ប្រធានាធិបតីអ៊ុយក្រែនលោក Volodymyr Zelensky កាលពីថ្ងៃព្រហស្បតិ៍បាននិយាយថា វាជារឿង «មិនអាចទទួលយកបាន»ទេ ដែលអឺរ៉ុបផ្តល់សម្បទានឲ្យវិមានក្រឹមឡាំងដើម្បីបញ្ឈប់ការលុកលុយរបស់ខ្លួនលើអ៊ុយក្រែន បន្ទាប់ពីទីក្រុងមូស្គូបានទាមទារឱ្យលោកខាងលិចចូលរួមការចរចាដោយផ្ទាល់ស្តីពីការបញ្ចប់សង្រ្គាម។ នេះបើយោងតាមទីភ្នាក់ងារព័ត៌មាន AFP។
ទីក្រុងកៀវ កំពុងតែព្យាយាមបង្កើនសម្ពាធលើសម្ព័ន្ធមិត្តរបស់ខ្លួនសម្រាប់ការគាំទ្របន្ថែមទៀតក្នុងការប្រយុទ្ធប្រឆាំងនឹងក្រុងមូស្គូ បន្ទាប់ពីជ័យជម្នះរបស់លោក Donald Trump ក្នុងការបោះឆ្នោតប្រធានាធិបតីសហរដ្ឋអាមេរិកក្នុងសប្តាហ៍នេះ។
លោក Trump បានអួតថា លោកអាចបញ្ចប់ជម្លោះក្នុងរយៈពេលប៉ុន្មានម៉ោង ហើយបានរិះគន់ជំនួយអាមេរិកម្តងហើយម្តងទៀតដល់ទីក្រុងកៀវ។ ប្រធានាធិបតីរុស្ស៊ីលោក Vladimir Putin បានទាមទារឲ្យអ៊ុយក្រែន ប្រគល់ទឹកដីបន្ថែមទៀត នៅភាគខាងកើត និងខាងត្បូង ដើម្បីជាលក្ខខណ្ឌនៃកិច្ចចរចាសន្តិភាព ខណៈទីក្រុងកៀវបានច្រានចោលម្តងហើយម្តងទៀត មិនព្រមលះបង់ទឹកដីជាថ្នូរនឹងសន្តិភាព។
អ៊ុយក្រែន និងមនុស្សជាច្រើននៅលោកខាងលិចបារម្ភថា ដំណោះស្រាយណាមួយដែលផ្តល់រង្វាន់ដល់លោក Putin នឹងធ្វើឱ្យមេដឹកនាំវិមានក្រឹមឡាំងមានភាពក្លាហាន និងនាំឱ្យមានការឈ្លានពានកាន់តែខ្លាំង។
ថ្លែងទៅកាន់មេដឹកនាំអឺរ៉ុបក្នុងកិច្ចប្រជុំកំពូលមួយក្នុងប្រទេសហុងគ្រី លោក Zelensky បានបន្ទោសអ្នកដែលកំពុងដាក់សម្ពាធឱ្យលោកយល់ព្រមនឹងការទាមទារដ៏តឹងរ៉ឹងមួយចំនួនរបស់លោក Putin។
យោងតាមច្បាប់ចម្លងនៃសេចក្តីថ្លែងការណ៍ដែលបានផ្តល់ទៅឱ្យទីភ្នាក់ងារព័ត៌មានAFP ដោយការិយាល័យប្រធានាធិបតីអ៊ុយក្រែន លោក Zelensky បាននិយាយថា៖ «មានការពិភាក្សាជាច្រើនអំពីតម្រូវការឲ្យធ្វើតាមលោក Putin ឲ្យដកខ្លួន ឲ្យធ្វើសម្បទានមួយចំនួន»។
លោកបានបន្ថែមថា «វាមិនអាចទទួលយកបានសម្រាប់អ៊ុយក្រែន និងមិនអាចទទួលយកបានសម្រាប់អឺរ៉ុបទាំងអស់»។ លោកក៏បានចោទប្រកាន់មេដឹកនាំអឺរ៉ុបមួយចំនួន ដោយមិនបានបញ្ជាក់ឈ្មោះ ចំពោះការជំរុញអ៊ុយក្រែន «យ៉ាងខ្លាំង» ឱ្យសម្របសម្រួល។
លោក Zelensky បាននិយាយថា៖ «យើងត្រូវការសព្វាវុធគ្រប់គ្រាន់ មិនមែនការគាំទ្រក្នុងការពិភាក្សានោះទេ។ ការជិតស្និទជាមួយលោក Putin នឹងមិនអាចជួយអ្វីបានទេ។ អស់លោកមួយចំនួនបានជិតស្និទជាមួយលោក Putin អស់រយៈពេល ២០ឆ្នាំមកហើយ ហើយអ្វីៗកាន់តែអាក្រក់ទៅៗតែប៉ុណ្ណោះ»៕