អង្គការសុខភាពពិភពលោក WHO រួមជាមួយនឹងកម្មវិធីអភិវឌ្ឍន៍របស់អង្គការសហប្រជាជាតិ UNDP និងសាកលវិទ្យាល័យ Georgetown បានបង្កើតមន្ទីរពិសោធន៍ច្បាប់ទាក់ទិននឹងជំងឺកូវីដ១៩ ដែលជាប្រព័ន្ធទិន្នន័យមួយរៀបចំឡើងសម្រាប់ជួយប្រទេសនានានៅក្នុងការបង្កើតបទបញ្ញត្តិឱ្យបានល្អដើម្បីប្រយុទ្ធប្រឆាំងនឹងការឆ្លងរាតត្បាតជាសាកលនៃជំងឺកូវីដ១៩ និងវិបត្តិសុខភាពដទៃទៀត។
នៅក្នុងសន្និសីទកាសែតអំពីជំងឺកូវីដ១៩ កាលពីថ្ងៃព្រហស្បតិ៍ទី ២៣ ខែកក្កដាកន្លងទៅនេះ លោក Tedros Adhanom Ghebreyesus អគ្គនាយកនៃអង្គការ WHO បាននិយាយថា ប្រព័ន្ធទិន្នន័យមន្ទីរពិសោធន៍ច្បាប់នេះប្រមូលផ្ដុំដោយក្បួនច្បាប់នានា ដែលប្រទេសទាំងឡាយបានអនុវត្តកន្លងមកដើម្បីឆ្លើយតបទៅនឹងការរាតត្បាតនៃជំងឺកូវីដ១៩។
ក្បួនច្បាប់ទាំងនោះមានដូចជា សេចក្ដីប្រកាសស្ថានភាពអាសន្ន វិធានការដាក់មនុស្សនៅដាច់ពីគេ ការតាមដានជំងឺនេះ ការណែនាំអំពីការពាក់ម៉ាស់ ការរក្សាគម្លាតពីគ្នា និងលទ្ធភាពទទួលបានថ្នាំព្យាបាល និងវ៉ាក់សាំង។
លោក Tedros Adhanom Ghebreyesus បានថ្លែងថា មន្ទីរពិសោធន៍ខាងច្បាប់នេះក៏មានការស្រាវជ្រាវអំពីគោលការណ៍ច្បាប់សម្រាប់ទប់ទល់នឹងជំងឺកូវីដ១៩ និងការវិភាគអំពីផលប៉ះពាល់នៃច្បាប់ទាក់ទិននឹងសុខភាពសាធារណៈផងដែរ។
ប្រព័ន្ធទិន្នន័យនេះត្រូវបានរៀបចំឡើងដើម្បីផ្តល់ឱ្យប្រទេសនានានូវសេចក្តីណែនាំសម្រាប់ការអនុវត្តន៍ឲ្យបានល្អប្រសើរបំផុត នៅពេលចាត់ចែងការឆ្លើយតបខាងផ្លូវច្បាប់ចំពោះវិបត្តិជំងឺកូវីដ១៩ នេះ។
លោក Tedros បាននិយាយថា ច្បាប់គឺជាឧបករណ៍សំខាន់ដែលរដ្ឋាភិបាលបានប្រើដើម្បីជាការឆ្លើយតបទៅនឹងការឆ្លងរាតត្បាតនៃជំងឺនេះ ដូច្នេះវាសំខាន់ណាស់ដែលច្បាប់ទាំងនេះត្រូវតាក់តែងឱ្យបានល្អ។
លោកបានបញ្ជាក់ថា ច្បាប់មិនគួរមានលក្ខណៈបង្ខិតបង្ខំទេ ក៏ប៉ុន្តែត្រូវការពារសុខភាពសាធារណៈ និងការពារសិទ្ធិមនុស្សស្របពេលជាមួយគ្នា។ លោកបានបន្តថា ប្រព័ន្ធទិន្នន័យនេះនឹងបន្តរីកទៅមុខទៀត នៅពេលដែលមានការដាក់បញ្ចូលប្រទេស និងប្រធានបទច្រើនជាងមុនបន្ថែមទៀត។
ទាក់ទិននឹងករណីឆ្លងជំងឺកូវីដ១៩ នេះ សហរដ្ឋអាមេរិកនៅតែនាំមុខគេក្នុងការមានអ្នកឆ្លងជំងឺនេះច្រើនជាងគេបំផុតនៅលើពិភពលោក ដោយកន្លងមកមានចំនួនជាង ៤ លាន នាក់រួចមកហើយ។
លោក Tedros បានជំរុញមនុស្សនៅទូទាំងពិភពលោកឱ្យ «ចាត់ទុកការសម្រេចចិត្តរបស់ពួកគេអំពីទីកន្លែងដែលត្រូវទៅ អ្វីដែលត្រូវធ្វើ និងអ្នកដែលត្រូវជួប ថាជាការសម្រេចចិត្តបែបស្លាប់រស់ ដោយសារតែវាគឺពិតជាដូច្នេះមែន»៕
ប្រែសម្រួលដោយលោក ឈឹម សុមេធ