អាជ្ញាធរវៀតណាមកាលពីថ្ងៃយប់អង្គារចូលថ្ងៃពុធបានដកវិធានការរឹតត្បិតសកម្មភាពនៅក្នុងឃុំមួយនៃទីរដ្ឋធានីហាណូយ ក្រោយពីបានដាក់វិធានការឲ្យតំបន់នៅដាច់ដោយឡែកនេះអស់រយៈពេល២៨ថ្ងៃ។
ឃុំ Ha Loi ដែលជាតំបន់ដាំបន្លែនិងផ្កា ចម្ងាយ២០គីឡូម៉ែត្រពីកណ្តាលក្រុងហាណូយ កាលពីថ្ងៃទី៦ខែមេសាកន្លងទៅ បានរកឃើញអ្នកឆ្លងវិរុសកូរ៉ូណាទី២៤៣ករណីរបស់វៀតណាមនៅពេលនោះ ហើយពីរថ្ងៃបន្ទាប់មក អាជ្ញាធរបានបិទឃុំនេះ។
ក្រោយពីអាជ្ញាធរបានដកបារ៉ាស់នៅពាក់កណ្តាលអាធ្រាតចូលថ្ងៃពុធ ពលរដ្ឋរាប់រយនាក់នៅក្នុងឃុំនេះបានចេញពីផ្ទះសម្បែង គ្រវីទង់ជាតិនិងអបអរអ្វីដែលពួកគេហៅថា ជ័យជម្នះនិងការរំដោះសហគមន៍ពីជំងឺកូវីដ១៩។
ក្នុងពិធីមួយនៅពេលរំលងអាធ្រាតចូលថ្ងៃពុធ ក្រុមមន្ត្រីបានប្រកាសថា ប្រជាជន១១.៥០០នាក់របស់ឃុំនេះមិនមានឆ្លងវីរុសកូរ៉ូណាទេ។
ប៉ុន្តែទោះវិធានការរិតត្បិតត្រូវបានបញ្ចប់ក៏អាជ្ញាធរក្រុងហាណូយ នៅតែចាត់ទុកឃុំ Ha Loi ជាតំបន់អាចមានគ្រោះថ្នាក់ និងស្នើឲ្យពលរដ្ឋរិតត្បិតការធ្វើដំណើររហូតថ្ងៃទី១១ខែឧសភា និងអនុវត្តគម្លាតពីគ្នាក្នុងសង្គមនិងការពាក់ម៉ាស់មុខ។
ទោះបីវៀតណាមជាប្រទេសក្រីក្រមួយនៅអាស៊ីអាគ្នេយ៍ ក៏វិធានការទប់ស្កាត់ជំងឺកូវីដ១៩ត្រូវបានគេសរសើរថាមានជោគជ័យជាងប្រទេសជិតខាងខ្លួនមួយចំនួន ដោយមកទល់នឹងពេលនេះ វៀតណាមមិនមានករណីស្លាប់ពីជំងឺកូវីដ១៩នៅឡើយ ដោយមានការឆ្លងវីរុស ២៧១ករណី។ អាជ្ញាធរវៀតណាមបានបង្គាប់ឲ្យមនុស្ស៣០,៥០០ត្រូវនៅដាច់ឃ្លាតពីគេ និងបានធ្វើតេស្តរកវីរុសកូរ៉ូណាទៅលើមនុស្សចំនួន២៦១.០០០នាក់មកទល់នឹងពេលនេះ៕