កំណត់និពន្ធ៖ អត្ថបទនេះជាអត្ថបទប្រែសម្រួលទាំងស្រុងជាភាសាខ្មែរដោយ VOA ពីអត្ថបទដើមរបស់ Martin Petty នៃសារព័ត៌មាន Reuters
នាយករដ្ឋមន្ត្រីវៀតណាមបានជំរុញឲ្យសហរដ្ឋអាមេរិកមានតួនាទីខ្លាំងជាងមុន ក្នុងការទប់ស្កាត់ការសកម្មភាពដាក់យោធា និងការសាងសង់កោះសប្បនិមិ្មត្តនៅក្នុងតំបន់សមុទ្រចិនខាងត្បូង។ នេះបើយោងតាមរដ្ឋាភិបាលវៀតណាម កាលពីថ្ងៃអង្គារកន្លងទៅនេះ ដែលនេះគឺជាការអំពាវនាវដ៏កម្រមួយ ដើម្បីទទួលបានការគាំទ្រពីរដ្ឋាភិបាលរដ្ឋវ៉ាស៊ីនតោន ដើម្បីទប់ស្កាត់នឹងសកម្មភាពពង្រីកដែនសមុទ្ររបស់រដ្ឋាភិបាក្រុងប៉េកាំង។
ក្នុងអំឡុងកិច្ចប្រជុំកំពូលអាមេរិក-អាស៊ាននៅរដ្ឋកាលីហ្វ័រញ៉ា កាលពីថ្ងៃច័ន្ទ លោកនាយករដ្ឋមន្ត្រី ង្វៀន តាន់ស៊ុង (Nguyen Tan Dung) បានស្នើទៅកាន់លោកប្រធានាធិបតី បារ៉ាក់ អូបាម៉ា ថា រដ្ឋាភិបាលវ៉ាស៊ីនតោនគួរលើកឡើងពីបញ្ហាជម្លោះដែនទឹកនេះឲ្យខ្លាំងជាងនេះ និងចាត់«វិធានការដែលអាចធ្វើទៅបាន និងដែលមានប្រសិទ្ធភាព» ដែលប្រសាសន៍របស់លោកនឹងធ្វើឲ្យចិនខឹងសម្បា។
ភាពតានតឹងបានកើនឡើង ចាប់តាំងពីរដ្ឋាភិបាលក្រុងប៉េកាំងបានបង្កើតកោះសប្បនិមិ្មត្តចំនួន៧ នៅតំបន់ប្រជុំកោះ Spratly។
យោងតាមគេហទំព័ររបស់រដ្ឋាភិបាលវៀតណាម «លោកនាយករដ្ឋមន្ត្រី ង្វៀន តាន់ស៊ុង បានស្នើសុំឲ្យសហរដ្ឋអាមេរិកលើកឡើងពីបញ្ហានេះឲ្យខ្លាំងជាងមុន និងចាត់វិធានការដែលអាចធ្វើទៅបាន និងដែលមានប្រសិទ្ធភាព ដោយស្នើឲ្យបញ្ឈប់សកម្មភាពទាំងឡាយណា ដើម្បីផ្លាស់ប្តូរស្ថានភាពបច្ចុប្បន្ននេះ»។
សេចក្តីថ្លែងការណ៍នេះមិនបានលើកឡើងពីប្រទេសចិនទេ ប៉ុន្តែបានបង្ហាញថា លោកនាយករដ្ឋមន្ត្រី ង្វៀន តាន់ស៊ុង បាននិយាយសំដៅទៅលើ«ការសាងសង់កោះសប្បនិមិត្តក្នុងទ្រង់ទ្រាយធំ» និង«សកម្មភាពពង្រីកយោធា»។
ផ្អែកលើផែនទីផ្លូវការដែលមានរូបរាងដូចអក្សរឡាតាំង «U» ប្រទេសចិនទាមទារក្តោបក្តាប់តំបន់សមុទ្រចិនខាងត្បូងស្ទើតែទាំងអស់។ ក៏ប៉ុន្តែ ប្រទេសម៉ាឡេស៊ី ភីលីពីន តៃវ៉ាន់ ព្រុយណេ និងវៀតណាម បានតវ៉ាជំទាស់នឹងផែនទីនេះ។
បើទោះបីជាប្រទេសកុម្មុយនីស្តវៀតណាមតែងតែប្រឆាំងនឹងសកម្មភាពរបស់ចិននៅក្នុងតំបន់ដែនទឹកដែលមានជម្លោះនោះយ៉ាងណាក្តី ក៏មេដឹកនាំវៀតណាមជាទូទៅមិនហ៊ានប្រឆាំងតវ៉ាខ្លាំងៗនឹងប្រទេសចិន ដែលជាប្រទេសជិតខាងដ៏ធំរបស់ខ្លួន។ វៀតណាមបានធ្វើពាណិជ្ជកម្មជាមួយនឹងចិន ដែលមានទឹកប្រាក់ចំនួន៦០ពាន់លានដុល្លារអាមេរិកជារៀងរាល់ឆ្នាំ ហើយក៏បានរក្សាទំនាក់ទំនងដ៏ជិតស្នីទខាងមនោគមវិជ្ជាជាមួយចិនផងដែរ។
លោកនាយករដ្ឋមន្ត្រី ង្វៀន តាន់ស៊ុង បានទទួលប្រជាប្រិយភាពនៅវៀតណាម ដោយបានពង្រឹងទំនាក់ទំនងពាណិជ្ជកម្មដ៏រឹងមាំជាមួយសហរដ្ឋអាមេរិក និងកិច្ចការការពារជាតិ និងក្នុងការចាត់វិធានការខ្លាំងៗប្រឆាំងនឹងចិន បើធៀបនឹងការឆ្លើយតបជាវិធានការដោយមេដឹកនាំវៀតណាមផ្សេងៗទៀត ទៅកាន់សកម្មភាពគរឃ្លឺនរបស់រដ្ឋាភិបាលក្រុងប៉េកាំង។
លោកនាយករដ្ឋមន្ត្រី ង្វៀន តាន់ស៊ុង ត្រូវបានមើលរំលងដោយការិយាល័យរដ្ឋាភិបាលវៀតណាមកាលពីខែមុន នៅក្នុងដំណើរការជ្រើសតាំងប្រធានបក្ស។ ការណ៍នេះមានន័យថា កិច្ចការនយោបាយរបស់លោកនឹងត្រូវបញ្ចប់ នៅពេលដែលលោកចប់អាណត្តិជានាយករដ្ឋមន្ត្រីរបស់លោកនៅចុងឆ្នាំនេះ ដែលអាចប៉ះពាល់ដល់ទំនាក់ទំនងជាមួយនឹងរដ្ឋាភិបាលវ៉ាស៊ីនតោន។
លោកនាយករដ្ឋមន្ត្រី ង្វៀន តាន់ស៊ុង ក៏បានស្នើឲ្យលោក អូបាម៉ា លុបចោលទាំងស្រុងលើការហាមឃាត់ក្រុមហ៊ុនអាមេរិកក្នុងការលក់អាវុធធុនធ្ងន់ទៅឲ្យប្រទេសវៀតណាម ដែលអាចជា«វិធីសាស្ត្រដ៏សំខាន់មួយ ក្នុងការពង្រឹងការជឿទុកចិត្តខាងនយោបាយរវាងគ្នា។ នេះបើយោងតាមគេហទំព័ររបស់រដ្ឋាភិបាលវៀតណាម ដែលដកស្រង់សម្តីរបស់លោកនាយករដ្ឋមន្ត្រី ង្វៀន តាន់ស៊ុង។ ជាមួយគ្នានេះ សេតវិមានក៏បានឲ្យដឹងថា លោកប្រធានាធិបតី អូបាម៉ា នឹងធ្វើដំណើរទស្សនកិច្ចទៅកាន់ប្រទេសវៀតណាមនៅខែឧសភាខាងមុខនេះ៕
អត្ថបទដើមរបស់សារព័ត៌មាន Reuters ត្រង់នេះ
ប្រែសម្រួលដោយ ទែន សុខស្រីនិត