ជារៀងរាល់ឆ្នាំថ្នាំវ៉ាក់ស៊ាំងជួយសង្គ្រោះជីវិតមនុស្សរាប់លាននាក់ តាំងពីកុមាររហូតដល់មនុស្សចាស់។ វេជ្ជបណ្ឌិតនៅជុំវិញពិភពលោកចង់ឲ្យមនុស្សដឹងថាថ្នាំវ៉ាក់ស៊ាំងពិតជាមានប្រសិទ្ធភាពជួយការពារអាយុជីវិតពួកគេបាន។ លោកស្រីវេជ្ជបណ្ឌិត Flavia Bustreo ធ្វើការជាច្រើនឆ្នាំនៅឯអង្គការសុខភាពពិភពលោក និងគម្រោងភាពជាដៃគូរវាងវិស័យរដ្ឋនិងឯកជនដើម្បីលើកកម្ពស់ការចាក់វ៉ាក់ស៊ាំង ឬ GAVI នៅតាមប្រទេសក្រីក្រនានានៅជុំវិញពិភពលោកបានមានប្រសាសន៍ថា៖ «ការចាក់ថ្នាំការពារនិងថ្នាំវ៉ាក់ស៊ាំងគឺជាយុទ្ធសាស្រ្តដ៏មានប្រសិទ្ធភាពនៃវិស័យសុខភាពសាធារណៈ ដែលយើងកំពុងធ្វើ»។
អង្គការសុខភាពពិភពលោក WHO បាននិយាយថាជាង៣៥ឆ្នាំកន្លងមកនេះកុមារចំនួន១៣លាននាក់បានបាត់បង់ជីវិតដោយសារជំងឺផ្សេងៗ ដែលជាជំងឺអាចជួយសង្គ្រោះបាន ប្រសិនបើកុមារទាំងនោះបានទទួលថ្នាំវ៉ាក់ស៊ាំងត្រឹមត្រូវ។
ថ្នាំវ៉ាក់ស៊ាំងមានសម្រាប់ការពារជំងឺដែលបណ្តាលឲ្យស្លាប់ជាច្រើន និងអាចការពារកុមារពីជំងឺរាគរូស ក្អក កញ្ជ្រិល គ្រុនស្វិតដៃជើង និងជំងឺផ្សេងៗទៀត។
អង្គការ WHO មានគោលដៅផ្តល់ថ្នាំវ៉ាក់ស៊ាំងដល់កុមារឲ្យបាន១ពាន់លាននាក់ នៅក្នុងប្រទេសដែលមានហានិភ័យខ្ពស់ ចំនួន២៧ប្រទេសក្នុងទ្វីបអាហ្វ្រិក ត្រឹមឆ្នាំ២០២៦ ដើម្បីការពារជំងឺគ្រុនលឿងដែលជំងឺឆ្លងពីសត្វមូសអាចបណ្តាលឲ្យស្លាប់។
តាមរយៈកម្មវិធី Africa 54 របស់ VOA លោកវេជ្ជបណ្ឌិត Ken Redcross បានពន្យល់ពីមូលហេតុ ដែលបណ្តាឲ្យជំងឺគ្រុនលឿងក្លាយជាជំងឺផ្តាច់ជីវិតមនុស្ស។ លោកបានពន្យល់យ៉ាងដូច្នេះថា៖ «វាជាជំងឺដ៏សាហាវ។ វាអាចធ្វើឲ្យថ្លើម និងក្រលៀនលែងដំណើរការ។ វាក៏អាចធ្វើឲ្យឈាមកកនៅតាមសន្លាក់ សាច់ដុំ និងផ្នែកផ្សេងៗទៀតនៃរាងកាយមនុស្ស» ។
កិច្ចប្រឹងប្រែងដើម្បីឲ្យពលរដ្ឋជិត២៤លាននាក់បានទទួលវ៉ាក់ស៊ាំងការពារជំងឺផ្សេងៗបានបរាជ័យនៅក្នុងប្រទេសប្រេស៊ីល ដោយសារតែមនុស្សមួយចំនួនបារម្ភថាថ្នាំវ៉ាក់ស៊ាំងគ្មានសុវត្ថិភាព។ ក្រុមមន្រ្តីបានព្យាយាមពន្យល់បកស្រាយពីព័ត៌មានមិនពិតទាំងនេះ។ លោកវេជ្ជបណ្ឌិត Redcross បានថ្លែងបន្តថា ថ្នាំវ៉ាក់ស៊ាំងមិនត្រឹមតែមានសុវត្ថិភាពទេ ថែមទាំងមានប្រសិទ្ធខ្ពស់ថែមទៀតផង។ លោកវេជ្ជបណ្ឌិតបានបញ្ជាក់ថា៖ «វាមានប្រសិទ្ធភាពដល់ទៅ៩០ភាគរយ។ ដូច្នេះវាមានប្រសិទ្ធភាពណាស់»។
បច្ចុប្បន្នកុមារចំនួនជាង៨៥ភាគរយបានទទួលថ្នាំវ៉ាក់ស៊ាំងការពារជំងឺកញ្ជ្រិល និងជំងឺបណា្តលឲ្យស្លាប់ផ្សេងៗទៀត ប៉ុន្តែលោកស្រីវេជ្ជបណ្ឌិត Bustreo និយាយថា វាមិនទាន់គ្រប់គ្រាន់នោះទេ។ លោកស្រីវេជ្ជបណ្ឌិតបានថ្លែងថា៖ «យើងចាំបាច់ត្រូវផ្តល់វ៉ាក់ស៊ាំងឲ្យបានដល់មនុស្សប្រហែល៩០ភាគរយ ដើម្បីឲ្យមានប្រសិទ្ធភាព។ មានន័យថាយើងអាចការពារកុមារដែលបានទទួលវ៉ាក់ស៊ាំង ប៉ុន្តែដោយសារតែការឆ្លងមេរោគធ្លាក់ចុះ នោះយើងក៏ការពារកុមារដែលមិនបានទទួលវ៉ាក់ស៊ាំងផងដែរ»។
អង្គការ WHO កំពុងជំរុញប្រទេសនានាឲ្យពង្រឹងការផ្តល់វ៉ាក់ស៊ាំងឲ្យបានទៀងទាត់។ ក្នុងចំណោមគោលដៅនានារបស់អង្គការសុខភាពពិភពលោកដើម្បីសម្រេចបានត្រឹមឆ្នាំ២០២០ មានដូចជាការសម្រេចនូវកិច្ចប្រឹងប្រែងជាអន្តរជាតិដើម្បីបញ្ចប់ជំងឺគ្រុនស្វិតដៃជើង ដែលឥឡូវនេះមានប្រទេសតែបីប៉ុណ្ណោះដែលនៅមានជំងឺនេះ។ ទាំងអស់នេះគឺដោយសារប្រសិទ្ធភាពខ្ពស់នៃថ្នាំបង្ការ។ អង្គការសុខភាពពិភពលោកក៏មានគោលដៅគ្រប់គ្រងលើជំងឺដែលអាចការពារដោយថ្នាំបង្ការ និងមានគោលដៅបង្កើតថ្នាំវ៉ាក់ស៊ាំងថ្មីសម្រាប់មេរោគអេដស៍និងជំងឺផ្សេងៗទៀត ដែលកំពុងកើតឡើងក្នុងពិភពលោកសម័យទំនើបនេះ៕
ប្រែសម្រួលដោយ ស៊ូ ពេជ្រចិន្តា