ភ្ជាប់​ទៅ​គេហទំព័រ​ទាក់ទង

ច្បាប់​តម្លាភាព​អាមេរិក​ជួយ​វិស័យនិស្សារណកម្ម​សកល

  • Nico Colombant

ក្រុម​​ជន​ជាតិ​ភាគ​តិច​​ កំពុង​ជំរុញ​ឲ្យ​កាន់តែ​​មាន​តម្លាភាព​ថែម​ទៀត​ លើ​ការ​ចំណាយ​សម្រាប់​ធនធាន​​ពី​ទ្វីប​អាហ្រ្វិក​។ ​

វ៉ាស៊ីនតោន៖ សហ​រដ្ឋ​អាមេ​រិក​ស្ថិត​នៅ​លំ​ដាប់​ខ្ពស់​ជាង​គេ​ក្នុង​ឋានៈជា​ប្រទេស​ដែល​មានតម្លា​ភាពក្នុង​ការចាត់​ចែងធន​ធាន​របស់​ខ្លួន ប៉ុន្តែក្រុម​សកម្ម​ជន​កំពុង​តែ​ធ្វើ​ការ​ឃ្លាំ​មើល​យ៉ាង​ដិត​ដល់​អំពី​របៀប​ដែល​រដ្ឋា​ភិ​បាល​ ​និង​ក្រុម​ហ៊ុន​អាមេ​រិកាំងចាត់​ចែងធន​ធាន​ដែល​ខ្លួន​ទទួល​បាន​ពី​ប្រ​ទេស​ផ្សេងៗ​ ជា​ពិសេស​ពី​ប្រទេស​ក្នុង​ទ្វីប​អាហ្រ្វិក។

សហ​រដ្ឋ​អា​មេ​រិក​ជាប់​ចំណាត់​ថ្នាក់​ទី ១១ នៅ​ក្នុង​តារាង​ឃ្លាំ​មើល​ចំណូលទី​មួយ​ ដែល​ចេញ​ផ្សាយ​នៅ​សប្តាហ៍​នេះ​ ដោយវិទ្យា​ស្ថាន​ឃ្លាំ​មើល​ប្រាក់​ចំណូល (Revenue Watch Institute) និង​អង្គ​ការ​តម្លា​ភាព​អន្ត​រ​ជាតិ (Transparency International)។

ការ​សិក្សា​បាន​ដាក់ពិន្ទុការ​បើក​ចំហរ​របស់​រដ្ឋា​ភិ​បាល ក្នុងការ​គ្រប់​គ្រង​ប្រេង ឧស្ម័ន និង​ធន​ធាន​រ៉ែរបស់​ពួក​គេ។ ក្រុមត្រួត​ពិនិត្យធន​ធាន​និយាយ​ថា វា​គឺ​ជា​សញ្ញា​ចង្អុល​បង្ហាញ​ដ៏​មាន​សារ​សំខាន់​មួយ សម្រាប់​ប្រទេស​មហា​អំណាច​សេដ្ឋ​កិច្ច​ដូច​ជា​សហរដ្ឋ​អា​មេ​រិក។ គេនិយាយ​ថា សហរដ្ឋ​អា​មេ​រិក​បាន​ចាត់​វិធាន​ដ៏​សំខាន់ក្នុង​ការ​ធ្វើឲ្យ​ប្រសើរ​ឡើង ចំពោះការ​នាំ​ចូល ​និង​ផលិតកម្មបរទេស។

បទ​បញ្ញត្តិស្តី​ពី​ការ​ការ​ពារ​អ្នក​ប្រើ​ប្រាស់ និង​កំ​ណែរ​ទម្រង់ Dodd-Frank Wall Street​ ដែល​ត្រូវ​បាន​ចុះ​ហត្ថ​លេ​ខា​ឲ្យ​ក្លាយ​ទៅ​ជា​ច្បាប់​នៅ​ក្នុង​ឆ្នាំ​នេះ រួម​បញ្ចូល​ទាំង​បទ​បញ្ញត្តិ​ស្តី​ពី​ការ​ចេញ​ផ្សាយឧស្សាហកម្ម​និស្សារណក​ម្ម។ បទ​បញ្ញត្តិ​នេះ​តម្រូវ​ឲ្យ​ក្រុម​ហ៊ុន​ប្រេង​ ឧស្ម័ន និង​រ៉ែ ដែល​មាន​ចុះ​បញ្ជីជាមួយ​គណៈ​កម្មការ​ផ្លាស់​ប្តូរ​ និង​សន្តិសុខ (US Securities and Exchange Commission) ​បង្ហាញការ​ចំណាយ​ដែល​ខ្លួនផ្តល់​ឲ្យ​រដ្ឋា​ភិ​បាល​បរទេស។

លោក​អាវីនដ៍ ហ្កាណេសាន (Arvind Ganesan)​ គឺ​ជា​នាយក​នៃ​កម្ម​វិធី​ពាណិជ្ជ​កម្ម​ និងសិទ្ធិ​មនុស្ស នៅ​ឯ​អង្គ​ការ​ឃ្លាំ​មើល​សិទ្ធិ​មនុស្ស (Human Rights Watch) ដែល​មាន​ទី​តាំង​នៅ​សហ​រដ្ឋ​អាមេ​រិក។ លោក​មាន​ប្រសាសន៍​ថា៖

«នេះ​អាច​ជា​ជំហាន​ទៅ​មុខ​ដ៏​សំខាន់​មួយ ពី​ព្រោះ​វាធ្វើ​ឲ្យ​ក្រុម​ហ៊ុន​ដូច​ជា Exxon ឬ​ Chevron ឬ​ក្រុម​ហ៊ុន​អាមេ​រិក ដែល​ចុះ​បញ្ជី​ជា​សាធារ​ណៈ ឥឡូវ​នេះ​ត្រូវ​តែ​បង្ហាញម្តង​មួយ​ប្រទេសៗ ថា​តើ​ពួក​គេ​បាន​ចំណាយប្រាក់ចំនួន​ប៉ុន្មាន​ទៅ​ឲ្យរដ្ឋា​ភិ​បាល​នៃ​ប្រទេស​ទាំ​ង​នោះ នៅ​ពេល​ដែល​ក្រុម​ហ៊ុន​ទាំង​នេះ​ធ្វើ​អាជីវ​កម្ម​នៅ​ទី​នោះ»។

លោក​ អ៊ាន ហ្ការី (Ian Gary) ប្រ​ធាន​ផ្នែក​គោល​នយោ​បាយ​ជាន់​ខ្ពស់ទទួល​បន្ទុក​ឧស្សាហកម្ម​និស្សារណកម្មនៃ​អង្គ​ការ​អក់ស្វាម អាមេរិក (Oxfam America) និយាយ​ថា​ នៅ​ក្នុង​ប្រទេស​មួយ​ចំនួន​ដូច​ជា​ប្រទេស​ អង់ហ្គោឡា ដែល​ជា​ប្រ​ទេស​ផលិត​ប្រេង​ដ៏ធំ​មួយ​នៅ​ទ្វិប​អា​ហ្រ្វិក រាល់​ផលិត​ផល​ ​និង​គម្រោង​នា​ពេល​បច្ចុប្បន្ន​ ដែល​កំពុង​តែ​ដំណើរ​ការ ​ត្រូវ​ស្ថិត​នៅ​ក្រោម​ច្បាប់​ថ្មី​របស់​សហ​រដ្ឋ​អា​មេ​រិក។

ប្រ​ទេស​អង់ហ្គោឡា​ មិន​មែន​ជា​សមាជិក នៃអង្គ​ការ​ផ្តួច​ផ្តើមតម្លា​ភាព​សម្រាប់​ឧស្សាហ​កម្ម​និស្សារណកម្ម​ (EITI) ដែលស្វះ​ស្វែង​បង្កើនតម្លា​ភាព​ចំណាយក្នុង​ប្រទេស​ដែល​សម្បូរ​ធន​ធាន ដោយ​ឈរ​លើ​មូល​ដ្ឋាន​ស្ម័គ្រ​ចិត្តទេ។

លោកហ្ការី និយាយ​ថា ច្បាប់​ថ្មី​របស់អាមេ​រិក​នឹង​ពង្រឹង​កិច្ច​ខិត​ខំ​ប្រឹង​ប្រែង​នេះ។ លោក​ថ្លែង​ដូច្នេះ​ថា៖

«អ្វី​ដែល​ខ្ញុំ​គិត​ថា​ សំខាន់​គឺ​ថា យើង​មើល​ឃើញ​ការ​រីក​ចម្រើនលើ​ការ​ផ្តួច​ផ្តើម​ដោយស្ម័គ្រ​ចិត្ត ដែល​ថា​ ការ​អនុវត្ត​របស់ប្រទេស​ទាំង​ឡាយ​ត្រូវ​បាន​វាយ​តម្លៃ​ដោយ​គណៈ​កម្ម​ការ​ EITI។​ ប៉ុន្តែ​ យើង​ក៏​បាន​មើល​ឃើញប្រ​ភេទ​ផ្សេងៗ​ទៀត​នៃ​បទ​បញ្ញត្តិ ដូច​ជា​ច្បាប់អាមេ​រិក ដែល​ឆ្លើយ​តប​ទៅ​នឹង​ទី​ផ្សា​រផ្សេងៗ​។ ដូច្នេះ​ យើង​មាន​ការ​គ្រប​ដណ្តប់​ទូលំទូលាយ​ ហើយ​ព័ត៌មានកាន់​តែច្រើន​ត្រូវបាន​ដាក់​នៅ​កន្លែងដែល​សាធារណជន​អាចទទួល​បាន»។

នៅ​ដើម​ឆ្នាំ​នេះ​ ផ្សារ​ភាគ​ហ៊ុន​ហុង​កុង បាន​ចេញ​ច្បាប់​ថ្មី ដែល​តម្រូវឲ្យក្រុម​ហ៊ុន​រុក​រក​រ៉ែ ធ្វើ​ការបោះ​ពុម្ព​ផ្សាយការ​ចំណាយ។ ក្រុមប្រឹក្សា​ភិ​បាល​បទដ្ឋាន​គណ​នេយ្យ​អន្តរ​ជាតិ (The International Accounting Standards Board) ដែល​មាន​ឥទ្ធិ​ពល​ទៅ​លើ​ច្បាប់គណ​នេយ្យនៅ​ក្នុង​ប្រ​ទេស​ចំនួន​ជាង​១០០ កំពុង​ពិចារណាការ​ចេញ​ផ្សាយ​ការ​ចំណាយ ដោយការអនុវត្តបទដ្ឋាន​ក្រុមហ៊ុន​ធនធាន។

លោក អ៊ាន ហ្ការី នៃ​អង្គការអក់ស្វាមអាមេរិក​ និយាយ​ថា​ មាន​ការ​រីក​ចំរើន​យ៉ាង​ខ្លាំងចំ​ពោះ​តម្លា​ភាព​នៃ​ការ​ប្រើ​ប្រាស់​ធន​ធាន ជា​ពិសេស​គឺ​ការ​ធ្វើ​ឲ្យ​សាជីវ​កម្ម​ចម្បងៗបើកបញ្ជី​របស់​ពួក​គេ​ជា​សាធារណៈ។ លោក​បន្ត​ថា៖

«យើង​មើល​ឃើញ​ធាតុផ្សំតូចៗផ្តុំគ្នា​ ដូច្នេះ ខ្ញុំ​សង្ឃឹម​ថា ពីរបី​ឆ្នាំ​ទៅ​មុខ​ទៀត ក្រុម​ហ៊ុន​ដែល​មិន​បាន​ចេញ​ផ្សាយ​ព័ត៌មាន​របស់​ខ្លួន នឹង​នៅ​មាន​តែ​មួយ​ចំនួន​តូច​ប៉ុណ្ណោះ»។

ប៉ុន្តែ ច្បាប់​ថ្មីអាមេរិក​នឹង​មិន​មាន​ប្រសិទ្ធិ​ភាព​ភ្លាមៗ​ទេ។ គណៈ​កម្មការ​ផ្លាស់​ប្តូរ​ និង​សន្តិ​សុខ មាន​ពេល​រហូត​ដល់​ពាក់​កណ្តាល​ឆ្នាំ​ក្រោយ ក្នុង​ការ​សរសេរ​បទ​បញ្ញត្តិ​ទាំង​ឡាយ ដែល​ចាំ​បាច់​ក្នុង​ការ​អនុវត្ត​ច្បាប់​ Dodd-Frank នេះ។ បន្ទាប់​មក ក្រុម​ហ៊ុន​នឹង​មាន​រយៈ​ពេល​មួយឆ្នាំ​សារពើពន្ធ ក្នុង​ការ​ឆ្លើយ​តប​ទៅ​នឹង​ច្បាប់​ថ្មី​នេះ៕

ប្រែសម្រួល​ដោយ ឌី ខាំ​បូលី

XS
SM
MD
LG