ទោះបីជាលោកនាយករដ្ឋមន្ត្រី ហ៊ុន សែន ធ្លាប់បានធ្វើអន្តរាគមន៍បញ្ជាឲ្យក្រសួងបរិស្ថានកាត់ដីចេញពីតំបន់អភិវឌ្ឍន៍របស់ក្រុមហ៊ុនចិន Union Development Group (UDG) ក្នុងស្រុកគិរីសាគរ ខេត្តកោះកុងក៏ដោយ ក៏តំណាងប្រជាពលរដ្ឋមួយចំនួនដែលកំពុងមានវិវាទដីធ្លីនៅតំបន់នោះ បានបន្តធ្វើដំណើរមករាជធានីភ្នំពេញ ដើម្បីទាមទារមកវិញនូវដីដែលបានបាត់បង់នោះ។
លោក រស់ សុផល វ័យ៤០ឆ្នាំ តំណាងពលរដ្ឋ២១០គ្រួសារ ក្នុងស្រុកគិរីសាគរ ខេត្តកោះកុង ថ្លែងថា ការបន្តតវ៉ានេះបានធ្វើឡើង ដោយសារតែប្រជាពលរដ្ឋបានប្រឈមនឹងការខ្វះខាត ដោយសារពលរដ្ឋខ្លះបានក្លាយជាកម្មករ ឯខ្លះទៀតត្រូវបង្ខំចិត្តចុះទូកនេសាទ ដើម្បីរកប្រាក់ឧបត្ថម្ភជីវភាពរស់នៅប្រចាំថ្ងៃ។
លោករៀបរាប់ថា៖
«អត់មានអីធ្វើផងឥឡូវ។ យើងនៅចុះទូកអី ធ្វើការខ្ញុំគេ សំណង់អីចឹង ដើរធ្វើខ្ញុំគេ។ ពីមុនយើងអត់ដែលខ្ញុំគេទេ។ យើងធ្វើខ្លួនឯង»។
លោកមានប្រសាសន៍ថា ការតវ៉ាដែលបានបន្តដល់សព្វថ្ងៃបានធ្វើឲ្យប្រជាពលរដ្ឋបាត់បង់ផលប្រយោជន៍ជាច្រើន។
«ខាត ខាត ខាតប្រយោជន៍ធំ ព្រោះអីឃាត់តាំងពីឆ្នាំ២០០៨មក ខាតពេលវេលារកហូប ហើយធ្វើដាំដំណាំអី ធ្វើស្រែ ធ្វើស្រូវអីអត់បានដែរ។ បាទ កាលពីគាត់មិនទាន់ឃាត់ យើងរាងធូរធារជីវភាព ដល់ពេលគាត់ឃាត់ទៅ ជីវភាពគាត់យ៉ាប់យ៉ឺនៗ ទាំងគេទាំងខ្ញុំ»។
លិខិតរបស់ទីស្តីការដែលមានយោងចំណាររបស់លោកនាយករដ្ឋមន្ត្រី ហ៊ុន សែន និងដែលបានដាក់ចូលសាលាខេត្តកោះកុង កាលពីថ្ងៃ១៦ ខែឧសភា ឆ្នាំ២០១៨ បានបញ្ជាក់ឲ្យដឹងតាមន័យដើមថា៖
«ក្រសួងបរិស្ថានត្រូវសិក្សាការកាត់ឆ្វៀលដីនៅទីតាំងឃុំព្រែកខ្សាច់ ស្រុកគិរីសាគរ និងទីតាំងកៀនទឹក ឃុំថ្មស ស្រុកបទុមសាគរ ខេត្តកោះកុង ចេញពីតំបន់វិនិយោគអភិវឌ្ឍន៍របស់ក្រុមហ៊ុន Union Development Group Co.,Ltd សម្រាប់ផ្តល់ជូនប្រជាពលរដ្ឋ និងរដ្ឋបាលថ្នាក់ក្រោមជាតិពាក់ព័ន្ធ»។
រដ្ឋាភិបាលកម្ពុជាក៏បានបញ្ជាឲ្យក្រុមហ៊ុន Union Development Group Co., Ltd ត្រូវរក្សាទុកព្រៃកោងកាង ព្រៃលិចទឹក តំបន់ព្រៃស្រោង តំបន់ទីជម្រាលភ្នំ ជាតំបន់អភិរក្សន៍នៅក្នុងប្លង់មេ និងកម្មវិធីអភិវឌ្ឍន៍របស់ខ្លួន។
គិតត្រឹមល្ងាចថ្ងៃសុក្រនេះ VOA មិនអាចទាក់ទងលោក សាយ សំអាល់ រដ្ឋមន្ត្រីក្រសួងបរិស្ថាន និងនាយកខុទ្ធកាល័យរបស់លោកគឺលោក សៅ សុភាព ដើម្បីសុំការបំភ្លឺបានទេ ដោយសារទូរស័ព្ទរបស់លោកទាំងពីររោទិ៍ តែគ្មានអ្នកទទួល។
ក្រុមហ៊ុន Union Development Group នេះបានទទួលដីសម្បទានសេដ្ឋកិច្ចសរុបចំនួន៤៥.១០០ ហិកតាពីរដ្ឋាភិបាលកម្ពុជាដើម្បីសាងសង់ទីក្រុងទេសចរណ៍ដ៏ធំមួយ ដែលត្រូវចំណាយទឹកប្រាក់៣,៨ពាន់លានដុល្លារ កាលពីឆ្នាំ២០០៨។ គម្រោងទីក្រុងទេសចរណ៍ដ៏ស្កឹមស្កៃនេះកំពុងដំណើរការនៅចំកណ្ដាលឧទ្យានជាតិបទុមសាគរ ក្នុងខេត្តកោះកុង។
គម្រោងរបស់ក្រុមហ៊ុន UDG ដើម្បីអភិវឌ្ឍទីក្រុងទេសចរណ៍នេះបានធ្វើឲ្យប្រជាពលរដ្ឋខ្មែរជាង១.០០០គ្រួសារ ចាកចេញពីលំនៅដ្ឋានរបស់ពួកគេជាយូរមកហើយ។ ប៉ុន្តែនៅមានប្រជាពលរដ្ឋជាច្រើនគ្រួសារទៀតនៅមិនទាន់ទទួលបានដំណោះស្រាយសមស្របសម្រាប់ដីដែលពួកគាត់កាន់កាប់ បន្ទាប់ពីពួកគាត់បានយល់ព្រមថា នឹងចាកចេញពីភូមិដ្ឋានចាស់ ទៅតាំងលំនៅដ្ឋាននៅភូមិដ្ឋានថ្មី។
គម្រោងសាងសង់ទីក្រុងទេសចរណ៍របស់ក្រុមហ៊ុន UDG នេះ អាចនឹងប្រើពេល២៥ឆ្នាំដើម្បីបញ្ចប់គម្រោង។ ទីក្រុងនេះ ប្រសិនបើសាងសង់រួច នឹងមានព្រលានយន្តហោះ មណ្ឌលពាណិជ្ជកម្ម កំពង់ផែ និងទីកន្លែងកម្សាន្តផ្សេងទៀត ដូចជាកន្លែងវាយកូនគោលជាដើម។ នេះបើតាមការបញ្ជាក់ពីមន្ត្រីខេត្តកោះកុង កាលពីពេលកន្លងមក។
ប៉ុន្តែការសិក្សាស្រាវជ្រាវមួយ ដែលមានចំណងជើងថា Harboured Ambition [មហិច្ឆិតាក្នុងការចូលសំចត] ដែលចេញផ្សាយកាលពីខែមេសា ដោយមជ្ឈមណ្ឌលដើម្បីការសិក្សាជាន់ខ្ពស់ផ្នែកការពារជាតិ [Center for Advanced Defense Studies] ដែលមានមូលដ្ឋាននៅរដ្ឋធានីវ៉ាស៊ីនតោនសហរដ្ឋអាមេរិក បានព្រមានថា តំបន់អភិវឌ្ឍន៍ខ្នាតធំខាងលើរបស់ក្រុមហ៊ុន UDG មានជាប់ពាក់ព័ន្ធនឹងគណបក្សកុម្មុយនីស្តចិន ជាផ្នែកមួយនៃគំរោងការយុទ្ធសាស្ត្រសន្តិសុខ និងភូមិសាស្ត្រនយោបាយរបស់ចិន នៅក្នុងតំបន់ចុងបូព៌ា ដូចយ៉ាង គំនិតផ្ដួចផ្ដើមខ្សែក្រវ៉ាត់និងផ្លូវ [Belt and Road Initiative] ជាដើម។
ស្របគ្នានេះដែរ មន្ត្រីសិទ្ធិមនុស្សប្រចាំខេត្តកោះកុង ថ្លែងថា មានការវិវត្តយ៉ាងយឺតយ៉ាវចំពោះគម្រោងដ៏ធំនេះ ដោយសារតែដីធ្លីដែលបានមកពីការផ្តល់សម្បទានសេដ្ឋកិច្ចរបស់រដ្ឋ និងដីដែលទាមទារបានពីប្រជាពលរដ្ឋជិត៤៦០០០ហិកតានោះ ត្រូវបានទុកឲ្យនៅទំនេរចោល ឬធ្វើសកម្មភាពដាំដុះបន្តិចបន្តួចតែប៉ុណ្ណោះ៕