ក្រសួងកសិកម្ម រុក្ខាប្រមាញ់និងនេសាទបានអះអាងថា ផលនេសាទដាយត្រីនៅរាជធានីភ្នំពេញ និងខេត្តកណ្តាលនៃបឹងទន្លេសាបកើនឡើងរហូតដល់៤០% នៅឆ្នាំ២០២២ បើធៀបនឹងឆ្នាំ២០២១។ នេះបើយោងសេចក្តីប្រកាសព័ត៌មានរបស់ក្រសួងចេញផ្សាយកាលពីថ្ងៃទី៣ ខែមករា ឆ្នាំ២០២៣។
បើតាមសេចក្តីប្រកាសព័ត៌មានដដែល នៅក្នុងឆ្នាំ២០២២-២០២៣នេះ ផលនេសាទដាយត្រីទទួលបាន១៤៨១តោន ខណៈកាលពីឆ្នាំ២០២១-២០២២ផលនេសាទដាយត្រីបាន៨៩០តោន។
សេចក្តីប្រកាសព័ត៌មានរបស់ក្រសួងដដែលបញ្ជាក់ថា៖ «កំណើនត្រីដែលចាប់បាននៅក្នុងគន្លងដាយនេះឆ្លុះបញ្ចាំងឱ្យឃើញថា បរិមាណត្រីទឹកសាបនៅក្នុងធម្មជាតិមានការកើនឡើងជាងមុន ដែលជាលទ្ធផលនៃការទប់ស្កាត់ប្រកបដោយប្រសិទ្ធភាពនូវបទល្មើសក្នុងបឹងទន្លេសាប ពីសំណាក់មន្ត្រីជលផល និងកងកម្លាំងមានសមត្ថកិច្ចចម្រុះទាំងអស់កាលពីរដូវត្រីពងក្នុងអំឡុងឆ្នាំ២០២២កន្លងទៅ»។
បើតាមក្រសួងកសិកម្ម ត្រីដែលទទួលបានពីផលនេសាទដាយត្រី មានដូចជាត្រីរៀល៤៥% ត្រីស្លឹកឫស្សី៣០% ត្រីខ្នងវែង៥% ត្រីកញ្ជ្រក៣% ត្រីច្រកែង២% ត្រីឈ្វាត ៥% និងត្រីចម្រុះ ១០%។ ក្រៅពីនេះ ក្រសួងកសិកម្មអំពាវនាវឱ្យប្រជានេសាទទាំងអស់គោរពទៅតាមច្បាប់នេសាទដើម្បីរក្សាធនធានជលផលឱ្យបានយូរអង្វែង ខណៈក្រសួងក៏បានប្តេជ្ញាអនុវត្តច្បាប់ឱ្យបានតឹងរ៉ឹង ដោយការដាក់ទោសទណ្ឌជាធរមានចំពោះអ្នកប្រព្រឹត្តខុសច្បាប់។
អ្នកជំនាញក្រៅរដ្ឋាភិបាន និងអ្នកនេសាទធ្លាប់មានចម្ងល់អំពីតួលេខជលផលក្នុងរបាយការណ៍របស់រដ្ឋាភិបាល ខណៈធាទឹកប្រទេសកម្ពុជារងការប្រែប្រួលដោយសារទំនប់វារីអគ្គិសនីតាមដងទន្លេមេគង្គ៕
