Hello VOA សុខភាព៖ ជំងឺ Alzheimer's និងជំងឺវង្វេងស្មារតីបង្កឡើងដោយសារតែមានការខូចខាតក្នុងកោសិកាខួរក្បាល
អ្នកជំនាញវេជ្ជសាស្ត្រគឺ លោក តាំង តេកហុង វេជ្ជបណ្ឌិតខ្មែរនៅទីក្រុង Jacksonville រដ្ឋ Florida សហរដ្ឋអាមេរិកថ្លែងថាជំងឺ Alzheimer's គឺជាប្រភេទជំងឺវង្វេងច្រើនជាងគេនៃជំងឺវង្វេងស្មារតី(Dementia)។ ជំងឺ Alzheimer's ភាគច្រើនកើតឡើងទៅលើអ្នកជំងឺដែលមានអាយុលើសពី៨០ឆ្នាំឡើងទៅ។ លោកបានថ្លែងបន្តថាអាការៈដែលយើងអាចសង្កេតមើលឃើញថា អ្នកជំងឺមានបញ្ហាក្នុងខួរក្បាល ដូចជាបាត់បង់ការចងចាំ មានបញ្ហាក្នុងការគិតគូរ ការវិនិច្ឆ័យ ការសរសេរ និងការអានជាដើម ជាពិសេសគឺអ្នកជំងឺវង្វេងមិនអាចចងចាំបានថាតើខ្លួនឯងកំពុងស្ថិតនៅកន្លែងណា។ ការធ្វើរោគវិនិច្ឆ័យនៃជំងឺវង្វេងស្មារតីនេះ គឺដោយសារតែមានសសៃរជំពាក់ជំព័ន្ធ(Tangles) និងប្រភេទម្សៅ (Amyloid Plaques) ធើ្វឲ្យកោសិការពិសេសមួយរបស់ខួរក្បាលស្លាប់ ដែលជាកន្លែងធ្វើឲ្យមានការចងចាំ។ ដូច្នេះហើយបានជាអ្នកជំងឺដែលចាប់ផ្តើមមានជំងឺនេះដំបូងឡើយកើតមានអាការៈភ្លេចភ្លាំង។លោកវេជ្ជបណ្ឌិតក៏បានបន្ថែមទៀតថា អ្នកដែលមានហានិភ័យខ្ពស់អាចប្រឈមនឹងការកើតជំងឺនេះ មានដូចជាអ្នកដែលធ្លាប់មានបញ្ហាប៉ះពាល់ខួរក្បាល កើតជំងឺស្ទះសរសៃឈាមក្នុងខួរក្បាល(Stroke) មានជំងឺលើសឈាម ជំងឺទឹកនោមផ្អែម អ្នកមានប្រវត្តិគ្រួសារកើតជំងឺនេះ អ្នកទទួលទានគ្រឿងស្រវឹង និងអ្នកជក់បារីជាដើម៕ (ស៊ូ ពេជ្រចិន្តា, Hello VOA, រដ្ឋធានីវ៉ាស៊ីនតោន, ២០ កក្កដា ២០១៧)
