ភ្ជាប់​ទៅ​គេហទំព័រ​ទាក់ទង

លោក ​John Boehner ​ត្រូវ​គេ​រំពឹងថា​ នឹង​ក្លាយ​​ទៅ​ជា​ប្រធាន​រដ្ឋ​សភា​ថ្មី 


តំណាង​រាស្រ្ដ​ពី​គណបក្ស​សាធារណរដ្ឋ ​លោក ចន បេនណឺរ ដែល​ត្រូវ​គេ​រំពឹង​ថា នឹង​ក្លាយជា​ប្រធាន​សភា​តំណាងរាស្រ្ត​អាមេរិក​។

វិមានសភាកាពីតូល៖ ជ័យជំនះ​ច្រើនលើសលប់របស់គណបក្សសាធារណរដ្ឋនិយម​ក្នុង​ការ​បោះឆ្នោត​ពាក់​កណ្ដាល​អណត្ដិ ​កាល​ពី​ថ្ងៃអង្គារ នឹង​នាំ​គណបក្ស​នោះ​ឲ្យ​ទទួល​បាន​ការ​ត្រួតត្រា​នៅ​ក្នុង​រដ្ឋសភា​ជំនួស​ក្រុម​ប្រជាធិបតេយ្យ​ នៅ​ពេល​ដែល​រដ្ឋសភាបើក​សម័យ​ប្រជុំ​នៅ​ខែមករា។ មេ​ដឹក​នាំ​សម្លេង​ភាគ​តិច​នៃ​គណបក្ស​សាធារណរដ្ឋ ​លោក ចន បេនណឺរ​ (​John Boehner) ​បាន​ត្រូវ​គេ​រំពឹង​ថា ​នឹង​ក្លាយទៅ​ជា​ប្រធាន​រដ្ឋ​សភា​ថ្មី។ ​អ្នក​វិភាគ​នយោបាយនិយាយ​ថា ​លោក​ បេនណឺរ ​នឹងក្លាយ​ទៅ​ជា​មន្ដ្រី​បំរើ​សាធារណជន​ដ៏​មាន​ឥទ្ឋពល​ខ្លាំងម្នាក់​នៃ​ក្រុមអភិរក្ស​និយម​ ត​ទល់នឹង​ប្រធានា​ធិបតី ​បារ៉ាក់ ​អូបាម៉ា ​នឹង​ក្រុម​ប្រជាធិបេតយ្យ​និយមនៅ​ក្នុង​រដ្ឋសភា​។

នៅ​ក្នុង​ជីវប្រវត្ដិ​តាម​ផ្លូវ​ការ​សរសេរ​ចុះនៅ​ក្នុង​រដ្ឋសភា អ្នកតំណាង​រាស្រ្ដ​ពី​គណបក្ស​សាធារណរដ្ឋ ​លោក ចន បេនណឺរ បាន​ពិពណ៌នា​ខ្លួន​លោក​ថា ​ជា​អ្នក ​”និយាយ​ចំ​ៗ មិន​លំអៀង​ ហើយ​ជា​អ្នក​គំា​ទ្រ​សេរីភាព​ និង​សន្ដិសុខ​ ដោយ​មិន​មាន​ចិត្ដ​នឿយណាយ។

អតីត​ពាណិជ្ជករ​អាយុ ​៦០​ ឆ្នាំរូប​នេះ​ ​ ច្រើន​តែ​និយាយ​រំឮក​អ្នក​កាន់​សន្លឹក​ឆ្នោត​អំពី​ដើម​កំណើតដ៏​ស្រគត់​ស្រគំរ​បស់​លោក។​ លោក​កើត​ក្នុងទី​ក្រុង ​ស៊ីនស៊ីណាទី (Cincinnati)​ រដ្ឋ​អូហៃយូ​ ហើយ​ជា​កូន​ប្រុស​ម្នាក់​ក្នុង​ចំណោម​បង​ប្អូន​ប្រុស​ស្រី​ ១២​ នាក់ ​ដែល​ជួយ​ឪពុក​របស់​គេ​ ក្នុង​បានិយដ្ឋាន​របស់​សហគមន៍​ ។

លោក បេនណឺររៀបរាប់​រឿង​ដូច្នេះ​ នៅ​ក្នុង​សន្ទរក​ថា​ជ័យជំនះ ដោយ​មាន​សម្លេង​ក្ដុក​ក្កួល​កាល​ពី​យប់ថ្ងៃ​អង្គារ ​ក្រោយ​ពី​បាន​ទទួល​ជ័យជំនះ​ម្ដង​ទៀត​ក្នុង​ការ​បោះឆ្នោត ​ជ្រើស​រើស​តំណាងរាស្រ្ដ​។

«ខ្ញុំ​បាន​ចំណាយ​ពេល​ក្នុង​ជីវិត​ទាំង​ស្រុង​របស់​ខ្ញុំ​ ដើម្បី​តាម​ស្វែងរក​សេរីភាព ​សមភាព ​និងឱកាស ​ដែលពលរដ្ឋអាមេរិកាំង​គ្រប់​រូបចង់​បាន។ ខ្ញុំ​ហ៊ានភ្នាល់ថា ​អ្នក​ទាំង​អស់​គ្នា​ភាគ​ច្រើន​ ដឹង​អំពី​ការងារ​ដំបូង​របស់​ខ្ញុំ ​គឹ​បោស​សំអាត​ ​ជូតក្ដា​ រត់តុ និង​លក់ស្រា​ នៅ​ក្នុង​បានិយដ្ឋាន​ឪពុក​របស់​ខ្ញុំ​»។

ក្រោយ​ពី​ទទួល​សញ្ញាប័ត្រ​ចេញ​ពី​សកលវិទ្យាល័យ ​លោក បេនណឺរ ​បាន​ធ្វើ​ការ​ក្នុង​ឧស្សហកម្ម​គ្រឿងផ្លាស្ទិក​ រួច​បំរើ​នៅ​ក្នុង​អង្គការ​និតិបញ្ញត្ដិ​របស់​រដ្ឋ​អូហៃយ៉ូ រួចមក​លោក​បាន​ត្រូវជ្រើសតាំង​ជា​តំណាង​រាស្រ្ដ ​សរអ ​នៅ​ឆ្នាំ ​១៩៩០ ​។

នៅ​ក្នុង​រដ្ឋសភា ​លោក ​បេនណឺរ បាន​ជួយ​រៀបចំ​សរសេរ​ព្រាង ​អ្វី​មួយ​ដែល​ហៅ​ថា​ “ កិច្ចសន្យា​ជា​មួយ​សរអ ​“ ដឹក​នាំ​ដោយ​អតីត​ប្រធាន​រដ្ឋសភា​នៅ​ពេល​នោះ​ គឺ​លោក​ ណូត ហ្កីងរីច (Newt Gingrich)។ នៅ​ក្នុង​ឆ្នាំ​១៩៩៤​ លោក ​ហ្កីងរីច​ បើក​យុទ្ធនាការ​កាត់បន្ថយការ​ចំណាយ​របស់​រដ្ឋាភិបាល​ របស់​អតីត​ប្រធានាធិបតី​ លោក ប៊ីល គ្លីនតុន (Bill Clinton) ជំរុញ​ឲ្យ​រដ្ឋាភិបាល​សហព័ន្ឋ​បិទទ្វារ​បណ្ដោះ​អាសន្ន​។ អ្នកវិភាគ​នយោបាយនិយាយ​ថា ​ព្រឹត្ដការណ៍​នោះ​ បាន​នាំ​ឲ្យ​មាន​ផលវិបាក​ដល់​លោក ហ្កីងរីច ​និងក្រុម​សាធារណរដ្ឋ​និយម​។ រួច​លោក ប៊ីល គ្លីនតុន ​ក៏​បាន​ត្រូវ​ជាប់​ឆ្នោត​ជា​ប្រធានាធិបតី​ម្ដងទៀត ​ពីរ​ឆ្នាំ​ក្រោយមក​។

អ្នក​វិភាគ​នយោបាយ​ លោក​ ឡារី សាបាតូ (Larry​ Sabato)​ ថ្លែង​ថា ​លោក បេនណឺរ​ គួរ​យក​រឿង​នេះ​ជា​មេរៀន​ និង​យក​មេរៀន​ពី​ថ្នាក់​ដឹកនាំ​ប្រកាន់​បក្សពួក​តាមរបៀប​ប្រធាន​រដ្ឋភា​បច្ចុប្បន្ន ​លោកស្រី ​ណាន់ស៊ី ប៉េឡូស៊ី (Nancy Pelosi)​។

«ខ្ញុំ​យល់​ថា ​បើ​លោក​ បេនណឺរ ​មាន​ប្រាជ្ញាវាងវៃ​ លោក​នឹងរៀន​អំពី​មហន្ដរាយ ​កើត​ឡើង​ចេញ​ពី​លោក ​ណូត ហ្កីងរីច និង​ លោកស្រី ​ណាន់ស៊ី ប៉េឡូស៊ី​ ហើយ​លោក​នឹង​រក្សា​ភាព​មិន​ចេញ​មុខ​ ប្រកាន់ឥរិយាបថ​សមរម្យ​។ យើង​នឹង​ដឹង​អំពី​ថា ​តើ​លោក​ឆ្លាត ​ឬ​ទេ​។ ​គេ​និយាយ​ថា​ លោកឆ្លាត​វាងវៃ​ណាស់​។ បើ​លោកពិត​ជា​ឆ្លាត​មែន លោក​នឹង​ទប់​ចិត្ដ​មិន​ចង់​ធ្វើ​ជា​អ្នក​ល្បី​ទេ​ ដែល​ជាប់​មក​ជាមួយ​តំណែង​របស់​លោក​នោះ»។

អ្នក​សាធារណរដ្ឋនិយមដែល​ស្គាល់​លោក បេនណឺរ រៀបរាប់​ថា លោក​ជា​អ្នក​រៀប​ចំ​យុទ្ឋសាស្រ្ដ​នៅ​ក្រោយ​វាំងននមិន​ចេញ​មុខ​ ហើយ​មិន​មែន​ជា​មេ​ដឹក​នាំ​មាន​ទស្សនៈ ​មើល​ឆ្ងាយ ​ដូច​លោក ហ្កីងរិច ​នោះ​ទេ​ ។

បណ្ណាធិការ​របស់​ទស្សនវដ្ដី​ប្រចាំ​សប្ដាហ៍​របស់រដ្ឋសភា (​Congressional Quarterly Weekly)​ លោក ​ដេវីឌ ហកឃីង (David Hawkings) ​ថ្លែង​ថា ​លោក​ បេនណឺរ ​ជា​អ្នក​និយមការ​សម្រុះសម្រួល​។

លោក ​ចន បេនណឺរ ដែល​បាន​ធ្វើ​សហ​ការ​ជា​មួយ​អតីត​ព្រឹទ្ឋ​សមា​ជិក​ពីរដ្ឋ​ ម៉ាសាឈូសេតស៍ (Massachusetts) លោក ថេដ កេណ្ណឺឌី (Ted ​Kennedy)​ និង​តំណាងរាស្ដ្រ​នៃគណបក្ស​ប្រជាធិបតេយ្យពី​រដ្ឋ ​កាលីហ្វ័រញ៉ា (California) លោក ចច ម៊ីលឡឺរ (George Miller) និង​អតីត​ប្រធានាធិបតីពីគណបក្ស​សាធារណរដ្ឋនិយម លោក ចច ដាប់ប៊ែលយូ ប៊ូស (​George​ W. Bush) កាល​ពី​១០​ ឆ្នាំមុន ​ ដើម្បី ​រុះរើ​ប្រព័ន្ឋ​អប់រំ​ធំធេង​ ហៅ “​មិន​ទុក​ចោល​សិស្ស​ណា​នៅ​ក្រោយ​” ​ដែលជា​សមិទ្ឋិ​ប្រវត្ដិសាស្រ្ដមួយ​នៃ​ការ​មិន​ប្រកាន់​បក្សពួក​ កាល​ពី​បុន្មាន​ឆ្នាំថ្មី​ៗ​នេះ​។ លោក ​ចន បេនណឺរ យល់​ដឹង​អំពី​របៀប​សម្រប​សម្រួល​គ្នា​។ តែ​លោក​នឹង​ឋឹត​នៅ​ក្នុង​ការ​កៀប​សង្កត់​ខ្លាំង មិន​ឲ្យ​មាន​ការ​សម្របសម្រួល​គ្នា​ពី​ក្រុម​សមាជិកសាធារណរដ្ឋនិយម​ថ្មីៗ ដែល​មាន​កំហឹង​ខ្លាំង ​ទើប​នឹង​ចូល​មក​ឋឹត​នៅ​ក្រោមការ​គ្រប់គ្រង​របស់​លោក​។

អ្នក​វិភាគ​នយោបាយ ​លោក ឡារី សាបាតូ​ យល់​ស្រប​ថា គេ​រំពឹង​ថា ​តំណែង​ប្រធាន​រដ្ឋសភា​របស់​លោក​ បេនណឺរ នឹង​ជួប​ប្រទះការ​លំបាក​ខ្លាំង​ ដោយ​សារ​តែ​តំណាងរាស្រ្ដជាប់ឆ្នោត​ថ្មី​ថ្មោង​ពីគណបក្ស​សាធារណរដ្ឋនិយម​គាំ​ទ្រ​ដោយចលនា​ ធី ផាធី (Tea Party)​ បាន​អំពាវនាវ​ឲ្យ​កម្រឹត​មុខ​នាទី​នៅ​ក្នុង​រដ្ឋាភិបាល​មាន​ពន្ឋដា​តិច ​និងយោធា​ខ្លាំង​។

«លោក​ ចន បេនណឺរ ​នឹង​មាន​កិច្ច​ការ​ពេញដៃ​ ក្នុង​ការទុកដាក់​គណបក្ស​សាធារណរដ្ឋ​និយម​មិន​ឲ្យ​បែក​បាក់​គ្នា។ គេ​ឃើញ​មាន ការខ្វែង​គំនិត​គ្នា​យ៉ាងខ្លាំង​ រវាងក្រុម​សាធារណរដ្ឋនិយម​ធម្មតា ​និងក្រុម​សាធារណរដ្ឋនិយម​នៃ​ចលនា​ ធី ផាធី។ ​ហើយ​ការលំបាករបស់​លោក បេនណឺរ ​នឹងកើតចេញ​ពីព្រឹទ្ឋសភា ​ដែល​កាន់កាប់​ដោយ​ក្រុម​ប្រជាធិបតេយ្យនិយម ​ហើយសេតវិមាន ​ត្រូវ​បាន​ត្រួត​ត្រា​ដោយ​ក្រុម​ប្រជាធិបតេយ្យ។ វា​ជា​ការលំបាក​ នឹង​គឹត​ថា​ សេចក្ដីព្រាងច្បាប់ដ៏​សំខាន់​ណា​មួយ​ ដែល​លោក​បាន​ទទួល​សេចក្ដី​អនុម័ត​ពីសភា​តំណាងរាស្រ្ដ​ នឹង​បាន​ទទួល​ការ​យល់​ព្រម​ដោយព្រឹទ្ឋសភា​ដែរ ​ឬក៏​បាន​ត្រូវ​ចុះហត្ថ​លេខា​ដោយ​ប្រធានាធិបតីអូបាមា​នោះ​»​។

នៅ​ក្នុង​សន្ទរកថា​ទទួល​ជ័យជំនះ ​លោក ចន បេនណឺរ បាន​ថ្លែង​អំពី​អ្វី​ដែល​លោក​មើល​ឃើញ​ជា​សារជ័យជំនះនៃ​ក្រុម​សាធារណរដ្ឋនិយម​ផ្ញើ​ជូន​ប្រធា​នាធិបតី​ អូបាមា​។

«ខណៈ​ដែល​សម្លេង​ភាគ​ច្រើន​ថ្មី​របស់​យើង​ នឹង​បំរើ​ជា​សម្លេងរបស់​លោក​អ្នក​នៅ​ក្នុង​សភា ​ប្រជាពលរដ្ឋត្រូវចាំ​ថា ​មាន​តែ​ប្រធានាធិបតី​ទេ​ ដែល​រៀបចំ​របៀបវារៈសំរាប់រដ្ឋាភិបាល​របស់​យើង។ ប្រជាពលរដ្ឋ​អាមេរិកាំង​ បាន​បញ្ជូន​សារយ៉ាងច្បាស់ ប្រាប់​លោក​នៅ​យប់​នេះ។ ហើយ​សារ​នោះ​ គឺ “ត្រូវដូ​រ មាគ៌ា​នយោបាយ​”។

នៅ​ក្នុង​សន្និសីទ​សារពត៌មាន​កាល​ពី​ថ្ងៃ​ពុធ ប្រធានាធិបតី ​អូបាមា ​ថ្លែង​ថា ​លោក​ មាន​ចិត្ដ​ចង់​សហការ​ជា​មួយ​ក្រុម​សាធារណរដ្ឋ​និយម​ ដើម្បី​ធ្វើ​ឲ្យ​ប្រសើរដល់ស្ថានភាព​សេដ្ឋកិច្ចសំរាប់​ពលរដ្ឋ​អាមេរិកថ្នាក់មធ្យម ​ដែល​ខកចិត្ដ​ចំពោះល្បឿន​នៃ​ ការប្រែប្រួល​។

តែ​លោក​ ឡារី សាបាតូ មា​ន​ការ​មន្ទិលសង្ស័យថា​ ​ប្រធានាធិ​បតី ​និង​លោក បេនណឺរ​ មិន​អាច​រក​ឃើញ​មូលដ្ឋាន​កណ្ដាលនៃ​ការ​សម្រប​សម្រួល​គ្នា​នោះទេ។

«គេ​នឹង​ឃើញ​ការ​ជជែកគ្នា​ដោយ​រីករាយ​ក្នុង​រយៈ​ពេល​បុន្មាន​សប្ដាហ៍​ខាង​មុខ​នេះ។ មនុស្ស​មាន​គតិ​បណ្ឌិត​ មិន​មាន​ជំនឿ​អ្វី​សោះ​។ យើង​មាន​គណបក្ស​នយោបាយ​ដែល​ផ្ទុយ​គ្នា​បំផុត ​មិន​ធ្លាប់ឃើញ​មាន​ក្នុង​យុគ​ទំនើប​នេះ​ទេ​។​ គេ​គ្មាន​អ្វី​ដូច​គ្នា​ទាល់​តែ​សោះ​។ គេ​មិន​មាន​ជំនឿ ដូច​គ្នា​ទេ។ ​គេ​មិន​មាន​គោលនយោបាយ​ជា​គ្នា​គ្រប់គ្រាន់ ​ដើម្បីយល់​ស្រប​លើ​សេចក្ដីព្រាង​ច្បាប់ ​ណា​មួយ​បាន​ឡើយ»​។

ក្រុមអ្នកវិភាគ​និយាយ​ថា ​អ្នក​ដែល​គេ​សន្និដ្ឋាន​ថា ​ជាអនាគត​ប្រធាន​រដ្ឋសភា​ លោក ចន បេនណឺរនេះ​ ហាក់​ដូច​ជា​ដើរ​លើ​មាគ៌ាប្រឆាំង​គ្នា​ជា​មួយ​លោក​ប្រធានាធិបតី​ និងក្រុមប្រជាធិបតេយ្យ​ អំពី​ការ​បន្ដការ​កាត់​បន្ថយ​ពន្ធដារ ដែល​ស្នើ​ដោយ​អតីត​ប្រធានាធិបតី ប៊ូស អំពី​ការ​តំឡើង​កម្រិតប្រាក់​បំណុលរបស់​សហព័ន្ឋ ហើយ​នឹង​អំពី​សេចក្ដី​ប្រាថ្នារបស់​ក្រុម​សាធារណរដ្ឋនិយម​ជាច្រើន​នាក់ ​ដែល​ចង់បំបាត់​ចោល​សេច​ក្ដី​ព្រាង​ច្បាប់​នៃការ​កែ​ទម្រង់​ជា​ប្រវត្ដិសាស្រ្ដ ​នូវប្រព័ន្ឋ​ថែ​ទាំ​សុខាភិបាល​របស់​ប្រធានាធិបតី ​អូបាម៉ា​៕

ប្រែសម្រួលដោយ អ៊ូ ធួក

XS
SM
MD
LG