លោក Abdelmadjid Tebboune ប្រធានាធិបតីអាល់ហ្សេរីកាលពីថ្ងៃសៅរ៍បានតែងតាំងសាស្ត្រាចារ្យសាកលវិទ្យាល័យនិងជាអតីតអ្នកការទូត ឲ្យធ្វើជានាយករដ្ឋមន្ត្រី ខណៈលោកបង្កើតរដ្ឋាភិបាលថ្មីដើម្បីដោះស្រាយភាពវឹកវរនយោបាយនិងបញ្ហាប្រឈមខាងសេដ្ឋកិច្ច។
លោក Abdelaziz Djerad អាយុ៦៥ឆ្នាំបានធ្វើការក្នុងរដ្ឋាភិបាលប្រធានាធិបតីមុននៅទសវត្សរ៍១៩៩០ ប៉ុន្តែត្រូវបានបញ្ឈប់ដោយលោកប្រធានាធិបតី Abdelaziz Bouteflika ដែលត្រូវបានបណ្តេញចេញពីតំណែងកាលពីខែមេសា បន្ទាប់ពីធ្វើជាប្រមុខរដ្ឋបានពីរឆ្នាំ។
ចលនាបាតុកម្មដ៏ធំដែលបានជំរុញឱ្យលោក Bouteflika ចុះចេញពីតំណែងនោះបានចាត់ទុកថា ការឈ្នះបោះឆ្នោតរបស់លោក Tebboune នៅខែនេះមិនស្របច្បាប់ ហើយហាក់ដូចជាមិនទទួលស្គាល់រដ្ឋាភិបាលដែលលោកតែងតាំងនោះទេ។
ក្រុមអ្នកតវ៉ាបានបដិសេធរាល់ការបោះឆ្នោតដែលធ្វើឡើង ខណៈកងយោធានៅតែជាប់ពាក់ព័ន្ធនឹងនយោបាយ ហើយឥស្សរជនសម័យលោក Bouteflika នៅកាន់តំណែងមានអំណាចនោះ។
អាជ្ញាធរអាល់ហ្សេរីបានស្វាគមន៍ជាសាធារណៈចំពោះការតវ៉ា ដោយចាត់ទុកថាជាចលនាស្នេហាជាតិដែលមានគោលបំណងកែសម្រួលនយោបាយអាល់ហ្សេរីនិងបញ្ចប់អំពើពុករលួយ។
លោក Djerad បាននិយាយជាច្រើនដងតាមវិទ្យុ បន្ទាប់ពីការតវ៉ាបានចាប់ផ្តើម។ លោកថ្លែងគាំទ្រការតវ៉ាហើយទាមទារឱ្យលោក Bouteflika និងសម្ព័ន្ធមិត្តលះបង់អំណាច។
លោក Tebboune ដែលជាអតីតនាយករដ្ឋមន្រ្តី គឺជាអតីតមន្ត្រីជាន់ខ្ពស់ក្នុងចំណោមមន្ត្រី៥រូបដែលត្រូវបានអនុម័តឲ្យធ្វើជាបេក្ខជនសម្រាប់ការប្រកួតប្រជែងតំណែងប្រធានាធិបតី ហើយលោកទទួលបានសំឡេងគាំទ្រ៥៨ភាគរយ កាលពីថ្ងៃទី១២ ខែធ្នូ ចំពេលមានការតវ៉ានិងពហិការការបោះឆ្នោត ដែលបានកាត់បន្ថយចំនួនអ្នកទៅបោះឆ្នោតនៅត្រឹម៤០ភាគរយប៉ុណ្ណោះ។
ក្រុមប្រឆាំងនិយាយថា ទោះបីជាលោក Tebboune ឈ្នះឆ្នោតក៏ដោយ ក៏អំណាចនៅតែនៅក្នុងដៃកងទ័ព ដែលមេបញ្ជាការគឺលោក Ahmed Gaed Salah បានស្លាប់ភ្លាមៗដោយសារគាំងបេះដូង កាលពីថ្ងៃចន្ទ។ នៅពេលនេះប្រទេសអាល់ហ្សេរីមានប្រធានាធិបតីថ្មីនាយករដ្ឋមន្រ្តីថ្មីនិងមេបញ្ជាការកងទ័ពថ្មីអំឡុងពេលមានវិបត្តិនយោបាយធ្ងន់ធ្ងរបំផុតប៉ុន្មានទសវត្សរ៍នេះ៕
