របាយការណ៍ថ្មីមួយមកពីក្រុមសកម្មជនភូមា កំពុងអំពាវនាវដល់ក្រុមហ៊ុនផលិតយន្តហោះ Airbus ដែលមានទីតាំងនៅប្រទេសបារាំង ឱ្យប្រើប្រាស់ឥទ្ធិពលរបស់ខ្លួនជាមួយសាជីវកម្មឧស្សាហកម្មអាកាសចរណ៍របស់ចិនឬ AVIC ដើម្បីដាក់សម្ពាធលើក្រុមហ៊ុនចិន ឲ្យបញ្ចប់ការលក់អាវុធរបស់ខ្លួនទៅឱ្យរដ្ឋាភិបាលយោធាមីយ៉ាន់ម៉ា។
AVIC ជាក្រុមហ៊ុនជាប់កិច្ចសន្យាក្នុងវិស័យការពារជាតិដ៏ធំបំផុតមួយរបស់ពិភពលោក ហើយក្រុមហ៊ុនអាកាសចរណ៍ចិនបានផ្គត់ផ្គង់ដល់ពួកយោធាមីយ៉ាន់ម៉ា នូវយន្តហោះនិងអាវុធដែលត្រូវបានប្រើប្រាស់នៅក្នុងការវាយប្រហារតាមអាកាសនៅក្នុងប្រទេសដែលហែកហួរដោយសង្គ្រាមមួយនេះ។
របាយការណ៍ដែលត្រូវបានចេញផ្សាយកាលពីថ្ងៃចន្ទប្រាប់ឱ្យដឹងថា ក្រុមហ៊ុន Airbus មិនត្រឹមតែរក្សាការវិនិយោគទុនទេ ក៏ប៉ុន្តែ បានបង្កើនការវិនិយោគទុននៅក្នុងក្រុមហ៊ុននានាដែលត្រួតត្រាដោយក្រុមហ៊ុនចិនទៀត។
យោងតាមរបាយការណ៍នោះ ក្រុមហ៊ុន Airbus បានវិនិយោគយ៉ាងខ្លាំងនៅក្នុងក្រុមហ៊ុន AviChina ដែលចុះបញ្ជីក្រោមក្រុមហ៊ុនមេ AVIC នៅក្នុងក្រុងហុងកុង ដែលជាដៃគូយុទ្ធសាស្ត្ររបស់ក្រុមហ៊ុន AVIC China ក្នុងប្រទេសចិនដីគោក។
អ្នកនាំពាក្យក្រុមហ៊ុន Airbus បានបដិសេធការចោទប្រកាន់ ដែលថាក្រុមហ៊ុនខ្លួនអាចរំលោភការដាក់ទណ្ឌកម្មអន្តរជាតិនានា។
អង្គការយុត្តិធម៌សម្រាប់មីយ៉ាន់ម៉ា និង Info Birmanie ដែលជាអង្គការមិនរកកម្រៃផ្តោតលើមីយ៉ាន់ម៉ានៅក្នុងទីក្រុងប៉ារីស បាននិយាយថា ពួកគេបានរកឃើញភស្តុតាងថា ក្រុមហ៊ុន AVICកំពុងបន្តផ្គត់ផ្គង់យន្តហោះនិងអាវុធដល់យោធាមីយ៉ាន់ម៉ា ដែលពួកគេនិយាយថា បានត្រូវប្រើប្រាស់ដើម្បីប្រព្រឹត្តឧក្រិដ្ឋកម្មសង្គ្រាមទូទាំងប្រទេស៕
