កងទ័ពជើងគោកកម្ពុជាបានចាប់ផ្តើមសមយុទ្ធបាញ់គ្រាប់ពិតលើកទីពីរ ដែលមានរយៈពេល ៥ ថ្ងៃដើម្បីពង្រឹងសមត្ថភាព និងបង្ហាញភក្តីភាពលើរដ្ឋាភិបាលរបស់លោកនាយករដ្ឋមន្ត្រីហ៊ុន សែន ក្នុងគ្រាដែលមានការអំពាវនាវពីអតីតគណបក្សប្រឆាំងឱ្យក្រុមយោធាបះបោរ។
សមយុទ្ធនេះមានឈ្មោះថា «ហនុមានមាស២០១៩» កំពុងរៀបចំឡើងនៅខេត្តកំពត ហើយបានចាប់ផ្តើមកាលពីព្រឹកថ្ងៃសៅរ៍ ហើយនិងបន្តរហូតដល់ពុធខាងមុខនេះ។ នេះបើតាមការបញ្ជាក់របស់នាយកដ្ឋានព័ត៌មាននៃអគ្គនាយកដ្ឋានយោធសេវារបស់ក្រសួងការពារជាតិកម្ពុជា។
លោកឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោកនិងជាកូនប្រុសច្បងរបស់លោកនាយករដ្ឋមន្ត្រីហ៊ុន សែន ជាអ្នកដឹកនាំពិធីនោះដោយមានកងទ័ពចូលរួមជាង ១០០០ នាក់ ដោយមានការប្រើប្រាស់អាវុធយុទ្ធភណ្ឌទំនើបៗជាច្រើនប្រភេទ ក្នុងនោះមានការបាញ់គ្រាប់រ៉ុក្កែតហ្វូងប្រភេទ ៤០ កាណុងផងដែរ។
ក្រសួងការពារជាតិកម្ពុជាបានបញ្ជាក់ថា សមយុទ្ធនេះគឺដើម្បីពង្រឹងសមត្ថភាព ចំណេះដឹង ជំនាញដល់នាយទាហាន នាយទាហានរង និងពលទាហាន នៃកងទ័ពជើងគោករបស់ខ្លួន។ ប៉ុន្តែលោកហ៊ុន ម៉ាណែត បញ្ជាក់បន្ថែមថា សមយុទ្ធហនុមានមាស ឆ្នាំ២០១៩ ក៏ជាការ«បង្ហាញដល់ពួកអមិត្ត ពីកងទ័ពកម្ពុជាស្មោះស្ម័គ្រ ជាមួយរាជរដ្ឋាភិបាល»។ នេះបើតាមសេចក្តីរាយការណ៍របស់សារព័ត៌មានក្នុងប្រទេសកម្ពុជា។
លោកសម រង្ស៊ី មេដឹកនាំអតីតគណបក្សប្រឆាំងនៅកម្ពុជា បានប្រកាសជាបន្តបន្ទាប់ឱ្យកងកម្លាំងប្រដាប់អាវុធទាំងយោធានិងប៉ូលិសងើបឡើងប្រឆាំងនឹងការដឹកនាំជាង៣០ឆ្នាំរបស់លោកហ៊ុន សែន ដែលលោកចោទថា បានបង្កើតបក្សពួក និងក្រុមគ្រួសារនិយមហើយលោកអះអាងថា អ្នកគាំទ្រអតីតបក្សប្រឆាំងនឹងគាំទ្រការបះបោរនេះ។
កាលពីសប្តាហ៍មុន រដ្ឋាភិបាលកម្ពុជាក៏បានប្រកាសពីការធ្វើកំណែទម្រង់យោធារបស់ខ្លួនផងដែរដើម្បីកាត់បន្ថយចំនួនឧត្តមសេនីយ៍ជាច្រើនពាន់នាក់ និងដាក់ឱ្យពួកគេកាន់កិច្ចការត្រូវតាមជំនាញ ហើយចំណាត់ការនេះត្រូវបានលោកសម រង្ស៊ី អះអាងថាគឺដើម្បីបញ្ចៀសរដ្ឋប្រហារយោធា ដែលអាចនឹងកើតមានឡើងផងដែរ៕