យន្តហោះយោធាសហរដ្ឋអាមេរិកមួយគ្រឿងបានដឹកជញ្ជូនក្តារមឈូសចំនួន ៥៥ ដែលដាក់អដ្ឋិធាតុទាហានអាមេរិកាំងដែលបានស្លាប់នៅក្នុងសម័យសង្គ្រាមកូរ៉េកាលពីជាង ៦ ទសវត្សរ៍មុន។ នេះបើតាមការបញ្ជាក់របស់សេតវិមាននៅក្នុងសេចក្ដីប្រកាសរបស់ខ្លួនកាលពីយប់ថ្ងៃព្រហស្បតិ៍ម្សិលមិញ។
សេចក្ដីប្រកាសរបស់សេតវិមានបានបញ្ជាក់ក្នុងសំណេរដើមថា៖ «យន្តហោះ C-17 របស់កងទ័ពអាកាសសហរដ្ឋអាមេរិកមួយគ្រឿងដែលដឹកជញ្ជូនអដ្ឋិធាតុរបស់ទាហានអាមេរិកាំងបានចាកចេញពីទីក្រុង Wonsan ប្រទេសកូរ៉េខាងជើង។ យន្តហោះនេះត្រូវបានអមដំណើរដោយទាហាននៃទីបញ្ជាការអង្គការសហប្រជាជាតិប្រចាំប្រទេសកូរ៉េខាងត្បូង និងអ្នកជំនាញខាងបច្ចេកទេសនៃទីភ្នាក់ងារទទួលខុសត្រូវកិច្ចការរុករកទាហានអាមេរិកាំងដែលបាត់ខ្លួននៅក្នុងសង្គ្រាម។ យន្តហោះ C-17 នេះ បានបញ្ជូនអដ្ឋិធាតុទាហានអាមេរិកាំងទៅកាន់មូលដ្ឋានទ័ពអាកាស Osan នៅជិតទីក្រុងសេអ៊ូល ប្រទេសកូរ៉េខាងត្បូង ដែលនៅទីនោះ ពិធីផ្លូវការនៃការបញ្ជូនអដ្ឋិធាតុនេះទៅកាន់សហរដ្ឋអាមេរិកនឹងធ្វើឡើងនៅថ្ងៃទី ១ ខែសីហាខាងមុខនេះ»។
លោកឧត្ដមសេនីយ៍ Vincent Brooks មេបញ្ជាការនៃទីបញ្ជាការអង្គការសហប្រជាជាតិ និងទីបញ្ជាការកងកម្លាំងសហរដ្ឋអាមេរិកប្រចាំប្រទេសកូរ៉េខាងត្បូង បាននិយាយថា៖ «វាជាបេសកកម្មដ៏ជោគជ័យមួយ បន្ទាប់ពីមានការសម្របសម្រួលដ៏ទូលំទូលាយ។ ឥឡូវនេះ យើងនឹងរៀបចំផ្ដល់កិត្តិយសដល់ទាហានអាមេរិកាំងដែលបានស្លាប់ មុនពេលបញ្ជូនអដ្ឋិធាតុរបស់ពួកគេទៅកាន់សហរដ្ឋអាមេរិក»។
ថ្ងៃសុក្រទី ២៧ ខែកក្កដានេះ គឺជាខួបលើកទី ៦៥ នៃការចុះហត្ថលេខាលើកិច្ចឈប់វាយប្រយុទ្ធគ្នាដែលបានបញ្ចប់សង្គ្រាមកូរ៉េឆ្នាំ ១៩៥០ ដល់ឆ្នាំ ១៩៥៣ ដែលជាសង្គ្រាមមួយធ្វើឲ្យប្រទេសកូរ៉េបែកជាពីរមកទល់សព្វថ្ងៃនេះ៕