មេបញ្ជាការរបស់កងកម្លាំង សរអ និង អូតង់ ប្រចាំប្រទេសអាហ្គានិស្ថាន ឧត្ដមសេនីយ David Petraeus ថ្លែងកាលពីថ្ងៃអាទិត្យថា លោកមើលឃើញថាមានការលូតលាស់នៅក្នុងសង្រ្គាម តែលោកព្រមានថា ការប្រយុទ្ឋតទល់ក្រុមតាលីបាន មានសភាព«ឡើងចុះ»។
នៅក្នុងសេចក្ដីសម្ភាសន៍មួយជាមួយកម្មវិធីរបស់ទូរទស្សន៍ NBC “Meet the Press” ឧត្ដមសេនីយ Petraeus មានប្រសាសន៍ថា គោលដៅរបស់សរអ និងអូតង់ នៅក្នុងប្រទេស អាហ្គានិស្ថាន គឺធ្វើឱ្យបរាជ័យដល់ក្រុម តាលីបាន ហើយនិងរារាំងប្រទេសខ្ទិចខ្ទាំដោយសង្រ្គាមនោះ មិនឲ្យក្លាយទៅជាជំរកសុខសាន្ដរបស់ក្រុមនិយមជ្រុលគ្មានព្រំដែន។
លោកបានថ្លែងសង្កត់ថា គោលដៅរបស់ប្រធានាធិបតី បារ៉ាក អូបាមា នៃការចាប់ផ្ដើមដកទាហានអាមេរីកាំងចេញពីប្រទេស អាហ្គានិស្ថាន នៅខែកក្កដាខាងមុខនេះ គឺយោងទៅតាមស្ថានការណ៍សន្ដិសុខសម្រេចបាននៅក្នុងប្រទេសនេះ។
«លោកប្រធានាធិបតី បានមានប្រសាសន៍យ៉ាងជាក់ច្បាស់។ លោកអនុប្រធានាធិបតី បៃដិន ក៏បាននិយាយជាក់ច្បាស់ដែរ កាលពីពេលថ្មីៗនេះថា នេះជាកាលបរិច្ឆេតត្រឹមត្រូវហើយ នៃការចាប់ផ្ដើមដំណើរការ។ ទង្វើនេះត្រូវធ្វើដោយមានល័ក្ខខ័ណ្ឌ។ បើស្ថានការណ៍ហុចឲ្យ យើងនឹងផ្ដូរមុខនាទីទៅឲ្យសមភាគីអាហ្គានិស្ថានរបស់យើង និង កងកម្លាំងការពារសន្ដិសុខ និងស្ថាប័នរដ្ឋាភិបាលផ្សេងៗរបស់អាហ្គានស្ថាន ហើយអាច«ដកកងកម្លាំងរបស់យើងប្រកបទៅដោយការទទួលខុសត្រូវ»។
លោក Petraeus ថ្លែងថាលោកនឹងផ្ដល់អនុវសាសន៍យោធា ល្អបំផុតជូនដល់ប្រធានាធិបតី ហើយ លោកមិនរារែកនឹងនិយាយប្រាប់ប្រធានាធិបតី ថាតើខែកក្កដាជាទិសដៅសមរម្យឬទេ ដើម្បីចាប់ផ្ដើមដកទ័ពអាមេរិកាំងចេញពីប្រទេសអាហ្គានិស្ថាននោះ។
លោក Petraeus ទទួលកិត្តិយស ដោយសារបានអនុវត្ដប្រកបដោយជោគជ័យនូវយុទ្ឋសាស្រ្ដយោធា នៅក្នុងប្រទេសអ៊ីរ៉ាក់។ លោកទទួលយកការខុសត្រូវចំពោះកិច្ចប្រតិបត្ដិការអាមេរិកាំង និង អូតង់ នៅក្នុងប្រទេសអាហ្គានិស្ថាន កាលពីខែមុន។
លោកថ្លែងទៀតថា ការដកកងទ័ពអាមេរិកាំងនិងអូតង់ មិនមែនមានន័យថាការបញ្ចប់ការប្ដេជ្ងាចិត្ដរបស់សរអ នៅក្នុងប្រទេសអាហ្គានីស្ថាននោះទេ។
«ដំបូង ខ្ញុំព្រមានដល់នរណាមូយក្នុងតំបន់ កុំឱ្យធ្វើការសន្និដ្ឋានភ្លាមៗនោះ។ ខ្ញុំយល់ថា យើងមានការប្ដេជ្ងាចិត្ដដ៏យូរអង្វែង នៅទីនេះ។ លក្ខណៈអាចមានការផ្លាស់ប្ដូរ ទៅតាមពេលវេលា ដែលសមភាគី អាហ្គានិស្ថាន របស់យើងអាចសម្រេចបានច្រើនជាងមុន ហើយយើងអាចបន្ថយកិច្ចការរបស់យើង នៅក្នុងវិស័យខ្លះ»។
ឧត្ដមសេនីយ Petraeus បានចូលមកកាន់មុខនាទីជាអគ្គមេបញ្ជាការរបស់កិច្ចប្រតិបត្ដិការយោធាក្នុងប្រទេស អហ្គានិស្ថាន ខណៈដែលក្រុមអ្នកវិភាគកត់សំគាល់ថា ការគាំទ្រដល់សង្រ្គាមអាយុ៩ ឆ្នាំនោះ បានសាបរលាប រួចចំនួនមនុស្សស្លាប់មានកាន់តែច្រើន។
ចាប់តាំងពីបានចូលកាន់ដំណែងថ្មីនេះមក ឧត្ដមសេនីយ Petraeus បានសង្កត់ទៅលើសេចក្ដីត្រូវការរបស់កងកម្លាំងដើម្បី «ការពារសន្ដិសុខនឹងបំរើប្រជាពលរដ្ឋ» ហើយ «រស់នៅជាមួយប្រជាពលរដ្ឋ»។
លោកក៏បានកត់សំគាល់អំពីសារៈសំខាន់ក្នុងការប្រយុទ្ឋប្រឆាំងអំពើពុករលួយ និងការបំពានអំណាច ដែលលោកហៅថាជាបញ្ហាដែលបញ្ឆេះឱ្យមានការបះបោរ។
លោក Petraeus បានគាំទ្រផែនការចម្រូងចម្រាសរបស់រដ្ឋាភិបាល អាហ្គានិស្ថាន ដើម្បីបញ្ចូលជនសកម្មប្រយុទ្ឋតាលិបាន់ថ្នាក់ទាបមកក្នុងសង្គម។ លោកថ្លែងប្រាប់ទូរទស្សន៍ NBC ថាមានលទ្ឋភាពនៃការផ្សះផ្សារជាតិជាមួយក្រុមតាលីបាន់ខ្លះ។
«នេះមិនមែនមានន័យថា មេទ័ពតាលីបាន់ Mullah Omar នឹងដើរលេងនៅលើផ្លូវធំ ក្នុងក្រុងកាប៊ូល នៅពេលឆាប់ៗ ហើយលើកដៃស្បថថានឹងគោរពរដ្ឋធម្មនុញ្ញអាហ្គានិស្ថាននោះទេ។ តែខ្ញុំគិតថា មានលទ្ឋភាពដែលអាចកើតមានបាន ដោយមានជនសកម្មប្រយុទ្ឋតាលីបាន់ថ្នាក់ទាបនិងមធ្យម អាចធ្វើសមាហរណកម្មដោយ ចូលមកក្នុងសង្គមវិញ ហើយប្រហែលជាមានការបាក់បែកគ្នាក្នុងជួរសមាជិកតាលីបាន់ថ្នាក់ខ្ពស់ ដែលអាចឲ្យអត្ដន័យថាជាការផ្សះផ្សារគ្នាឡើងវិញ»។
លោក Petraeus និងមន្ដ្រិយោធាអាមេរិកាំងដទៃ បានព្រមានអំពីការកើនចំនួនមនុស្សស្លាប់ ខណះដែលកងកម្លាំងអាមេរិកាំងបន្ថែមនឹងត្រូវបញ្ជូនទៅប្រយុទ្ឋក្នុងសមរភូមិ។
កាលពីឆ្នំាមុន ប្រធានាធិបតិ អូបាមា អនុញាតឲ្យដំឡើងចំនួនទាហានអាមេរិកាំង ក្នុងប្រទេសអាហ្គានិស្ថាន ដល់ទៅ ១សែននាក់ ដែលនឹងដំឡើងចំនួនកងទ័ពសម្ពន្ឋមិត្ដទាំងអស់ នៅក្រោមបញ្ជាការរបស់ឧត្ដមសេនីយ៍ Petraeus ទៅ ១ សែន ៥ ម៉ីននាក់។
គេរំពឹងថា លោកឧត្ដមសេនីយ៍នឹងរាយការណ៍វាស់វែងប៉ាន់ស្មានការលូតលាស់នៅក្នុងសង្គ្រាម ជូនរដ្ឋសភានៅក្នុងខែធ្នូ។
ប្រែសម្រួលដោយ អ៊ូ ធួក
