ដើមឈើ Baobab ដែលជានិមិត្តរូបនៃទ្វីបអាហ្វ្រិកកំពុងបាត់បង់
ដើមឈើ Baobab គឺជាដើមឈើនិមិត្តរូបបុរាណមួយដែលមានដើមរាងប៉ោងខុសប្លែកពីគេ។ វាជាដើមឈើដែលដុះនៅតាមតំបន់ជាច្រើននៅទ្វីបអាហ្វ្រិក។ ប៉ុន្តែសព្វថ្ងៃនេះ ដើមឈើដែលដុះចេញពីព្រៃស្មៅនៅភាគខាងត្បូងនៃទ្វីបអាហ្វ្រិកមួយនេះ កំពុងតែបាត់បង់ក្នុងកម្រិតមួយដ៏ខ្ពស់។ អ្នកវិទ្យាសាស្ត្រមិនដឹងថាមកពីមូលហេតុអ្វីនោះទេ ប៉ុន្តែមនុស្សភាគច្រើនសង្ស័យថាមកពីការប្រែប្រួលអាកាសធាតុ។ បើយោងតាមការសិក្សាស្រាវជ្រាវមួយដែលបានបោះពុម្ពផ្សាយនៅក្នុងព្រឹត្តិបត្រ «រុក្ខជាតិធម្មជាតិ» គេឃើញថា ដើមឈើ Baobab ៩ដើមក្នុងចំណោម១៣ដើម ដែលមានអាយុចន្លោះពី១ពាន់ឆ្នាំទៅ២ពាន់៥រយឆ្នាំ បានងាប់ក្នុងរយៈពេលជាង១០ឆ្នាំកន្លងមកនេះ។ អ្នកស្រី Deborah Block នៃ VOA រាយការណ៍ពីរដ្ឋធានី វ៉ាស៊ីនតោន អំពីខេត្ត Limpopo នៃប្រទេសអាហ្វ្រិកខាងត្បូង ដែលគេស្គាល់ថាជាទឹកដីនៃដើមឈើ Baobab នេះ។ លោក ភី សុភាដា ជូនសេចក្ដីប្រែសម្រួល៕