃចន្ទនេះថា ខ្លួនបានធ្វើសមយុទ្ធបន្ថែមទៀតនៅជិតកោះតៃវ៉ាន់នៅថ្ងៃចន្ទនេះ ស្របពេលដែលសមាជិកសភាសហរដ្ឋអាមេរិកមួយក្រុមបានធ្វើទស្សនកិច្ចទៅកាន់កោះតៃវ៉ាន់និងបានជួបជាមួយនឹងប្រធានាធិបតីតៃវ៉ាន់អ្នកស្រី Tsai Ing-wen។ រដ្ឋាភិបាលចិនថា ទស្សនកិច្ចនេះគឺជាការរំលោភលើអធិបតេយ្យភាពរបស់ខ្លួន។ នេះបើយោងតាមទីភ្នាក់ងារព័ត៌មាន Reuters។
សមាជិកសភាសហរដ្ឋអាមេរិក ៥ រូប ដែលដឹកនាំដោយលោក Ed Markey ដែលជាសមាជិកព្រឹទ្ធសភាខាងគណបក្សប្រជាធិបតេយ្យតំណាងរដ្ឋ Massachusetts បានធ្វើដំណើរទៅដល់កោះតៃវ៉ាន់ក្នុងទស្សនកិច្ចដែលមិនប្រកាសឱ្យដឹងជាមុនកាលពីយប់ថ្ងៃអាទិត្យ។
ដំណើរទស្សនកិច្ចរបស់សមាជិកសភាអាមេរិកលើកនេះគឺជាដំណើរទស្សនកិច្ចជាន់ខ្ពស់លើកទី ២ ទៅកាន់កោះតៃវ៉ាន់ បន្ទាប់ពីប្រធានរដ្ឋសភាអាមេរិកអ្នកស្រី Nancy Pelosi បានធ្វើទស្សនកិច្ចទៅទីនោះកាលពីដើមខែសីហាមក។
បញ្ជាការដ្ឋានភូមិភាគខាងកើតនៃយោធារំដោះប្រជាជនចិន ដែលជាកងយោធាទទួលខុសត្រូវសម្រាប់តំបន់ដែលស្ថិតនៅជិតកោះតៃវ៉ាន់ បានបញ្ជាក់ថា ខ្លួនបានរៀបចំការយាមល្បាតចម្រុះផ្នែកដើម្បីត្រៀមខ្លួនប្រយុទ្ធនិងសមយុទ្ធប្រយុទ្ធនៅដែនសមុទ្រនិងដែនអាកាសនៅជុំវិញកោះតៃវ៉ាន់នៅថ្ងៃចន្ទនេះ។
កងយោធាចិននេះបានបន្ថែមថា សមយុទ្ធទាំងនេះគឺជា «ការកម្លាដ៏ខ្លាំងក្លាចំពោះសហរដ្ឋអាមេរិកនិងតៃវ៉ាន់ដែលនៅបន្តលេងល្បិចនយោបាយនិងធ្វើឱ្យអន្តរាយដល់សន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់»។
ក្រសួងការពារជាតិតៃវ៉ាន់បានលើកឡើងនៅក្នុងសេចក្ដីថ្លែងការណ៍ដាច់ដោយឡែកពីនេះថា ដំណើរទស្សនកិច្ចរបស់ក្រុមសមាជិកសភាអាមេរិកនេះបានរំលោភលើអធិបតេយ្យភាពនិងបូរណភាពទឹកដីរបស់ចិន និង «បង្ហាញឱ្យឃើញនូវមុខមាត់ពិតប្រាកដថា សហរដ្ឋអាមេរិកជាអ្នកបំពុលបរិយាកាសសន្តិភាពនិងស្ថិរភាពនៅច្រកសមុទ្រតៃវ៉ាន់»។
នាយករដ្ឋមន្ត្រីតៃវ៉ាន់លោក Su Tseng-chang បាននិយាយថា តៃវ៉ាន់នឹងមិនខ្លាចរអាជាមួយនឹងការឆ្លើយតបរបស់ចិនចំពោះដំណើរទស្សនកិច្ចរបស់មិត្តភក្តិបរទេសដូចនេះរបស់តៃវ៉ាន់នោះទេ៕
