ប្រធានអង្គការសុខភាពពិភពលោកលោក Tedros Adhanom Ghebreyesus បានបញ្ជាក់កាលពីថ្ងៃច័ន្ទម្សិលមិញថា លោកនឹងចាប់ផ្ដើមវាយតម្លៃដោយឯករាជ្យលើការឆ្លើយតបរបស់អង្គការនេះចំពោះវិបត្តិជំងឺកូវីដ១៩ «នៅពេលសមរម្យណាមួយឆាប់ៗខាងមុខនេះ»។
លោក Tedros បានសន្យាដូច្នេះ បន្ទាប់ពីអង្គភាពប្រឹក្សាមើលការខុសត្រូវឯករាជ្យមួយបានចេញផ្សាយនូវរបាយការណ៍បណ្ដោះអាសន្នលើកដំបូងបង្អស់របស់ខ្លួនអំពីការឆ្លើយតបរបស់អង្គការសុខភាពពិភពលោកចំពោះវិបត្តិជំងឺកូវីដ១៩ ពីខែមករាដល់ខែមេសា។
របាយការណ៍កម្រាស់ ១១ ទំព័រនេះ បានចោទជាសំណួរមួយចំនួនដូចជា ថាតើប្រព័ន្ធរបស់អង្គការសុខភាពពិភពលោកនៅក្នុងការព្រមានដល់ពិភពលោកអំពីការផ្ទុះឡើងនូវជំងឺនេះមានលក្ខណៈត្រឹមត្រូវគ្រប់គ្រាន់ដែរឬក៏អត់ ហើយបានស្នើថា បណ្ដាប្រទេសជាសមាជិកអង្គការនេះអាចត្រូវការ «ធ្វើការវាយតម្លៃឡើងវិញ» អំពីតួនាទីរបស់ខ្លួន នៅក្នុងការផ្ដល់ដំបូន្មានទាក់ទិននឹងការធ្វើដំណើរដល់ប្រទេសនានា។
លោក Tedros បាននិយាយថា លោកស្វាគមន៍ចំពោះការវាយតម្លៃនេះ៕