កាលពីថ្ងៃចន្ទនេះ ស្ថានទូតសាធារណរដ្ឋតួកគីប្រចាំកម្ពុជាបានស្នើដល់ក្រសួងការបរទេសកម្ពុជាឲ្យបិទដំណើរការសកម្មភាពរបស់សាលាហ្សាម៉ាន់ ប៉ុន្តែនៅព្រឹកថ្ងៃព្រហស្បតិ៍ទី២៥នេះ អ្នកតំណាងនៃសាលានេះបង្ហាញថា គេនឹងមិនមានគម្រោងបញ្ឈប់សកម្មភាពគ្រឹះស្ថានអប់រំហ្សាម៉ាន់នោះទេ។
បន្ទាប់ពីមានសំណើឲ្យរដ្ឋាភិបាលកម្ពុជាបិទគ្រឹះស្ថានអប់រំ Zaman (ហ្សាម៉ាន់) កន្លងទៅនេះដោយស្ថានទូតតួកគីប្រចាំកម្ពុជា គ្រឹះស្ថានអប់រំដែលត្រូវគេចោទប្រកាន់ថា មានការពាក់ព័ន្ធនឹងរដ្ឋប្រហារនៅប្រទេសតួកគីនៅថ្ងៃទី១៥ខែកក្កដាកន្លងទៅនេះ បានបង្ហាញគោលជំហររបស់ខ្លួនក្នុងការបន្តដំណើរការកម្មវិធីសិក្សារបស់ខ្លួនដដែល។
កាលពីថ្ងៃចន្ទទី២២នេះលោក ILhan Kemal Tug ឯកអគ្គរដ្ឋទូតសាធារណរដ្ឋតួកគីប្រចាំនៅកម្ពុជាបានជួបជាមួយលោក ប្រាក់ សុខុន រដ្ឋមន្រ្តីក្រសួងការបរទេសកម្ពុជា ដោយលោកបានស្នើរដ្ឋាភិបាលកម្ពុជាឲ្យបិទសាលាហ្សាម៉ាន់ ដោយសំអាងថា មានហានិភ័យពាក់ព័ន្ធនឹងភេរវកម្មនិងរដ្ឋប្រហារនៅប្រទេសតួកគី។
លោក Ilhan Kemal Tug ឯកអគ្គរដ្ឋទូតសាធារណរដ្ឋតួកគីប្រចាំនៅកម្ពុជា ជួបពិភាក្សាជាមួយនឹងលោក ប្រាក់ សុខុន រដ្ឋមន្ត្រីការបរទេសកម្ពុជា អំពីការស្នីសុំឲ្យបិទសាសា Zaman ទាំងអស់នៅរាជធានីភ្នំពេញ កាលពីថ្ងៃចន្ទ ទី២២ ខែសីហា ឆ្នាំ២០១៦។ (អ៊ិត សូធឿត/VOA)
ប៉ុន្តែបើតាមលោក អ៊ីសា អាន ទេព្លី នាយកសាលាបឋមសិក្សាចំណេះទូទៅនៃក្រុមហ៊ុនហ្សាម៉ាន់ថ្លែងប្រាប់អ្នកសារព័ត៌មានកាលពីព្រឹកថ្ងៃព្រហស្បតិ៍ ទី២៥ ខែសីហានេះថា សាលារបស់លោកនឹងបន្តកម្មវិធីសិក្សារបស់ខ្លួនដូចធម្មតានៅខែក្រោយនេះ បើទោះជាមានការស្នើសុំឲ្យបញ្ឈប់ដំណើរការយ៉ាងណាក្ដី។ លោក អ៊ីសា បានឲ្យដឹងថា ហ្សាម៉ាន់ ជាគ្រឹះស្ថានដែលបង្រៀនជាភាសាខ្មែរនិងភាសាអង់គ្លេសដែលមានប្រភពកំណើតមកពីប្រទេសតួកគី និងអប់រំសិស្សអំពីវប្បធម៌កម្ពុជានិងតាមស្តង់ដាអន្តរជាតិ។
លោកនិយាយថា៖
«សរុបទៅសាលាយើងនៅតែមានដំណើរការ មិនការស្នើសុំនោះទេ យើងកំពុងតែពង្រីកនិងបើកបវេសនកាលនៅខែកញ្ញាខាងមុខនេះ។ យើងមិនមានការជាប់ពាក់ព័ន្ធនឹងស្ថានទូតតួកគី ឬក៏រដ្ឋាភិបាលតួកគីនោះទេ យើងជាក្រុមហ៊ុនឯកជន ជាសាលាឯករាជ្យមួយ ដោយមានឈ្មោះជាហ្សាម៉ាន់អន្តរជាតិ»។
លោកខៀវ សុភ័គ អ្នកនាំពាក្យក្រសួងមហាផ្ទៃប្រាប់ VOA កាលពីថ្ងៃអង្គារ ទី២៣ ខែសីហា កន្លងទៅនេះថា ក្រសួងនឹងស្រាវជ្រាវអំពីភ័ស្តុតាងទាក់ទងនឹងការសង្ស័យថា មានអំពើភេរវកម្មពាក់ព័ន្ធនឹងសាលាហ្សាម៉ាន់ ឲ្យបានច្បាស់លាស់លើការចោទប្រកាន់នានា ដើម្បីធ្វើសេចក្ដីសម្រេច។
«សំខាន់យើងត្រូវរកមើលភ័ស្តុតាងសិន ហើយក្រសួងមិនបានដឹងរឿងហ្នឹងអីទេ។ ហើយកន្លងមកឯកអគ្គរដ្ឋទូតកំពុងសុំជួបសម្ដេចក្រឡាហោមដែរ រឿងរាយការណ៍អំពីរដ្ឋប្រហារនៅប្រទេសតួកគីមិនបានសម្រេចនេះដែរ។ ជំនាញរបស់យើងកំពុងតែស៊ើបអង្កេតដែរ តែមិនទាន់ដឹងថា ការពាក់ព័ន្ធនឹងកម្រិតណា។ ក្នុងការបិទការអី ធម្មតាតែមានការពាក់ព័ន្ធយើងត្រូវមានវិធានការហើយ ប៉ុន្តែយើងត្រូវរកភ័ស្តុតាងឲ្យបានត្រឹមត្រូវដែរ»។
តែទោះជាយ៉ាងណាក្ដី VOA មិនអាចសុំការអត្ថាធិប្បាយបន្ថែមពីលោក គៀត ច័ន្ទថារិទ្ធិ អ្នកនាំពាក្យនគរបាលជាតិអំពីលទ្ធផលនៃការស៊ើបអង្កេតលើការពាក់ព័ន្ធនឹងការចោទប្រកាន់របស់ស្ថានទូតតួកគី ដែលថាគ្រឹះស្ថានអប់រំហ្សាម៉ាន់សង្ស័យមានជាប់ពាក់ព័ន្ធនឹងអំពើភេវកម្ម និងជាប់ពាក់ព័ន្ធនឹងរដ្ឋប្រហារដែលមិនបានសម្រេចនៅប្រទេសតួកគីកាលពីខែកក្ដដាកន្លងទៅនេះ។
តាំងពីឆ្នាំ១៩៩៧ រហូតមកដល់ពេលនេះ សាលា Zaman (ហ្សាម៉ាន់) មានសិស្សចុះឈ្មោះចំនួនប្រហែល២.០០០នាក់ ដែលកំពុងសិក្សាចាប់ពីថ្នាក់មតេ្តយ្យរហូតដល់កម្រិតមហាវិទ្យាល័យ។
អ្នកស្រី ប៊ូ អាណូរិតា អាណាព្យាបាលម្នាក់នៃកូនសិស្សសាលាបឋមសិក្សាចំណេះទូទៅនៃសាលាហ្សាម៉ាន់អន្តរជាតិ បានថ្លែងប្រាប់ VOAថា អ្នកស្រីមិនចង់ឲ្យមានការបិទសាលានោះទេ ដោយសារការផ្លាស់ប្តូរសាលារបស់កូនអ្នកស្រីមានការលំបាក ហើយអ្នកស្រីមានប្រសាសន៍ថាសាលានេះអាចជាប់ពាក់ព័ន្ធនឹងអំពើភេរវកម្មនោះទេ។
អ្នកស្រីនិយាយថា៖ «ខ្ញុំមិនចង់ឲ្យបិទទេ ព្រោះពិបាកដូរសាលាកូន កូនមិនស្គាល់បរិយាកាសថ្មី ពិបាកសញ្ញាប័ត្រយើងគេផ្ទេរមិនបាន។ ខ្ញុំមិនជឿថា មានភេរវកម្ម បើសិនជាកូនខ្មែររៀននៅហ្នឹង»។
បន្ទាប់ពីមានរដ្ឋប្រហារនៅប្រទេសតួកគីនៅថ្ងៃទី១៥ ខែកក្កដាកន្លងទៅ សាលាអន្តរជាតិ Zaman (ហ្សាម៉ាន់) បានចេញសេចក្តីថ្លែងការណ៍ជាបន្តបន្ទាប់ថ្កោលទោសយ៉ាងខ្លាំងចំពោះក្រុមរដ្ឋប្រហារនៅប្រទេសតួកគី និងការចោទប្រកាន់របស់ឯកអគ្គរដ្ឋទូតតួកគីប្រចាំកម្ពុជា។ សេចក្តីថ្លែងការណ៍នោះបន្តថា ក្រុមហ៊ុន Zaman (ហ្សាម៉ាន់) មិនមានការគាំទ្រដល់ការចូលរារាំងរបស់ក្រុមយោធាណាមួយ ព្រោះប្រជាពលរដ្ឋតួកគីទាំងអស់នៅក្នុងប្រទេសតួកគីអាចនឹងទទួលគ្រោះថ្នាក់ចំពោះការប៉ុនប៉ងនេះ។
សេចក្ដីថ្លែងការណ៍នេះ បន្តថា ស្ថាបនិករបស់សាលាអន្តរជាតិ Zaman (ហ្សាម៉ាន់) បានចាប់ផ្តើមស្ថាបនាសាលានេះដោយផ្អែកលើស្មារតី និងទស្សនវិស័យពីលោក Fethullah Gulen មានជាប់ពាក់ព័ន្ធជាមួយអង្គការភេរវកម្ម Futhullah Gulen Terrorist Organization (FETO) ដែលត្រូវគេចោទថាជាមេដឹកនាំក្រុមនៅពីក្រោយរដ្ឋប្រហារខាងលើនេះ។ តំណាងសាលាហ្សាម៉ាន់អះអាងថា លោក Gulen មិនដែលមានការចូលរួមក្នុងការងាររដ្ឋបាល ឬជាម្ចាស់ស្របច្បាប់ណាមួយរបស់សាលា Zaman (ហ្សាម៉ាន់) ឡើយ។
លោក Hakan Atasever មន្រ្តីទំនាក់ទំនងសាធារណៈនៃក្រុមហ៊ុនហ្សាម៉ាន់ប្រាប់ VOAតាមរយៈសារអេឡិចត្រូនិកនៅរសៀលថ្ងៃព្រហស្បតិ៍នេះថា គ្រឹះស្ថានអប់រំហ្សាម៉ាន់បដិសេធចោលការចោទប្រកាន់នានារបស់ស្ថានទូតតួកគីប្រចាំប្រទេសកម្ពុជា ហើយលោកទាមទារឲ្យមានការបង្ហាញភ័ស្តុតាងអំពីការចោទរបស់លោកឯកអគ្គរដ្ឋទូតលើរឿងនេះ។
VOA មិនអាចទាក់ទងលោក រស់ សាលីន អ្នកនាំពាក្យក្រសួងអប់រំយុវជន និងកីឡា ដើម្បីផ្ដល់ព័ត៌មានអំពីវិធានការរបស់ក្រសួងអប់រំលើគ្រឹះស្ថានអប់រំហ្សាម៉ាន់នៅឡើយទេ។ដោយទូរស័ព្ទរបស់លោករោទិ៍ តែពុំមានអ្នកលើក។ តែតំណាងសាលាហ្សាម៉ាន់ប្រាប់ថា ពួកគេមិនទាន់បានទទួលលិខិតជាផ្លូវការទាក់ទងនឹងការបិទសាលារបស់គេនៅឡើយទេ៕