ព័ត៌មានសំខាន់ៗអំពីកម្ពុជា សហរដ្ឋអាមេរិក និងតំបន់អាស៊ី មានដូចជា៖ នៅតំបន់បឹងកក់ រាជធានីភ្នំពេញ សកម្មជនដីធ្លីមួយចំនួនត្រូវងាកមកដោះស្រាយបំណុលជំពាក់គ្រឹះស្ថានមីក្រូហិរញ្ញវត្ថុ ខណៈជំងឺកូវីដ១៩ បានបង្អាក់សកម្មភាពសេដ្ឋកិច្ចមួយចំនួនក្នុងប្រទេសកម្ពុជា។ ធនាគារពិភពលោកឲ្យដឹងថា វិបត្តិជំងឺកូវីដ១៩បណ្តាលឲ្យសេដ្ឋកិច្ចកម្ពុជាដើរយឺតខ្លាំងបំផុត ក្នុងរយៈពេល២៥ឆ្នាំមកនេះ ហើយនឹងបណ្តាលឲ្យការងាររបស់ពលរដ្ឋប្រមាណ ១លាន ៧សែននាក់ «ស្ថិតក្នុងហានិភ័យ» ។ អគ្គស្នងការរងនគរបាលជាតិ ឲ្យដឹងថា សមត្ថកិច្ចតាមចាប់ខ្លួនមេបញ្ជាការរងមូលដ្ឋានទ័ពសមុទ្ររាម ពាក់ព័ន្ធជម្លោះបាញ់បោះជាមួយជនជាតិចិននៅកោះរ៉ុង។ អង្គការសង្គមស៊ីវិលជាង ៣០ ជំរុញឲ្យរដ្ឋាភិបាលជួយពលរដ្ឋខ្មែរដែលជាប់គាំងនៅម៉ាឡេស៊ី បានត្រឡប់មកកម្ពុជាវិញ។ ប្រធានាធិបតីអាមេរិកលោក Donald Trump ចេញបទបញ្ជាដើម្បីព្យាយាមពង្រឹងការគ្រប់គ្រងរបស់រដ្ឋលើក្រុមហ៊ុនបណ្តេញសង្គម។ បាតុករហុងកុង បន្តតវ៉ាប្រឆាំងនឹងច្បាប់សន្តិសុខរបស់ចិនលើទីក្រុងហុងកុង។ ឧត្តមសេនីយ៍ចិនម្នាក់ គំរាមវាយប្រហារលើតៃវ៉ាន់ដើម្បីទប់ស្កាត់ការប្រកាសឯករាជ្យរបស់កោះតៃវ៉ាន់។ ព័ត៌មានអន្តរជាតិផ្សេងៗទៀតមានដូចជា៖ មនុស្សជិត៦លាននាក់នៅជុំវិញពិភពលោកបានឆ្លងជំងឺកូវីដ១៩៕