ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សកម្មជន​រំឭក​ខួប​ទី៦​នៃ​ការ​បង្ក្រាប​ហិង្សា​លើ​ផ្លូវ​វេងស្រេង​ដោយ​ស្ងៀមស្ងាត់​


 អ្នកស្រី​​ អ៊ិន លក្ខិណា​ វ័យ​៤៣ ឆ្នាំ​ ដែល​បាន​បាត់​បង់​កូនប្រុស​ម្នាក់​ ក្នុង​ហេតុការណ៍​​បង្ក្រាប​របស់​កម្លាំង​ប្រដាប់​អាវុធ​មក​លើ​បាតុកម្ម​ទ្រង់ទ្រាយ​ធំ​របស់​កម្មករ​ទាមទារ​ដំឡើង​ប្រាក់​ឈ្នួល​អប្បបរមា​​១៦០​ដុល្លារ​ ក្រោយ​ការ​បោះឆ្នោត​ជាតិ​ឆ្នាំ​​២០១៣។ (ហ៊ុល រស្មី/VOA)
អ្នកស្រី​​ អ៊ិន លក្ខិណា​ វ័យ​៤៣ ឆ្នាំ​ ដែល​បាន​បាត់​បង់​កូនប្រុស​ម្នាក់​ ក្នុង​ហេតុការណ៍​​បង្ក្រាប​របស់​កម្លាំង​ប្រដាប់​អាវុធ​មក​លើ​បាតុកម្ម​ទ្រង់ទ្រាយ​ធំ​របស់​កម្មករ​ទាមទារ​ដំឡើង​ប្រាក់​ឈ្នួល​អប្បបរមា​​១៦០​ដុល្លារ​ ក្រោយ​ការ​បោះឆ្នោត​ជាតិ​ឆ្នាំ​​២០១៣។ (ហ៊ុល រស្មី/VOA)

បាតុកម្ម​ដែល​បាន​ផ្ទុះ​ឡើង​កាលពី​ចុង​ឆ្នាំ​២០១៣​ និង​ដើម​ឆ្នាំ​២០១៤​នោះ ​បាន​ក្លាយ​ជា​អំពើ​ហិង្សា​ ហើយ​ក៏​បាន​បង្ក​ឲ្យ​មនុស្ស​បួន​នាក់​ស្លាប់​ និង​ម្នាក់​ទៀត​បាត់​ខ្លួន​មក​ដល់​បច្ចុប្បន្ន​នេះ។​

ក្រុម​សកម្មជន​ការ​ពារ​សិទ្ធិមនុស្ស​ និង​មន្ត្រី​អង្គការ​សង្គមស៊ីវិល​ប្រមាណ​៧០​នាក់​ ​នៅ​ថ្ងៃ​សុក្រ​នេះ​ បាន​ប្រារព្ធ​ខួប​លើក​ទី​៦​នៃ​ការ​បង្ក្រាប​ដ៏​ហិង្សា​ពី​កងកម្លាំង​ប្រដាប់​អាវុធ​លើ​ក្រុម​កម្មករ​ដែល​ទាមទារ​ការ​ដំឡើង​ប្រាក់ខែ​នៅ​ក្រោយ​ការ​បោះ​ឆ្នោត​ជាតិ​ឆ្នាំ​២០១៣។

ការ​ប្រារព្ធ​ខួប​លើក​ទី៦នៃ​ហេតុការណ៍​វាយ​បង្រ្កាប​នេះ​ បាន​ធ្វើឡើង​ ក្នុង​បរិយាកាស​ស្ងប់ស្ងាត់នៅ​ក្នុង​ការិយាល័យ​ ​មជ្ឈ​មណ្ឌល​សម្ព័ន្ធ​ភាព​ការងារ​ និង​សិទ្ធិមនុស្ស​ (Central)។ ក្រុម​សកម្មជន​និយាយ​ថា​ ពួក​គេ​មិន​ចង់​ធ្វើពិធី​ហែរ​ក្បួន​ ដើម្បី​រំឭក​សាធារណជន​ពី​ការ​បង្ក្រាប​នេះ​ ដោយសារ​បារម្ភ​ពី​ការ​រំខាន​របស់​អាជ្ញាធរ​ក្នុង​ទីក្រុង​ភ្នំពេញ។

ក្រុម​សកម្មជន​ និង​មន្ត្រី​អង្គការ​ក្រៅ​រដ្ឋាភិបាល​ បាន​ធ្វើ​ពិធីតាម​បែប​ព្រះ​ពុទ្ធសាសនា​ ដើម្បី​រំឭក​ដល់​វិញ្ញាណក្ខន្ធ​ អ្នក​ដែល​បាន​លះបង់​ជីវិត​ដើម្បី​ ទាមទារ​ការដំឡើង​ប្រាក់​ឈ្នួល​អប្បបរមា​ចំនួន​១៦០​ដុល្លារ​អាមេរិក​ សម្រាប់​កម្មករ​កាត់ដេរ។

បាតុកម្ម​ដែល​បាន​ផ្ទុះ​ឡើង​កាលពី​ចុង​ឆ្នាំ​២០១៣​ និង​ដើម​ឆ្នាំ​២០១៤​នោះ ​បាន​ក្លាយ​ជា​អំពើ​ហិង្សា​ ហើយ​ក៏​បាន​បង្ក​ឲ្យ​មនុស្ស​បួន​នាក់​ស្លាប់​ និង​ម្នាក់​ទៀត​បាត់​ខ្លួន​មក​ដល់​បច្ចុប្បន្ន​នេះ។​

សាច់​ញាតិ​នៃ​ជនរងគ្រោះ​ដែល​បាន​ស្លាប់ ​និង​បាត់​ខ្លួន​ ​ក្នុង​ហេតុការណ៍​បង្ក្រាប​ដ៏​ហិង្សា​នោះ​បាន​និយាយ​ថា​ ពួកគេ​មិន​ទាន់​ទទួល​បាន​យុត្តិធម៌​ចំពោះ​ការ​ស្លាប់ ​និង​ការ​រក​មិន​ឃើញ​សាកសព​នៃអ្នក​ដែល​ជាទី​ស្រឡាញ់​របស់​ពួក​គេ​នៅ​ឡើយ។

អង្គការ​ការពារ​សិទ្ធិមនុស្ស​លីកាដូ​ បាន​ចេញ​សេចក្តី​ថ្លែងការណ៍​មួយ​ នៅ​ថ្ងៃ​សុក្រ​នេះ​ ដោយ​បាន​រំឭក​ដល់​ព្រឹត្តិការណ៍​កាលពី​៦ឆ្នាំ​មុន​ថា​ មួយ​ថ្ងៃ​មុន​ការ​បាញ់​បង្រ្កាបកង​ទាហាន​ប្រដាប់​ដោយ​កាំភ្លើង​មកពី​បញ្ជាការដ្ឋាន​កងពល​តូចទ័ព​ពិសេស​ឆត្រយោង​៩១១​ បាន​ប្រើ​អំពើ​ហិង្សា​វាយដំ​លើ​កម្មករ​ និង​បាន​ចាប់ខ្លួន​កម្មករ​ចំនួន​១០នាក់​ និង​ប្រធាន​សហជីព​មួយ​ចំនួន​ទៀត​ នៅ​ខាង​មុខ​រោងចក្រ​ យ៉ាកជីន​ ក្នុង​រាជធានី​ភ្នំពេញ។ ​ការ​វាយ​បង្ក្រាប​នោះ​ ធ្វើឡើង​ ចំ​ពេល​ដែល​អតីត​គណបក្ស​ជំទាស់​កំពុង​ធ្វើ​ពហិការ​មិន​ចូល​ប្រជុំ​សភា​ដោយសារ​ភាព​ចម្រូង​ចម្រាស​នៃ​លទ្ធផល​បោះឆ្នោត​ជាតិ​ជ្រើសតាំង​តំណាងរាស្រ្ត​ឆ្នាំ២០១៣​។

អង្គការ​លីកាដូ​បាន​បញ្ជាក់​ឲ្យដឹង​ទៀត​ថា​ ក្រៅ​ពី​មនុស្ស​៤នាក់​ដែល​បានស្លាប់​ និង​ម្នាក់ទៀត​ដែល​បាត់​ខ្លួន​ ការ​បង្រ្កាប​ដោយ​ហិង្សា​នៅ​លើ​ផ្លូវ​វេងស្រេង​ បាន​បណ្ដាល​ឱ្យ​មាន​មនុស្ស​៣៨នាក់​រងរបួស​ និង​ត្រូវ​បាន​បញ្ជូន​ទៅ​កាន់​មន្ទីរពេទ្យ​ដើម្បី​សម្រាក​ព្យាបាល៕

XS
SM
MD
LG