ភ្ជាប់​ទៅ​គេហទំព័រ​ទាក់ទង

ឯកសារ​យោធា​មួយ​ត្រូវ​​គេ​ជឿ​ថា​​​រត់​ពន្ធ​ចេញ​ពី​កូរ៉េខាង​ជើង


ឯកសារ​យោធា​​សម្ងាត់​​របស់​កូរ៉េ​ខាង​ជើង​​ដែល​​បាន​ធ្លាយ​ចេញ។

មាន​ឯកសារ​យោធា​មួយ​គេ​និយាយ​ថា​ ​ត្រូវ​គេ​រត់ពន្ធ​ចេញ​ពី​ប្រទេស​កូរ៉េ​ខាង​ជើង។​ ឯកសារ​នេះ​បញ្ចេញ​ឲ្យ​ដឹង​ពី​ការ​ព្រួយ​បារម្ភ​របស់​រដ្ឋា​ភិបាល​ក្រុង​ព្យូងយ៉ាង​អំពី​បច្ចេក​វិទ្យា​អេឡិចត្រូនិក​ក្នុង​វិស័យ​សង្គ្រាម​ដែល​ប្រើប្រាស់​ដោយ​សហ​រដ្ឋ​អាមេរិក​ និង​ប្រទេស​កូរ៉េ​ខាងត្បូង។​ ឯកសារ​នេះ​ក៏​ប្រាប់​ឲ្យ​ដឹង​ដែរ​ថា​ យោធា​កូរ៉េ​ខាងជើង​ប្រើប្រាស់​ប្រភេទ​ថ្នាំ​លាប​ដែល​រ៉ាដា​ចាប់​មិន​បាន​ ហើយ​និង​យុទ្ធ​វិធី​លាក់​បាំង​ផ្សេងៗ​ទៀត​ដើម្បី​លាក់​អាវុធ​របស់​ខ្លួន។

ពួក​អ្នក​វិភាគ​ដែល​សិក្សា​អំពី​ឯកសារ​ដែល​អះអាង​ជា​របស់​កូរ៉េ​ខាងជើង​នេះ​និយាយ​ថា​ ​រដ្ឋា​ភិបាល​ក្រុង​ព្យូងយ៉ាង​បាន​ចាត់​វិធាន​ការណ៍​គ្រប់​បែប​យ៉ាង​ដើម្បី​កែ​តម្រូវ​នូវ​ភាព​ចាញ់​ប្រៀប​ខាង​ផ្នែក​យោធា​យ៉ាង​សម្បើម​ដែល​ប្រទេស​នេះ​នឹង​ប្រឈម​មុខ ​ប្រសិន​បើ​សង្គ្រាម​ផ្ទុះ​ឡើង​នៅ​លើ​ឧបទ្វីប​កូរ៉េ​នោះ។

ទោះបី​មិន​មាន​មធ្យោបាយ​ដើម្បី​ឲ្យ​បាន​ដឹង​យ៉ាង​ច្បាស់​ថា​ ​ឯកសារ​នេះ​ពិត​ជា​របស់​កូរ៉េ​ខាងជើង​ក៏​ដោយ​ ​ក៏​ពួក​មន្រ្តី​កូរ៉េ​ខាង​ត្បូង​និង​មន្ត្រី​សហ​រដ្ឋ​អាមេរិក​ដែល​បាន​ឃើញ​ឯកសារ​នោះ​ ​ជឿ​ថាវាជា​ឯកសារ​ពិត​ប្រាកដ។

លោក​ Daniel Pinkston​ ​ដែល​ធ្វើ​ការ​នៅ​អង្គការ​ក្រុម​វិបត្តិ​អន្តរជាតិ​ (International​ Crisis​ Group)​ មាន​មូលដ្ឋាន​នៅ​ក្រុង​សេអ៊ូល ​គឺ​ជា​អ្នក​វិភាគ​យូរយារ​ណាស់​មក​ហើយ​អំពី​ប្រទេស​កូរ៉េ​ខាងជើង​និង​អំពី​យោធា​របស់​ប្រទេស​នោះ។ ​លោក​បាន​ពិនិត្យ​មើល​ឯកសារ​នោះ​តាម​ការ​ស្នើ​របស់​ VOA​ សម្លេង​សហ​រដ្ឋ​អាមេរិក។​ លោក​បាន​និយាយ​ថា​ ​ឯកសារ​នោះ​សំខាន់​ណាស់។

«យោង​តាម​ការ​រៀបចំ​ផែនការ​របស់​ពួក​គេ​ និង​ការ​ប្រុង​ប្រៀប​របស់​ពួក​គេ​ ​ខ្ញុំ​គិត​ថា​ ​មាន​ព័ត៌មាន​ដ៏មាន​ផល​ប្រយោជន៍​ខ្លះ​ដែល​អាច​យក​ចេញ​ពីឯកសារ​នេះ»។

ឯកសារ​អាយុ​៥​ឆ្នាំ​នោះ​ផ្តល់​ការ​ណែនាំ​ពី​របៀប​ធ្វើ​ថ្នាំ​លាប​យន្តហោះ​ ​នាវា​ចម្បាំង​ ​និង​រថក្រោះ​ ដើម្បី​កុំ​ឲ្យ​រ៉ាដាចាប់​បាន។​ ឯកសារ​នោះ​ក៏​ពន្យល់​អំពី​របៀប​ធ្វើ​របស់​ដាក់​បញ្ឆោត​ ​ធ្វើ​ផ្លូវ​យន្តហោះ​ឡើង​ចុះ​ក្លែង​ក្លាយ​ ហើយ​និង​បំភាន់​សត្រូវ​ដោយ​រៀបចំ​បន្លំ​ធ្វើ​ជា​កង​ឯកភាព​ក្លែង​ក្លាយ​ដែល​មាន​ចលនា។ ​យុទ្ធ​វិធី​បែបប​នេះ​បាន​ប្រើប្រាស់​ជា​យូរយា​ណាស់​មក​ហើយ​ដោយ​កង​យោធា​ប្រទេស​លោក​ខាងលិច។

លោក ​Pinkston​ អតីត​អ្នក​វិភាគ​អំពី​កងទ័ព​អាកាស​សហ​រដ្ឋ​អាមេរិក​លើ​បញ្ហា​ប្រទេស​កូរ៉េ​ខាងជើង​ និយាយ​ថា​ ​«ឯកសារ​សម្ងាត់​នេះ​ទំនង​ជា​ត្រូវ​បាន​ចែក​ចាយ​ទៅ​ឲ្យ​ពួក​មេ​បញ្ជាការ​ហើយ​និង​ពួក​អ្នក​ឯកទេស​យោធា​ជាន់​ខ្ពស់​ដែល​ពាក់​ព័ន្ធ​នឹង​បច្ចេក​ទេស​អេឡិចត្រូនិក​ក្នុង​វិស័យ​សង្គ្រាម។​ ឯកសារ​នេះ​ប្រហែល​ធ្វើ​ឲ្យ​មាន​ការ​ភ្ញាក់​ផ្អើល​តិចតួច​ ក៏​ប៉ុន្តែ​ឯកសារ​នេះ​ក៏​បង្ហាញ​ពី​ការ​យល់​ដឹង​យ៉ាង​ច្បាស់​ពី​ដំបូង​អំពី​សារៈ​សំខាន់​នៃ​ប្រព័ន្ធ​អេឡិច​ត្រូនិក ​ប្រព័ន្ធ​គមនាគមន៍​ ​ប្រព័ន្ធ​ព័ត៌មាន​ ​កំព្យូទ័រ​ ហើយ​វា​មាន​ផល​ប៉ះពាល់​ការ​បញ្ជា​ ​និង​ការ​ត្រួតត្រា​កងទ័ព​យ៉ាង​ដូចម្តេច។​ មាន​ការ​ទទួល​ស្គាល់​ថា​ ​ប្រសិន​បើ​ការ​បញ្ជាការ​ ​ហើយ​នឹង​ការ​ត្រួតត្រា​របស់​យើង​អន់​ថយ​ ដូច្នេះ​វា​មាន​ផល​ប៉ះពាល់​យ៉ាង​ខ្លាំង​លើ​សមត្ថ​ភាព​របស់​គេ​ដើម្បី​ធ្វើ​កិច្ច​ប្រតិបត្តិ​ការ​យោធា»។

ព័ត៌មាន​អំពី​ឯកសារ​នោះ​ត្រូវ​បាន​រាយ​ការណ៍​លើក​ដំបូង​ដោយ​កាសែត​ Chosun Ilbo។ ​កាសែត​នៅ​សេអ៊ូល​នេះ​បាន​ដកស្រង់​សំដី​អ្នក​ជំនាញ​ផ្នែក​ស៊ើប​ការណ៍​សម្ងាត់​កូរ៉េ​ខាងត្បូង​ យក​មក​ចុះ​ផ្សាយ​ថា​ ​យុទ្ធ​វិធី​លាក់​បាំង​របស់​កូរ៉េ​ខាងជើង​មានការ​ជឿនលឿន​ជាង​ការ​រំពឹង​ទុក។

តាម​ភាសា​បច្ចេក​ទេស​ ​កូរ៉េ​ខាងជើង​និង​ខាងត្បូង​នៅ​មាន​សង្គ្រាម​នឹង​គ្នា​នៅ​ឡើយ​ ពីព្រោះ​ប្រទេស​ទាំង​ពីរ​នេះ​មិន​ដែល​បាន​ចុះ​ហត្ថលេខា​លើ​សន្ធិ​សញ្ញា​សន្តិភាព​ទេ​ នៅ​ពេល​បញ្ចប់​សង្គ្រាម​កូរ៉េ​ក្នុង​ឆ្នាំ​១៩៥៣។ ​កូរ៉េ​ខាងជើង​មាន​កងទ័ព​ជាង​១​លាន​នាក់ ​ភាគ​ច្រើន​នៃ​កងទ័ព​ទាំង​នោះតាំង​នៅ​ជិត​តំបន់​គ្មាន​កងទ័ព​ដែល​បាន​បែក​ចែក​ឧបទ្វីប​នេះ។​ កូរ៉េ​ខាងត្បូង​មាន​កង​ទ័ព​ដែល​ជាប់​កាតព្វ​កិច្ច​ប្រហែល​៦សែន​នាក់​ ហើយ​សហ​រដ្ឋ​អាមេរិក​ដាក់​កងទ័ព​ប្រហែល​២​ម៉ឺន​៨​ពាន់​នាក់​ក្នុង​ប្រទេស​កូរ៉េ​ខាងត្បូង។

ទោះ​ជា​កូរ៉េ​ខាងជើង​មាន​ទាហាន​ច្រើន​ជាង​ក្តី​ ​ក៏​ពួក​អ្នក​វិភាគ​កងទ័ព​និយាយ​ថា​ ​ពួក​គេ​មាន​អាវុធ​មិន​គ្រប់គ្រាន់​ ​ហើយ​អាវុធ​របស់​ពួក​គេ​ភាគ​ច្រើន​ចាស់​ហើយ​និង​ហួស​សម័យ​ ​ជាពិសេស​បើ​ប្រៀប​ធៀប​ជាមួយ​អាវុធ​របស់​សហ​រដ្ឋ​អាមេរិក​និង​កូរ៉េ​ខាងត្បូង​ដែល​មាន​បច្ចេក​វិទ្យា​ខ្ពស់។​ ទោះ​ជា​យ៉ាង​នោះ​ក៏ដោយ​ ​គេ​សង្ស័យ​ថា​ កូរ៉េ​ខាងជើង​មាន​ទាំង​អាវុធ​ជីវសាស្រ្ត​និង​អាវុធ​គីមី​ ហើយ​កូរ៉េខាង​ជើង​និយាយ​ថា​ ​ខ្លួន​កំពុង​ធ្វើ​អាវុធ​នុយ​ក្លេអ៊ែរ​ដែរ។

ព័ត៌មាន​ VOA ​ទទួល​បាន​ចំនួន​៤៨​ទំព័រ​នៃ​ឯកសារ​៨០​ទំព័រ​នេះ​ពី​អង្គការ​ Christian​ មួយ​ឈ្មោះ​ Caleb​ Mission។

អង្គការ​ Christian ​ដ៏​តូច​ដែល​តាំង​នៅ​ទីក្រុង​ Cheonan នេះ​ ​បាន​ជួយ​ពួកអ្នក​រត់​ចេញ​ពី​ប្រទេស​កូរ៉េ​ខាង​ជើង។ ​លោក​ Kim Sung-eun ​អ្នក​ផ្សព្វ​ផ្សាយ​គ្រឹស្ត​សាសនា​របស់​អង្គការ​នេះនិយាយ​ថា​ មនុស្ស​ដែល​លោក​ទាក់​ទង​ក្នុង​រដ្ឋ​កុម្មុយ​និស្ត​ឯកោ​នេះ​ហ៊ាន​ប្រថុយ​ជីវិត​របស់​ខ្លួន​ ហើយ​និង​ជីវិត​របស់​គ្រួសារ​គេ​ដើម្បី​យក​ឯកសារប្រភេទ​នេះ​ចេញ​ពី​ប្រទេស​កូរ៉េ​ខាងជើង។

អ្នក​ផ្សព្វ​ផ្សាយ​សាសនា​នោះ​និយាយ​ថា​ ​លោក​អាច​រក​បាន​ឯកសារ​យោធា​សម្ងាត់​ខ្លះ​របស់​រដ្ឋា​ភិបាល​ក្រុង​ព្យុងយ៉ាង​ ​ពីព្រោះ​មនុស្ស​មាន​ឥទ្ធិ​ពល​ក្នុង​ប្រទេស​កូរ៉េ​ខាងជើង​កំពុង​ធ្វើការ​ជា​មួយ​ក្រុម​របស់​លោក។

បេសក​កម្ម​ដោយ​ការ​រត់​ពន្ធ​ម៉ាស៊ីន​ថត​រូប​ដែល​មាន​រាង​ដូច​ជា​ស្លាប​ប៉ាកា​នោះ​ ក៏​បាន​លូច​លាក់​នាំ​យក​រូប​វីដេអូ​អំពី​ជីវិត​ក្នុង​ប្រទេស​កូរ៉េ​ខាងជើង​មក​ដែរ​ រួម​បញ្ចូល​ទាំង​ផ្សារ​លក់​ម្ហូប​អាហារ​នៅ​កណ្តាល​វាល។ ​ម៉ាស៊ីន​ថត​រូប​ដែល​មាន​រាង​ដូច​ជា​ស្លាប​ប៉ាកា​នោះ​បាន​ផ្តល់​រូបភាព​ដ៏​កម្រ​អំពី​ស្ថាន​ភាព​នា​ពេល​បច្ចុប្បន្ន​នៅ​ខាង​ក្នុង​ប្រទេស​ដ៏​ក្រីក្រ​នេះ។

កូរ៉េ​ខាង​ជើង​មាន​ការ​រឹតបន្តឹង​ដល់​ការ​ធ្វើ​ដំណើរ​របស់​ភ្ញៀវ​ទេសចរណ៍​ពី​ខាង​ក្រៅ​ប្រទេស​ដែល​មាន​តែ​មួយ​ចំនួន​តួច​ប៉ុណ្ណោះ​ គឺ​មាន​ការ​កំណត់​អំពី​កន្លែង​ធ្វើ​ដំណើរ ហើយ​កំណត់​អំពី​អ្វី​ដែល​ពួក​គេ​អាច​ថត​រូប ​ឬ​ថត​វីដេអូ​បាន៕

ប្រែ​សម្រួល​ដោយ ជឹង ប៉ូជីន

XS
SM
MD
LG