មហាសន្និបាតអង្គការសហប្រជាជាតិនឹងបោះឆ្នោតជ្រើសរើសសមាជិកថ្មីចំនួន ១៥ សម្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិនៅខែតុលាខាងមុខ។ អង្គការ UN Watch ដែលជាអង្គការឯករាជ្យមួយឃ្លាំមើលអង្គការសហប្រជាជាតិ បានបញ្ជាក់ថា ការអនុញ្ញាតឱ្យប្រទេសរុស្សី គុយបា និងអារ៉ាប៊ីសាអ៊ូឌីត ដែលជារបបសង្កត់សង្កិននិងផ្តាច់ការ ចូលរួមក្នុងក្រុមប្រឹក្សានេះ នឹងបង្កឲ្យមានការចំអក និងខឹងសម្បារ។
លោក Hillel Neuer នាយកប្រតិបត្តិនៃអង្គការ UN Watch បាននិយាយថា រដ្ឋាភិបាលដែលបដិសេធមិនឱ្យប្រជាពលរដ្ឋរបស់ខ្លួនមានសេរីភាពជាមូលដ្ឋានមិនមានគោលជំហរអ្វីក្នុងការវិនិច្ឆ័យប្រវត្តិសិទ្ធិមនុស្សរបស់ប្រទេសផ្សេងទៀតនោះទេ។
លោក Neuer បញ្ជាក់ដូច្នេះថា៖ «គ្មាននរណាម្នាក់និយាយថា សមាជិកទាំងអស់នៃក្រុមប្រឹក្សាសិទ្ធិមនុស្សត្រូវតែល្អឥតខ្ចោះនោះទេ។ ជាការពិត មិនមានប្រទេសណាមួយល្អឥតខ្ចោះនោះឡើយ។ ក៏ប៉ុន្តែការជ្រើសរើសប្រទេសខ្លះដែលអាក្រក់បំផុតមិនមែនជាយុទ្ធសាស្ត្រល្អទេ ហើយជាការផ្ទុយស្រឡះពីលក្ខខណ្ឌវិនិច្ឆ័យជាផ្លូវការដែលត្រូវបានប្រកាសនៅពេលបង្កើតក្រុមប្រឹក្សាសិទ្ធិមនុស្សនេះឡើង ហើយដែលនៅតែត្រូវអនុវត្តចំពោះការបោះឆ្នោតបន្តទៅទៀត»។
សេចក្តីសម្រេចដែលត្រូវបានអនុម័តនៅពេលក្រុមប្រឹក្សានេះបង្កើតឡើងកាលពីឆ្នាំ ២០១៦ តម្រូវឱ្យប្រទេសជាសមាជិកទាំងអស់ប្រកាន់ខ្ជាប់នូវការផ្សព្វផ្សាយ និងការការពារសិទ្ធិមនុស្ស។ សេចក្តីសម្រេចនេះក៏បានព្រមានផងដែរថា ប្រទេសណាដែលរំលោភធ្ងន់ធ្ងរលើសិទ្ធិមនុស្សអាចត្រូវព្យួរសមាជិកភាព។ ករណីនេះធ្លាប់ត្រូវបានអនុវត្តម្ដងប្រឆាំងនឹងប្រទេសលីប៊ីកាលពីឆ្នាំ ២០១០ បន្ទាប់ពីមានការបង្ក្រាបដ៏ឃោរឃៅរបស់មេដឹកនាំផ្ដាច់ការ Muammar Gaddafi លើក្រុមបាតុករ។
លោក Neuer បានប្រាប់វីអូអេថា ក្រុមប្រឹក្សានេះជាអង្គការនយោបាយ ហើយសម្រាប់ប្រទេសជាច្រើន ជារឿយៗ នយោបាយលុបលើសិទ្ធិមនុស្ស សម្រាប់គោលការណ៍ត្រួសត្រាយរបស់ពួកគេ។លោកបាននិយាយថាជាង ៥០ ភាគរយ នៃសមាជិកក្រុមប្រឹក្សានេះមិនមែនជាប្រទេសមានលទ្ធិប្រជាធិបតេយ្យពេញលេញទេ។
លោក Neuer ថ្លែងដូច្នេះថា៖ «ដោយសារសមាជិកភាពនៃប្រទេសទាំងនោះ កិច្ចការមួយផ្នែកធំនៃការងារត្រឹមត្រូវរបស់ក្រុមប្រឹក្សានេះមិនត្រូវបានធ្វើនោះទេ។ ជាឧទាហរណ៍ ប្រទេសមួយចំនួនដូចជាចិន គុយបា អារ៉ាប៊ីសាអ៊ូឌីត និងទួរគីជាដើម មិនដែលត្រូវបានគេថ្កោលទោសសម្រាប់ការរំលោភសិទ្ធិមនុស្សនោះទេ»។
លោក Rupert Colville ដែលជាអ្នកនាំពាក្យអង្គការសហប្រជាជាតិខាងសិទ្ធិមនុស្ស បាននិយាយថាការឈរឈ្មោះដើម្បីទទួលអាសនៈមួយក្នុងក្រុមប្រឹក្សានេះ មិនមែនជាការអនុវត្តដែលគ្មានការខាតបង់នោះទេ។ លោកបានថ្លែងប្រាប់វីអូអេថា រដ្ឋជាសមាជិកណាមួយដែលមានប្រវត្តិមិនល្អខាងសិទ្ធិមនុស្សនឹងត្រូវពិនិត្យពិច័យ។
លោក Colville បញ្ជាក់ដូច្នេះថា៖ «ជាការពិត នឹងមានផលវិបាកបន្តិចបន្តួច។ វាមិនមែនមានន័យថា នៅពេលបានចូលជាសមាជិកនៃក្រុមប្រឹក្សានេះហើយ អ្នកអាចធ្វើអ្វីបានទាំងអស់នោះទេ។ វាជាការផ្ទុយពីនេះទៅវិញទេ ពីព្រោះនឹងមានការចាប់អារម្មណ៍លើអ្នកច្រើនជាងមុន។ ...លំនាំនៃការបោះឆ្នោតនៃប្រទេសទាំងនេះ និងអ្វីដែលពួកគេនិយាយនៅក្នុងការជជែកដេញដោលគ្នានឹងត្រូវពិនិត្យពិច័យ ហើយនឹងប្រឈមនឹងការរិះគន់ ប្រសិនបើពួកគេជាប់ឆ្នោតដូចប្រទេសដទៃទៀតៗដែរ»។
លោក Colville និយាយថាសមាជិកក្រុមប្រឹក្សាសិទ្ធិមនុស្សត្រូវប្រកាន់ខ្ជាប់នូវស្តង់ដារសិទ្ធិមនុស្សដែលកំណត់ដោយមហាសន្និបាតអង្គការសហប្រជាជាតិ។ លោកថ្លែងថា កាលពីអតីតកាល ប្រទេសខ្លះបានដកសំណើសមាជិកភាពរបស់ខ្លួនចេញ បន្ទាប់ពីមានការរិះគន់ច្រើន។
លោកកត់សម្គាល់ថា ដំណើរការមានរយៈពេលវែងឆ្ងាយនៅមុនពេលមានការបោះឆ្នោត ហើយអ្វីៗអាចកើតមានបាននៅមុនពេលនោះ៕
ប្រែសម្រួលដោយ ឈឹម សុមេធ
