ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អតីត​យុទ្ធជនខ្មែរ​ប្រមូលផ្តុំ​គ្នា​ដើម្បី​បង្កើន​កម្លាំង​នយោបាយ


លោករ៉ូបិន ត្រេវីសូ និង​លោក​ដេវីត សាយអូន នៅកន្លែង​ប្រជុំ​ក្នុង​ទីក្រុង​ឡុងប៊ិច រដ្ឋ​កាលីហ្វញ៉ា។ (ម៉ែន គឹមសេង/VOA)

ថ្ងៃ​ទី១១​ ខែវិច្ឆិកា​ គឺ​ជា​ទិវា​អតីត​យុទ្ធជនដែល​តែងតែ​ត្រូវ​បាន​ប្រារព្ធ​ធ្វើឡើង​នៅ​ទូទាំង​សហរដ្ឋ​អាមេរិក។​ នៅ​ទីក្រុង​ឡុងប៊ិច​ នៃ​រដ្ឋ​កាលីហ្វញ៉ា ​ក្រុម​អតីត​យុទ្ធជន​ខ្មែរ​ដែល​ធ្លាប់​បាន​ចូលរួម​ប្រយុទ្ធ​ប្រកៀក​ស្មា​គ្នា​ជាមួយនឹង​ទាហាន​អាមេរិកាំង​ក្នុង​សម័យ​សង្គ្រាម​នៅវៀតណាម​ក៏​តែងតែ​មក​ជួបជុំគ្នា​ដើម្បី​រំលឹក​ពី​ការ​ប្រយុទ្ធ​នា​សម័យ​នោះ​ផងដែរ។

សម្រាប់​ពិធី​ឆ្នាំ​នេះ​ ពួកគេ​មាន​ការ​ចូលរួម​ច្រើន​ជាង​សព្វ​ដង​ដោយ​សារ​មាន​វត្តមាន​អតីត​មិត្ត​រួម​អាវុធអាមេរិកាំង ​សមាគម​អតីត​យុទ្ធជន​នៅ​ទីក្រុង​ហ្វ្រេសស្នូ​នៃ​រដ្ឋ​កាលីហ្វញ៉ា ​ឡាវមូង ​និង​ខ្មែរ​កម្ពុជា​ក្រោម។

លោក​រ៉ូបឹន ត្រេវីសូ (Ruben Treviso)​ នាយព្រឹន្ទបាល​ចូលនិវត្តន៍​ និង​ជា​អតីត​នាយក​នៃ​វេទិកា​ទាហាន​អាមេរិកាំង​ ​ដែល​បាន​បម្រើការ​នៅ​ប្រទេស​វៀតណាម​ពីឆ្នាំ​១៩៧១​ដល់​១៩៧២ក្នុង​អំឡុង​សង្គ្រាម​វៀតណាម​ក៏​មាន​វត្តមាន​នៅ​ឯ​ពិធី​ជួបជុំ​គ្នា​នា​ថ្ងៃ​នេះ​ដែរ។

កាលពី​នៅក្នុង​សម័យ​សង្គ្រាម​វៀតណាម​ លោក​ត្រេវីសូ​ បាន​ធ្វើការ​ហ្វឹកហ្វឺនក្រុម​អ្នក​ប្រយុទ្ធ​ជាតិ​ម៉ុងតាញ៉ា​ និង​ប្រកៀក​ស្មា​នឹង​ពួកគេ​ប្រយុទ្ធ​នឹង​ក្រុម​ទាហាន​កុម្មុយនីស្ត​វៀតកុង​ ប៉ុន្តែ​សម្រាប់​បេសកកម្ម​លើក​នេះ​គឺ​ការ​ប្រមូល​អតីត​អ្នក​ប្រយុទ្ធ​បាន​រួបរួម​គ្នា។

អតីត​យុទ្ធជន​សង្គ្រាមវៀតណាម​មកពីកម្ពុជា ឡាវ វៀតណាម និង​សហរដ្ឋ​អាមេរិក​ជួបជុំ​ដើម្បី​កសាង​សម្ព័ន្ធមិត្ត។ (ម៉ែន គឹមសេង/VOA)
អតីត​យុទ្ធជន​សង្គ្រាមវៀតណាម​មកពីកម្ពុជា ឡាវ វៀតណាម និង​សហរដ្ឋ​អាមេរិក​ជួបជុំ​ដើម្បី​កសាង​សម្ព័ន្ធមិត្ត។ (ម៉ែន គឹមសេង/VOA)

លោក​បាន​បញ្ជាក់​ប្រាប់​វីអូអេ​ថា៖

«យើង​ព្យាយាម​នាំ​ពួកគេ​ឱ្យ​បាន​ចូលរួម​ជាមួយគ្នា​គឺ​ក្រុម​ផ្សេងៗ ​ដែល​មាន​ឡាវ ​កម្ពុជា​និង​មូង​ ដើម្បី​កសាង​សម្ព័ន្ធ​មិត្ត​មួយ​សម្រាប់​ទាមទារ​កម្លាំង​នយោបាយ​នៅក្នុង​ប្រទេស​នេះ‍»។

កម្លាំង​នយោបាយ​ដែល​លោក​ត្រេវីសូ​ ចង់​បាន ​គឺ​លើស​ពី​ការ​គ្រាន់តែ​មក​ជួបជុំ​គ្នា​និង​ការ​ដើរ​ដង្ហែរក្បួន​ប្រចាំ​ឆ្នាំ​ ដែល​ពួកគេ​បាន​ធ្វើ​ជា​ប្រចាំ។

លោក​បាន​បន្ថែម​ថា៖

«ខ្ញុំ​ចង់​ឱ្យ​សភា​ទទួល​ស្គាល់​ពួកគេ​ ហើយ​បន្ទាប់មក​សម្រាប់​អ្នកណា​ដែល​រងរបួស​ឬ​ឈឺចាប់​ ហើយ​ត្រូវការ​ជំនួយ​ គឺត្រូវ​ទទួល​បាន​ជំនួយ​ពី​ក្រសួង​អតីត​យុទ្ធជន​របស់​សហរដ្ឋ​អាមេរិក‍»។​

លោក​ត្រេវីសូ​ ​យល់​ថា​ ក្នុងពេល​ដែល​ការ​ទាមទារ​នៅ​បន្ត​ វា​ជា​ការណ៍​សំខាន់​ណាស់​ដែល​សមាគម​អតីត​យុទ្ធជន​ទាំងនេះ​ត្រូវ​ទទួលស្គាល់​ក្រុម​អតីត​ទាហាន​ទាំងនោះ​ជាមុន​សិន​ និង​ចងក្រង​ជា​សម្ព័ន្ធភាព​មួយ​ដែល​មាន​កម្លាំង​ខ្លាំងក្លា។

លោក​ដេវីត សាយ​ អូន ​ជា​អតីត​ទាហាន​នៃ​របប​សាធារណរដ្ឋ​ខ្មែរ​តាំងពី​ឆ្នាំ​១៩៧២​ដល់​១៩៧៥ ​ហើយ​បាន​មក​ដល់​សហរដ្ឋ​អាមេរិក​នៅឆ្នាំ​១៩៨១។

បច្ចុប្បន្ន​លោក​រស់នៅ​ក្នុង​ទីក្រុង​ឡុងប៊ិច ​រដ្ឋ​កាលីហ្វញ៉ា​ និង​ជា​អនុប្រធានសមាគម​យុទ្ធជន​សេរីភាព​ខ្មែរ​ដែល​ទើប​បង្កើត​ថ្មី។ សមាគម​យុទ្ធជន​សេរីភាព​ខ្មែរ​នេះ​មាន​បេសកកម្ម ដើម្បី​ផ្តល់​កិត្តិយស​ដល់​អតីត​យុទ្ធជន​ខ្មែរ​ដែល​បាន​បម្រើ​ការងារ​ក្នុង​ពេល​សង្គ្រាម​វៀតណាម​ និង​ក្រុមគ្រួសារ​របស់​ពួកគេ។

លោកបាន​បញ្ជាក់​ប្រាប់​វីអូអេ​ថា៖

«ខ្ញុំ​សប្បាយ​ចិត្ត​ដែល​ដើរក្បួន​មាន​ចូលរួម​ជាមួយ​អាមេរិកាំង។ ខ្ញុំ​ជា​អតីត​យុទ្ធជន​ខ្មែរ​សាធារណរដ្ឋ។ ខ្ញុំ​ជា​កង​រថក្រោះ​នៅ​ដោះ​កញ្ជរ‍»។

លោក រីឆាដ ហួរ ​ជា​អតីត​ទាហាន​កងកាំភ្លើងធំ ​កងពល​ទី៣​នៅ​ដោះកញ្ជរ​ដែរ។ លោក​បាន​បញ្ជាក់​ប្រាប់​វីអូអេ​ថា៖

«ពេល​ដែល​ខ្ញុំ​មក​ដល់​ទីនេះ​ក៏​ជួប​បងប្អូន​មិត្តភក្តិ​ ដែល​ជា​អតីត​ជាមួយ​គ្នា​ឆ្នាំ​៧០​ដល់​៧៥​ដែល​ធ្វើការ​រួមគ្នា​ក្នុង​សម័យ​សាធារណរដ្ឋ​ក៏​បាន​ចូលរួម​ធ្វើការ​រួម​ចំណែក​ជាមួយគ្នា​ ដើម្បី​រំលឹក​នូវ​អនុស្សាវរីយ៍​ដែល​យើង​មាន​បន្សល់​ទុក​នៅ​ដែល​សល់​ពី​ស្លាប់​នៅ​សម័យ​ប៉ុលពត ​គឺ​តែ​ប៉ុណ្ណឹង​ទេ‍»។​

អតីត​អ្នកប្រយុទ្ធ​ទាំងពីរ​រូបនេះ​មិន​បានបង្ហាញ​មហិច្ឆតា​ធំដុំ​ទេ​ នៅ​ពេល​ដែល​វីអូអេ​សាកសួរដោយ​ពួក​គាត់យល់ថា ​ការ​បាន​មក​រស់នៅ​ក្នុង​សហរដ្ឋ​អាមេរិក​គឺ​ជា​ការ​ទទួល​ស្គាល់​នូវ​ការចូលរួម​ចំណែក​ក្នុង​ពេល​អតីតកាល។

ប៉ុន្តែ​លោក​ត្រេវីសូ​ យល់ថា​ ពលិកម្ម​របស់​អតីត​ទាហាន​ខ្មែរ​ ខ្មែរ​កម្ពុជាក្រោម ម៉ុងតាញ៉ា និង​មូង ដែល​បាន​ប្រយុទ្ធ​រួមគ្នា​ជាមួយ​នឹង​ទាហាន​អាមេរិកាំង​ គឺ​បាន​ជួយ​ផ្លាស់ប្តូរ​លទ្ធផល​នៃ​សង្គ្រាម​នៅ​ប្រទេស​វៀតណាម។​

មាន​ទាហាន​អាមេរិកាំង​ជាង​៥៨.០០០នាក់​ បាន​ពលីជីវិត​ក្នុង​សម័យ​សង្គ្រាម​នៅ​វៀតណាម ​ដែល​ចាប់​ផ្តើមពី​ថ្ងៃទី១ ខែវិច្ឆិកា ​ឆ្នាំ​១៩៥៥ ដល់ថ្ងៃទី​៣០ ខែ​មេសា ​ឆ្នាំ​១៩៧៥។ លោក​ត្រេវីសូ​ យល់​ថា ​ទាហាន​អាមេរិកាំង​អាច​បាត់បង់​ជីវិត​លើស​នេះ​ពីរដង ​បើសិន​ជា​គ្មានការ​ជួយ​ជ្រោមជ្រែង​ និង​ការពារ​ពី​ទាហាន​កម្ពុជា ​វៀតណាម​ និង​ឡាវ​នោះ​ទេ៕

XS
SM
MD
LG