អ្នកគាំទ្រលោក Donald Trump អតីតប្រធានាធិបតីអាមេរិក ត្រូវបានជ្រើសរើសដោយអ្នកបោះឆ្នោតមកពីគណបក្សសាធារណរដ្ឋនៅរដ្ឋ Maryland ដែលនៅខាងកើតរដ្ឋធានីវ៉ាស៊ីនតោនឱ្យធ្វើជាបេក្ខជនក្នុងការបោះឆ្នោតអភិបាលរដ្ឋនេះ។
លោក Dan Cox សមាជិកសភារដ្ឋនេះបានឈ្នះលើសលប់ក្នុងការបោះឆ្នោតបឋមកាលពីថ្ងៃអង្គារលើគូប្រជែងប្រកិតបំផុតរបស់លោកគឺ អ្នកស្រីKelly Schulz ដែលធ្លាប់បម្រើការក្នុងខុទ្ទកាល័យរបស់អភិបាលរដ្ឋនេះមកពីគណបក្សសាធារណរដ្ឋគឺលោកLarry Hogan ដែលចប់អាណត្តិ។ លោកគឺជាបេក្ខជនម្នាក់ក្នុងចំណោមបេក្ខជនគណបក្សសាធារណរដ្ឋជាច្រើនដែលត្រូវបានគាំទ្រដោយអតីតប្រធានាធិបតី មុនការបោះឆ្នោតពាក់កណ្តាលអាណត្តិនាពេលខាងមុខ។ លោកបានគាំទ្រការអះអាងមិនពិតរបស់លោក Trump ដែលថា លោកបានចាញ់លោកJoe Biden បេក្ខជនគណបក្សប្រជាធិបតេយ្យ ក្នុងការបោះឆ្នោតប្រធានាធិបតីឆ្នាំ២០២០ដោយសារតែការលួចបន្លំ។
លោក Cox បានចូលរួមក្នុងការជួបជុំរបស់លោកTrump ហៅថា«បញ្ឈប់ការលួច»នៅថ្ងៃទី៦ ខែមករា ឆ្នាំ២០២១ មុនការវាយប្រហារលើវិមានសភាសហរដ្ឋអាមេរិក Capitol ក្នុងគោលបំណងបញ្ឈប់ការបញ្ជាក់ជាផ្លូវការនូវជ័យជំនះនៃសំឡេងបោះឆ្នោតប្រតិភូរបស់លោក Biden ។ លោកបានហៅអនុប្រធានាធិបតីនៅពេលនោះ គឺលោក Mike Pence ថាជា«ជនក្បត់»នៅលើTwitter មុនពេលលុបចោលវិញហើយសុំទោសជាយថាហេតុ។
ការប្រកួតប្រជែងរបស់គណបក្សសាធារណរដ្ឋត្រូវបានគេមើលឃើញថា តំណាងឲ្យសង្គ្រាមរវាងលោក Trump និងលោកអភិបាល Hogan ដែលត្រូវបានជ្រើសរើសពីរដងក្នុងរដ្ឋដែលស្រឡាញ់គណបក្សប្រជាធិបតេយ្យនេះ ហើយបានជំរុញឱ្យគណបក្សនេះបន្តប្រឆាំងលោកអតីតប្រធានាធិបតី។ លោក Hogan ត្រូវបានអ្នកសង្កេតការណ៍នយោបាយចាត់ទុកយ៉ាងទូលំទូលាយថា ជាមន្ត្រីដ៏មានសក្ដានុពលសម្រាប់ការតែងតាំងជាបេក្ខជនប្រធានាធិបតីគណបក្សសាធារណរដ្ឋឆ្នាំ២០២៤។
គូប្រជែងជាយថាហេតុរបស់លោក Cox មកពីគណបក្សប្រជាធិបតេយ្យក្នុងការបោះឆ្នោតសកលនៅខែវិច្ឆិកានោះ មិនទាន់សម្រេចទេកាលពីយប់ថ្ងៃអង្គារ។ លោក Wes Moore បេក្ខជនដំបូង និងជាអ្នកនិពន្ធសៀវភៅដែលលក់ដាច់ជាងគេ បាននាំមុខលោក Tom Perez ដែលបានធ្វើជារដ្ឋមន្ត្រីក្រសួងការងារក្រោមការដឹកនាំរបស់អតីតលោកប្រធានាធិបតី Barack Obama ប៉ុន្តែលទ្ធផលចុងក្រោយនឹងមិនទាន់សម្រេចទេក្នុងរយៈពេលជាច្រើនថ្ងៃទៅមុខទៀតរហូតដល់សន្លឹកឆ្នោតតាមសំបុត្រត្រូវបានរាប់៕
(ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មានThe Associated Press)
