ក្រុមអ្នកស្ម័គ្រចិត្តសាងសង់ទីបច្ឆាសម្រាប់បូជាសពជនរងគ្រោះនៅថៃ
- Reuters
ក្រុមអ្នកស្ម័គ្រចិត្តនាំគ្នាជម្រះស្មៅនៅក្នុងទីធ្លាវត្តRat Samakee និងបានរៀបឥដ្ឋដើម្បីសាងសង់ជាទីបច្ឆាសម្រាប់បូជាសាកសពជនរងគ្រោះនៅក្នុងហេតុការណ៍បាញ់សម្លាប់រង្គាលមួយនៅមជ្ឈមណ្ឌលមើលថែកូនក្មេងក្នុងប្រទេសថៃដែលបានកើតឡើងកាលពីពេលថ្មីៗនេះ។ ពិធីបូជាសពនេះនឹងប្រព្រឹត្តទៅនៅថ្ងៃអង្គារនេះ នៅក្នុងខេត្ត Nong Bua Lamphu។ ទីបច្ឆាចំនួន ១៩ នឹងត្រូវបានសាងសង់ឡើងនៅក្នុងវត្តនេះ ខណៈដែលសាច់ញាតិមួយចំនួនរបស់សពបានសម្រេចចិត្តដឹកជញ្ជូនសពទាំងនោះទៅកាន់ស្រុកកំណើតរបស់ពួកគេវិញ និងមិនបូជាសពនៅថ្ងៃអង្គារនេះទេ។ ជនរងគ្រោះសរុបទាំងអស់ចំនួន ៣៦ នាក់ដែលរួមមានទាំងកុមារចំនួន ២៤ នាក់ផងនោះត្រូវបានសម្លាប់ដោយកាំបិត និងកាំភ្លើងកាលពីសប្ដាហ៍មុនដោយអតីតប៉ូលិសម្នាក់ ដែលក្រោយមកបានសម្លាប់ខ្លួនឯងនៅក្រុង Uthai Sawan ដែលមានចម្ងាយ ៥០០ គីឡូម៉ែត្រពីរាជធានីបាងកក។ ហេតុការណ៍នោះគឺជាហេតុការណ៍សម្លាប់កុមារច្រើនបំផុតដោយឃាតកតែម្នាក់នៅក្នុងប្រវត្តិសាស្ត្រសម័យទំនើបរបស់ប្រទេសថៃ៕
