កម្មវិធីវិទ្យុ
ព័ត៌មានពេលព្រឹក៖ ៧ ឧសភា ២០២១
ព័ត៌មានសំខាន់ៗអំពីកម្ពុជាមានដូចជា អាជ្ញាធរបន្តបិទខ្ទប់តំបន់ឆ្លងខ្លាំងនៃជំងឺកូវីដ១៩ មួយសប្តាហ៍ទៀត ដោយប្រតិកម្មនឹងការរិះគន់។ អាជ្ញាធរខេត្តមួយចំនួនតម្រូវឲ្យពលរដ្ឋចូលភូមិសាស្រ្តធ្វើចត្តាឡីស័ក ប៉ុន្តែលោក ហ៊ុន សែន ប្រតិកម្ម។ រីឯព័ត៌មានអន្តរជាតិវិញមានដូចជា ឥណ្ឌាបន្តមានអ្នកឆ្លងនិងស្លាប់ថ្មីលើសពីថ្ងៃមុនៗ ខណៈអ្នកជំនាញព្រមានពីរលកឆ្លងរាតត្បាតទី ៣ ដ៏កាចសាហាវទៀត។ ប្រទេសថៃមានគម្រោងចាក់វ៉ាក់សាំងជំងឺកូវីដ១៩ ដល់ជនបរទេស។ ចិនថ្កោលទោសការថ្លែងរបស់ក្រុមប្រទេស G7 ដែលវាយប្រហារលើខ្លួននិងគាំទ្រកោះតៃវ៉ាន់នោះ។ ប្រទេសចិនផ្អាកការសន្ទនាសេដ្ឋកិច្ចជាមួយអូស្ត្រាលី ស្របពេលដែលទំនាក់ទំនងកំពុងរកាំរកូស។ ប្រធានសហភាពអឺរ៉ុបត្រៀមខ្លួនក្នុងការពិភាក្សាស្តីពីការលើកលែងកម្មសិទ្ធិបញ្ញាសម្រាប់វ៉ាក់សាំងជំងឺកូវីដ១៩។ ការប្រឆាំងត៉វ៉ាក្នុងប្រទេសកូឡុំប៊ីឈានដល់ថ្ងៃទី៨ហើយ ខណៈប៉ូលិសប្រើឧស្ម័នបង្ហូរទឹកភ្នែកទៅលើក្រុមបាតុករ។ តើកិច្ចព្រមពៀងវិនិយោគរវាងសហភាពអឺរ៉ុបនិងចិន នឹងត្រូវបរាជ័យឬយ៉ាងណា៕
ព័ត៌មានពេលរាត្រី៖ ៧ ឧសភា ២០២១
ព័ត៌មានសំខាន់ៗអំពីកម្ពុជាមានដូចជា ក្រុមសិទ្ធិមនុស្សថា អាជ្ញាធរគួរផ្តល់លំហសាធារណៈក្នុងតំបន់ក្រហមសម្រាប់អ្នកកាសែតប្រមូលព័ត៌មាន។ រដ្ឋាភិបាលដាក់យុទ្ធសាស្រ្តសម្រុកចាក់វ៉ាក់សាំងបង្ការជំងឺកូវីដ១៩ ដោយពឹងផ្អែកលើវ៉ាក់សាំងរបស់ចិន។ ខ្យល់កន្ត្រាក់ខ្លាំងធ្វើឲ្យខូចខាតផ្ទះពលរដ្ឋរាប់រយខ្នងនៅទូទាំងប្រទេស។ វីរុសរកឃើញនៅកម្ពុជាអាចផ្តល់គន្លឹះដល់ការស្វែងរកប្រភពវីរុសកូវីដ១៩។ រីឯព័ត៌មានអន្តរជាតិវិញមានដូចជា លោក Biden ទៅរដ្ឋ Louisiana ដើម្បីស្វែងរកការគាំទ្រចំពោះគម្រោងហេដ្ឋារចនាសម្ព័ន្ធជាតិរបស់លោក។ ប្រធានអង្គការសុខភាពពិភពលោក ថា ករណីឆ្លងកូវីដ១៩ ក្នុង២សប្តាហ៍ចុងក្រោយមានច្រើនជាងចំនួនឆ្លងសរុបកាលពី ៦ខែដំបូង។ ភាពតានតឹងរឿងជម្លោះដែននេសាទត្រីរវាងអង់គ្លេសនិងបារាំង បានធូរស្រាលវិញ។ សកម្មជនគំាទ្រលទ្ធិប្រជាធិបតេយ្យហុងកុង លោក Joshua Wong ត្រូវបានកាត់ទោសជាប់ពន្ធនាគារ ១០ខែបន្ថែមទៀត។ ១០០ថ្ងៃក្រោយឡើងកាន់តំណែង៖ តើលោក Biden ធ្វើតាមការសន្យារបស់លោកអំពីគោលការណ៍នៃការចូលរួមពហុភាគីឬទេ? ជប៉ុន ថៃ និងវៀតណាមព្យាយាមប្រជែងបន្ទាប់ឥទ្ធិពលចិននៅឡាវ និងព័ត៌មានផ្សេងទៀត៕