អ្នកសារព័ត៌មានផ្នែកភាសាថៃរបស់វីអូអេ លោកស្រី Warangkana Chomchuen ដែលគេហៅគាត់ថា Waan បានឲ្យដឹងថា៖ «ខ្ញុំចាប់ផ្តើមសម្លឹងជុំវិញផ្ទះហើយគិតថា តើវាប្រើពេលយូរប៉ុណ្ណាក្នុងការលក់សាឡុងរបស់ខ្ញុំតាមគេហទំព័រលក់ផលិតផល craigslist នោះ? តើវាប្រើពេលប៉ុណ្ណាក្នុងការលក់ឧបករណ៍ភ្លេងព្យាណូរបស់ប្រពន្ធខ្ញុំនោះ។ ខ្ញុំគិតច្រើនជារៀងរាល់ថ្ងៃ»។
ជាមួយនឹងការប្រើប្រាស់វីសាប្រភេទ J-1 ដែលស្ថិតក្នុងស្ថានភាពមិនទាន់ច្បាស់លាស់នៅឡើយ លោកស្រី Chomchuen ដែលជាអ្នកសារព័ត៌មានមានបទពិសោធន៍ដែលធ្លាប់ធ្វើការឲ្យសារព័ត៌មាន NBC News និងThe Wall Street Journal មានរយៈពេលមួយខែដើម្បីចាកចេញពីទឹកដីអាមេរិកនិងការងាររបស់គាត់ និងចាកឆ្ងាយពីប្រពន្ធជនជាតិកាណាដា ដោយមិនដឹងថាតើពេលណាពួកគេនឹងអាចជួបគ្នាសារជាថ្មីទៀតនោះទេ។
លោកស្រី Chomchuen ស្ថិតក្នុងចំណោមអ្នកសារព័ត៌មានវីអូអេមួយចំនួន ដែលត្រូវបន្តទិដ្ឋាការ ឬវីសារបស់ពួកគេដែលអនុញ្ញាតឲ្យអ្នកដែលមានជំនាញពិសេសធ្វើការក្នុងស្ថាប័នវីអូអេនោះ អាចត្រូវបណ្តេញចេញ ដោយសារការសម្រេចចិត្តរបស់ភ្នាក់ងារអាមេរិកសម្រាប់ប្រព័ន្ធផ្សព្វផ្សាយសាកលដែលហៅកាត់ថា USAGM កំពុងត្រួតពិនិត្យករណីនីមួយៗនៃប្រភេទវីសា J-1 ទាំងនោះ។
លោកស្រីនិយាយថា៖ «វាមិនមែនដូចជារឿងដែលយើងជួលឡាន U-Haul ដឹកសម្ភារៈទៅរដ្ឋ New Jerseyនោះទេ មែនទេ? យើងត្រូវចាកចេញពីប្រទេសអាមេរិក។ យើងត្រូវរៀបចំឥវ៉ាន់ដែលយើងបានប្រមែប្រមូលអស់មួយឆ្នាំ។ លោកស្រីបន្តទៀតថា ភាពមិនប្រាកដប្រជាថាតើវីសារបស់លោកស្រីនឹងត្រូវបានគេយល់ព្រមបន្តឲ្យទៀតឬយ៉ាងណា មុនដែលរយៈពេលកំណត់៣០ថ្ងៃបានបញ្ចប់ ដើម្បីចាកចេញពីអាមេរិក ដែលនេះជារឿងធ្វើឲ្យលោកស្រី «គិតច្រើនខ្លាំង»។
ទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសាកល ឬហៅកាត់ថា USAGM ដែលគ្រប់គ្រងស្ថាប័នព័ត៌មានវីអូអេ និងស្ថាប័នព័ត៌មាន ៤ ផ្សេងទៀតរបស់អាមេរិកនោះ បានឲ្យដឹងនៅថ្ងៃព្រហស្បតិ៍មុនថា ខ្លួនកំពុងធ្វើការវាយតម្លៃទៅតាមករណីនិមួយៗដល់ការដាក់ពាក្យស្នើសុំបន្តវីសាប្រភេទ J-1នេះ។ វីអូអេមានមានបុគ្គលិកជាប់កិច្ចសន្យាចំនួន៦២នាក់ និងបុគ្គលិកពេញសិទ្ធិចំនួន១៤នាក់ ដែលកំពុងធ្វើការនៅអាមេរិក ដោយប្រើប្រាស់វីសាប្រភេទ J-1 នេះ។
លោក Michael Pack នាយកប្រតិបត្តិទីភ្នាក់ងារអាមេរិកសម្រាប់ប្រព័ន្ធផ្សព្វផ្សាយសាកលដែលហៅកាត់ថា USAGM។
ដំណើរការត្រួតពិនិត្យវីសារបស់ USAGM ជាផ្នែកមួយនៃការអនុវត្តផ្លាស់ប្តូរបន្ទាប់ពីលោក Michael Pack បានចូលកាន់តំណែងជាប្រធានប្រតិបត្តិរបស់ស្ថាប័ននេះ។ ក្នុងសប្តាហ៍ទី១នៃការងាររបស់លោក Pack នាយកវីអូអេបានលាលែងចេញពីតួនាទីរបស់ខ្លួន ហើយលោកបានបណ្តេញនាយកនៃស្ថាប័នព័ត៌មានផ្សព្វផ្សាយផ្សេងៗទៀតផងដែរ ដែលក្នុងនោះរួមមាននាយកនៃមូលនិធិបច្ចេកវិទ្យាសេរី Open Technology Fund ដោយតែងតាំងនាយកស្តីទីបណ្តោះអាសន្នជំនួស និងផ្លាស់ប្តូរមន្រ្តីអភិបាលដែលគ្រប់គ្រងស្ថាប័នទាំងនោះទៀតផង។
អ្នកនាំពាក្យរបស់ USAGM បាននិយាយក្នុងសេចក្តីថ្លែងការណ៍ថា ការត្រួតពិនិត្យវីសាគឺធ្វើឡើងក្នុងគោលបំណងធ្វើឲ្យប្រសើរឡើងនូវការគ្រប់គ្រងរបស់ទីភ្នាក់ងារមួយនេះ ក៏ដូចជាការការពារសន្តិសុខជាតិអាមេរិក និងការធានាថាដំណើរការនៃការរើសបុគ្គលិកមិនត្រូវបានគេប្រើប្រាស់ខុសទិសដៅនោះទេ។
ប៉ុន្តែអ្នកកាសែតនិងក្រុមការពារអ្នកសារព័ត៌មានដែលរួមមានអង្គការ PEN America និងក្លឹបអ្នកកាសែតជាតិ National Press Club បានលើកឡើងថា ការពន្យារពេលនៃការបន្តវីសា អាចគំរាមដល់អ្នកសារព័ត៌មានរបស់វីអូអេជាច្រើននាក់ឲ្យស្ថិតក្នុងហានិភ័យឬការចាប់ខ្លួន ប្រសិនបើពួកគេត្រូវបានបង្ខំឲ្យចាកចេញពីប្រទេសអាមេរិកទៅកាន់ប្រទេសកំណើតរបស់គេវិញ ដែលនេះអាចធ្វើឲ្យប៉ះពាល់ដល់មុខមាត់របស់ស្ថាប័នផ្សព្វផ្សាយអាមេរិកមួយនេះ នៅក្រៅប្រទេស ហើយនឹងធ្វើឲ្យមានភាពលំបាកកាន់តែខ្លាំងក្នុងការយកព័ត៌មាននៅក្នុងតំបន់ទាំងនោះ ជាពិសេសនៅឆ្នាំបោះឆ្នោតប្រធានាធិបតីអាមេរិក និងនៅពេលដែលមានការឆ្លងរាតត្បាតជាសាកលនៃជំងឺកូវីដ១៩ ផងនោះ។
USAGMមិនបានឆ្លើយតបចំពោះសំណួរសុំបំភ្លឺជុំវិញរឿងនេះតាមអ៊ីម៉ែលទេកាលពីថ្ងៃសៅរ៍។ ចំណែកស្ថាប័នវីអូអេវិញនិយាយថា រាល់សំណួរទាំងអស់ទាក់ទងរឿងវីសាប្រភេទJ-1នេះ ត្រូវសួរដោយផ្ទាល់ទៅកាន់ទីភ្នាក់ងារ USAGM ។
អ្នកសារព័ត៌មានជាន់ខ្ពស់ម្នាក់នៃវីអូអេ ដែលបានដឹងពីស្ថានភាពរឿងនេះ បានប្រាប់ថាដំណើរការនៃការត្រួតពិនិត្យមើលនៃប្រភេទវីសានេះ J-1 គឺធ្វើឡើងជាប្រចាំទូទៅ ហើយថាបើការស្នើសុំនោះធ្វើឡើងទាន់ពេលវេលា ជាទូទៅគឺគ្មានបញ្ហាអ្វីនោះទេ។
មន្រ្តីផ្នែកបុគ្គលិកជាន់ខ្ពស់ម្នាក់បានឲ្យដឹងថា អ្នកសារព័ត៌មានបរទេសរបស់វីអូអេ ដើរតួនាទីសំខាន់និងមានអាជីពពិសេសដែលពិបាករក ក្នុងចំណោមអ្នករស់នៅក្នុងសហរដ្ឋអាមេរិក។ ស្ថាប័ននេះមិនត្រឹមតែពឹងផ្អែកទៅលើកជំនាញភាសាអង់គ្លេសនិងភាសាកំណើតរបស់ពួកគេប៉ុណ្ណោះទេ ប៉ុន្តែពួកគេថែមទាំងមានទំនាក់ទំនងនិងចំណេះដឹងយ៉ាងជ្រាលជ្រៅពីស្ថានភាពនយោបាយ និងរបៀបនៃការផ្សព្វផ្សាយរឿងទាំងនោះសម្រាប់អ្នកស្តាប់ក្នុងស្រុកទៀតផង។
មន្រ្តីដដែលនោះបានបន្តថា ស្ថាប័នផ្សព្វផ្សាយនីមួយៗ បានធ្វើការសម្ភាសន៍និងប្រើប្រាស់ដំណើរការជ្រើសរើសដោយម៉ត់ចត់ ដែលរួមមានទាំងការស៊ើបអង្កេតប្រវត្តិរូបរបស់បេក្ខជន ហើយតែងតែមានភាពប្រាកដប្រជាថា បេក្ខជនបរទេសដែលត្រូវបានជ្រើសរើសឲ្យចូលធ្វើការផ្នែកភាសានីមួយៗ មានជំនាញច្បាស់លាស់ដែលគេត្រូវការជាចាំបាច់។
ថ្មីៗនេះ ការចូលមកអាមេរិកដោយប្រើប្រាស់វីសាប្រភេទ J-1 គឺស្ថិតក្នុងចំណោមប្រភេទវីសាផ្សេងៗទៀត ដែលត្រូវហាមប្រាមជាបណ្តោះអាសន្នដោយរដ្ឋបាលលោកត្រាំ ដើម្បីឆ្លើយតបការរាតត្បាតនៃវីរុសកូរ៉ូណា ហើយរដ្ឋបាលរបស់លោកត្រាំក៏ជឿផងដែរថា អ្នកប្រើប្រាស់វីសាប្រភេទនេះ បានមកយកការងារធ្វើពីពលរដ្ឋអាមេរិកាំង។ វានៅមានភាពមិនទាន់ច្បាស់នៅឡើយទេថា តើការហាមប្រាមនោះអាចប៉ះពាល់ដល់ការបន្តវីសាប្រភេទ J-1 នេះដែរឬយ៉ាងណា៕
ប្រែសម្រួលដោយលោក ជ្រា វណ្ណារិទ្ធ