ភ្ជាប់​ទៅ​គេហទំព័រ​ទាក់ទង

ផែនការ​ជម្លៀស​មនុស្ស​ក្នុង​ទីក្រុង Aleppo បាន​ត្រូវ​ពន្យា​រពេល​ ខណៈ​ដែល​​ការ​ប្រយុទ្ធ​នៅ​បន្ត


កងកម្លាំង​គាំទ្រ​រដ្ឋាភិបាល​ស៊ីរី​ដើរ​នៅ​ក្នុង​តំបន់​ Bustan al-Qasr នៅ​ក្រុង​ Aleppo បន្ទាប់​ពី​ពួកគេ​បាន​​ទន្ទ្រាន​​យក​តំបន់​នោះ​ កាល​ពី​ថ្ងៃ​ទី១៣ ខែ​ធ្នូ ឆ្នាំ​២០១៦។

ផែនការ​ដើម្បី​ជម្លៀស​ជន​ស៊ី​វិល​ និង​ពួក​ឧទ្ទាម​ពី​ទីក្រុង Aleppo នៃ​ប្រទេស​ស៊ីរី​បាន​ត្រូវ​ពន្យារពេល​នៅ​ថ្ងៃ​ពុធ​នេះ។ ​ហើយ​បទឈប់​បាញ់​គ្នា​មួយ​នៅ​ក្នុងទីក្រុងដ៏ខ្ទេចខ្ទី​នេះ​បាន​ទទួល​បរាជ័យ ​ដោយ​មានការ​បន្ត​ការ​ប្រយុទ្ធ​នៅ​ក្នុង​ផ្នែក​ដែល​នៅ​សេសសល់​ចុង​ក្រោយ ​ដែលកាន់​កាប់​ដោយ​ពួក​ឧទ្ទាម។

មាន​កិច្ចខិត​ខំ​ប្រឹង​ប្រែង​ជាច្រើនដើម្បី​បញ្ឈប់​ការ​ប្រយុទ្ធ​នៅ​ក្នុង​ទីក្រុង Aleppoដើម្បី​យក​ជំនួយ​ទៅ​ឲ្យ​មនុស្ស​រាប់​ពាន់​នាក់​ ដែល​ត្រូវ​ការ​ម្ហូបអាហារ​និង​ថ្នាំ​ពេទ្យ។ ​ក៏​ប៉ុន្តែ​កិច្ច​ផ្តួច​ផ្តើម​ទាំង​នោះ ​រួមមានបទ​ឈប់​បាញ់​គ្នា ​ដែល​សម្រប​សម្រួល​ដោយ​ប្រទេស​នានា​ដូចជា​រុស្ស៊ី ​សហរដ្ឋ​អាមេរិក​ និង​ប្រទេស​តួកគី ​បាន​ទទួល​បរាជ័យ។

កិច្ច​ព្រម​ព្រៀង​កាល​ពី​ពេល​ថ្មី​ៗ​នេះ ​ត្រូវ​ប្រកាស​កាល​ពី​ថ្ងៃ​អង្គារ ​ដោយ​មានការ​ជម្លៀស​មនុស្ស​លើក​ដំបូង​ត្រូវគេ​រំពឹងចាប់​ផ្តើម​នៅ​ព្រឹក​ថ្ងៃ​ពុធ​នេះ។ នៅ​ពាក់​កណ្តាល​ថ្ងៃ​ពុធ ​ក្រុម​សកម្មជន​រាយការណ៍​ថា ​មាន​ការ​បាញ់​ផ្តក់​ថ្មីក្នុង​តំបន់​នានា​នៃ​ទីក្រុង Aleppo ភាគ​ខាង​កើតដែលកាន់​កាប់​ដោយ​ពួក​ឧទ្ទាម​ហើយ​រុស្ស៊ី​បាន​ស្តី​បន្ទោស​យុទ្ធជនរបស់​ក្រុមប្រឆាំង​ពី​ការ​រំលោភ​បទឈប់​បាញ់​គ្នា​ ដោយធ្វើ​ការ​វាយ​ប្រហារ​ទៅ​លើ​ទីតាំង​រដ្ឋាភិបាល​ស៊ីរី។ គ្មាន​ការ​ជម្លៀស​មនុស្ស​ត្រូវ​បាន​ធ្វើ​ឡើង​ទេ។

យោងទៅតាម​លោក Vitaly Churkin ឯកអគ្គរដ្ឋ​ទូត​ប្រទេស​រុស្ស៊ី​ប្រចាំ​នៅ​អង្គការ​សហប្រជាជាតិ​បាន​ប្រាប់​ឲ្យ​ដឹង​ថា ​ផែនការ​នោះភាគ​ច្រើន​សម្រាប់​ការ​រត់គេច​ខ្លួន​របស់​យុទ្ធជន​ក្រុម​ប្រឆាំង ដើម្បី​ទៅកាន់​ទីក្រុង Idlib ​ជា​ទីក្រុង​មួយ​ ដែល​មាន​ពលរដ្ឋ១សែន​៦ម៉ឺន​៥​ពាន់​នាក់​ ស្ថិត​នៅ​ផ្នែក​នារតី​នៃ​ទីក្រុង Aleppo។

លោក Churkin បាន​ពណ៌​នា​កិច្ច​ព្រមព្រៀង​នោះ​ថា​ ជាការ​បញ្ចប់​សករាជ​ដ៏​ពិបាក​បំផុត​សម្រាប់​ទីក្រុង Aleppo ​ហើយ​លោក​បាន​និយាយ​ទៀត​ថា ​រដ្ឋាភិបាល​របស់​លោក​សង្ឃឹម​ថា ​ការណ៍​នេះ​នឹង​នាំ​ឲ្យ​មានការ​ចាប់​ផ្តើម​ការចរចា​ខាង​នយោបាយ​ឡើង​វិញ៕

XS
SM
MD
LG