អ្វីដែលទំនងជាការបាត់ខ្លួនជើងឯកកីឡាវាយកូនបាល់ឬតឺនីសអូឡាំពិកចិនម្នាក់ដែលបានចោទប្រកាន់ថា នាងបានរងការបៀតបៀនផ្លូវភេទពីអតីតមន្ត្រីជាន់ខ្ពស់ម្នាក់នៃការិយាល័យនយោបាយមជ្ឈិមបក្សហាក់ដូចបង្ហាញថា រដ្ឋាភិបាលចិនចង់ទប់ស្កាត់រាល់ការគំរាមកំហែងណាមួយដល់ការគ្រប់គ្រងរបស់ខ្លួន។ នេះបើតាមពួកអ្នកសង្កេតការណ៍បញ្ជាក់កាលពីថ្ងៃព្រហស្បតិ៍ ទី១៨ ខែវិច្ឆិកា។
អ្នកស្រី Peng Shuai អាយុ៣៥ឆ្នាំ ជាអតីតអ្នកលេងកីឡាវាយកូនបាល់ម្ខាង២នាក់ប្រចាំអាជីពដែលបានពានរង្វាន់លេខ១របស់ពិភពលោក បាននិយាយតាមសេវាកម្មបណ្តាញសង្គមចិន Weibo កាលពីថ្ងៃទី២ ខែវិច្ឆិកាថា អតីតឧបនាយករដ្ឋមន្ត្រីលោក Zhang Gaoli បានធ្វើការបៀតបៀនផ្លូវភេទលើអ្នកស្រី។ នេះបើតាមសេចក្តីរាយការណ៍របស់វីអូអេផ្សាយជាភាសាចិន។
ពួកអាជ្ញាធរចិន បានលុបចោលការចុះផ្សាយនេះយ៉ាងឆាប់រហ័ស។ ក៏ប៉ុន្តែនៅសប្តាហ៍នេះ ក្រុមអង្គការសិទ្ធិមនុស្ស បានចាប់ផ្តើមសួរថា តើគេអាចរកអ្នកស្រី Peng នៅទីណា ហើយសមាគមវាយកូនបាល់តឺនីសស្ត្រីដែលមានទីតាំងនៅក្នុងសហរដ្ឋអាមេរិក បានទាមទារថា ការអះអាងរបស់អ្នកស្រី «ត្រូវតែដោះស្រាយឲ្យបានត្រឹមត្រូវ មានន័យថា ការចោទប្រកាន់នោះ ត្រូវតែស៊ើបអង្កេតឲ្យបានពេញលេញ ត្រឹមត្រូវមានតម្លាភាពនិងដោយគ្មានការចាប់ពិរុទ្ធ។ សមាគមនេះក៏បានព្រមានដកការប្រកួតចេញពីប្រទេសចិនផងដែរ។
រដ្ឋាភិបាលកុម្មុយនីស្តរបស់ចិន កម្រអត់ឱនឲ្យការធ្វើអត្ថាធិប្បាយអវិជ្ជមានអំពីពួកមន្ត្រីខ្លួនណាស់។ មានសេចក្តីរាយការណ៍ថា ពួកអ្នកជំទាស់ដូចជាអ្នកនិពន្ធ អ្នកប្រឆាំងនិងអ្នកលក់សៀវភៅនៅក្រុងហុងកុង បានបាត់ខ្លួនបន្ទាប់ពីវាយប្រហារលើថ្នាក់ដឹកនាំ។ អ្នកខ្លះ ប្រឈមនឹងប្រព័ន្ធផ្លូវច្បាប់។
លោក Alexander Vuving ជាសាស្ត្រាចារ្យនៅឯមជ្ឈមណ្ឌល Daniel K. Inouye សម្រាប់ការសិក្សាសន្តិសុខតំបន់អាស៊ីប៉ាស៊ីហ្វិកនៅកោះហាវ៉ៃ បាននិយាយថា៖ «យើងអាចភ្ជាប់តម្រុយនានានិងសង្ស័យថា រដ្ឋាភិបាលក្រុងប៉េកាំងបានស្ថិតនៅពីក្រោយរឿងទាំងអស់នេះ។ ពួកគេបានស្ថិតនៅក្នុងការឃុំឃាំងរបស់បក្ស»។
លោក Michael McCarty អ្នកស្រាវជ្រាវនៅសាកលវិទ្យាល័យ Baylor បានថ្លែងនៅក្នុងការសិក្សាមួយថា ការគ្រប់គ្រងរបស់អ្នកដឹកនាំចិនទៅលើការចែកចាយព័ត៌មាន «ផ្អែកលើគំនិតបែបប្រវត្តិសាស្ត្រមួយដែលថាអធិរាជចិនដើរតួជាអ្នកសម្របសម្រួលរវាងឋានសួគ៌និងឋានមនុស្សគឺមេដឹកនាំចិនជាតួអង្គពាក់កណ្តាលទេវ»។
លោក Zhang អាយុ៧៥ឆ្នាំ ជាសមាជិកគណៈកម្មាធិការអចិន្ត្រៃយ៍នៃការិយាល័យនយោបាយមជ្ឈិមបក្សកុម្មុយនីស្តនិងជាលេខាធិការបក្សកុម្មុយនីស្តនៅទីក្រុងកំពង់ផែ Tianjin។ លោកបានធ្វើជាប្រធានគណៈកម្មាធិការគ្រប់គ្រងដែលត្រួតពិនិត្យគម្រោងទំនប់វារីអគ្គីសនី Three Georges Dam និងគម្រោងផ្លូវក្រវាត់ពាណិជ្ជកម្មរបស់ចិន។
លោក Huang Kwei-bo ជាសាស្ត្រាចារ្យជំនួយផ្នែកការទូតនៅឯសាកលវិទ្យាល័យជាតិ Chengchi នៅទីក្រុងតៃប៉ិនៃកោះតៃវ៉ាន់ បាននិយាយថា៖ «ខ្ញុំគិតថា គំនិតនៅពីក្រោយបញ្ហាដូចនេះជានិច្ចកាលគឺក្រុមទាំងមូលសំខាន់ជាងបុគ្គលម្នាក់ៗហើយស្ថិរភាពស្ថិតនៅពីលើអ្វីៗទាំងអស់ ដូច្នេះបើតាមគំនិតនេះ ជាការពិត លោក អ្នក អាចមានការគំនិតផ្សេងៗក៏ប៉ុន្តែ ធ្វើយ៉ាងណាមិនឱ្យមានផលប៉ះ ពាល់ដល់ស្ថិរភាពទូទៅនោះទេ ហើយថា ស្ថិរភាពទាំងមូល រួមបញ្ជូលការត្រួតត្រារបស់គណបក្សកុម្មុយនីស្តផងដែរ»។
អ្នកស្រី Lu Pin អ្នកបង្កើតបណ្តាញព័ត៌មានសំឡេងស្ត្រី (Feminist Voices)ដែលជាបណ្តាញព័ត៌មានអនឡាញដ៏ធំបង្អស់ស្តីពីបញ្ហារបស់ស្ត្រីនៅប្រទេសចិន បាននិយាយថា ការចោទប្រកាន់របស់អ្នកស្រី Peng ធ្វើឱ្យពួកអ្នកកាន់អំណាចចិនមានការជាប់ពាក់ព័ន្ធនៅក្នុងចលនាស្ត្រី #MeToo។
អ្នកស្រី Lu បាននិយាយទៀតថា៖ «បទពិសោធន៍របស់អ្នកស្រី បានជំរុញឲ្យពលរដ្ឋគិតអំពីចលនាស្ត្រី ពីព្រោះចលនានេះជៀសមិនផុតពីការប្រឈមនឹងអ្នកមានអំណាចទាំងនោះ។ ខ្ញុំក៏មើលឃើញដែរថា មនុស្សមានការភ័យខ្លាចពីការបាត់ខ្លួនរបស់អ្នកស្រី Peng។ ខ្ញុំទស្សន៍ទាយថា វាជាការពិបាកដើម្បីនិយាយថា ភាពអង់អាចក្លាហានរបស់អ្នកស្រី បានលើកទឹកចិត្តមនុស្សគ្រប់រូបនោះ។ ក៏ប៉ុន្តែ នៅក្នុងគំនិតរបស់ខ្ញុំគឺថា ការនិយាយមិនសំចៃមាត់របស់អ្នកស្រី Peng មានឥទ្ធិពលយ៉ាងខ្លាំងដល់ចលនា #MeToo របស់ចិន»។
ចិនកំពុងជួបរឿងចម្រូងចម្រាស
បណ្តាញទូរទស្សន៍ផ្លូវការ Global Television Network របស់ចិន បានចុះផ្សាយសារអ៊ីមែលជាភាសាអង់គ្លេស កាលពីថ្ងៃពុធដែលគេអះអាងថាបានសរសេរដោយអ្នកស្រី Peng ដែលនិយាយថា អ្នកស្រីមិនបានបញ្ជាក់ថាសេចក្តីថ្លែងការណ៍របស់សមាគមតឺនីសនោះពិតទេ ហើយថា អ្នកស្រីកំពុងសម្រាកនៅឯផ្ទះ។
គណៈកម្មាធិការអូឡាំពិកអន្តរជាតិបាននិយាយថា ខ្លួន «បានទទួលការលើកទឹកចិត្តដោយការធានាថា អ្នកស្រីមានសុវត្ថិភាព» ។ អ្នកស្រី Peng បានចូលរួមការប្រកួតកីឡាអូឡាំពិករដូវក្តៅនៅក្នុងឆ្នាំ ២០០៨ ២០១២និងឆ្នាំ២០១៦។
ទោះជាយ៉ាងណាក៏ដោយ ក្រុមអង្គការសិទ្ធិមនុស្សនិងអ្នកសង្កេតការណ៍កីឡាវាយកូនបាល់តឺនីសបានសង្ស័យពីការលាក់បាំង។ បណ្តាញព័ត៌មាន Tennis.com’s បានចុះផ្សាយតាមTwitter ថា «ខ្ញុំពិបាកជឿថា អ្នកស្រី Pang Shuai ប្រាកដជាបានសរសេរអ៊ីមែលដែលយើងបានទទួលនោះ»។
"I have a hard time believing that Peng Shuai actually wrote the email we received."A suspicious note shared by CGTN claiming to be from Peng Shuai to Steve Simon has only escalated concerns for the WTA player%27s wellbeing. MORE: https://t.co/tKxzoabogE#WhereIsPengShuai pic.twitter.com/6PcO10sVvY
— TENNIS (@Tennis) November 17, 2021
អង្គការសិទ្ធិមនុស្ស Human Rights Watch បាននិយាយថា សញ្ញា Hashtag #WhereisPengShuai «កំពុងត្រូវចែកចាយច្រើនទូទាំងពិភពលោក» ហើយជើងឯកវាយកូនបាល់ផ្សេងទៀតដូចជា នាង Naomi Osaka, Serena Williams និង Novak Djokovic បានបង្កើនការព្រួយកង្វល់អំពីអ្វីដែលទំនងជាការបាត់ខ្លួននេះ។
អង្គការសិទ្ធិមនុស្ស Human Rights Watch បានបញ្ជាក់ថា៖ «រដ្ឋាភិបាលចិនដែលជាដៃគូកីឡាអូឡាំពិករដូវរងាររបស់គណៈកម្មាធិការកីឡាអូឡាំពិកអន្តរជាតិ (IOC) ជារឿយៗបានធ្វើឲ្យបុគ្គលបាត់ខ្លួនដោយការបង្ខំដោយសារការបញ្ចេញទស្សនៈឬសកម្មភាពរបស់ពួកគេត្រូវបានគេចាត់ទុកថាជាបញ្ហាឬជាការអាម៉ាស់»។
លោក Daryl Adiar ជាសាស្ត្រាចារ្យជំនួយផ្នែកការរៀបចំចាត់ចែងកីឡានៅសាលាពាណិជ្ជកម្មនៃសាកលវិទ្យាល័យបច្ចេកវិទ្យា Sydney នៃប្រទេសអូស្ត្រាលី បាននិយាយថា៖ «ដោយប្រើពាក្យប្រៀប ធៀបក្នុងកីឡាវាយកូនបាល់នោះ បាល់ឥឡូវនេះស្ថិតនៅខាងចិនហើយ»។
លោកនិយាយទៀតថា៖ «អ្នកស្រី Peng Shuai ទំនងជាកំពុងស្វះស្វែងរកសវនាការនៅក្នុងតុលាការ ជាអ្វីដែលប្រហែលជាពួកអ្នកប្តឹងផ្តល់ក្នុងពិភពលោក គួរតែមានសិទ្ធិទទួលបាន»។
ពួកមន្ត្រីចិន មិនបានធ្វើអត្ថាធិប្បាយអំពីស្ថានភាពរបស់អ្នកស្រី Peng Shuai ឬអំពីការទាមទាររបស់សមាគមកីឡាវាយកូនបាល់នោះទេ៕
ប្រែសម្រួលដោយលោក ជឹង ប៉ូជីន