ក្រុមមន្ត្រីសហរដ្ឋអាមេរិកបាននិយាយថា សហរដ្ឋអាមេរិកកំពុងបង្កើនការទាក់ទងជាមួយនឹងប្រទេសចិន ខណៈដែលខ្លួនមើលឃើញថា លទ្ធភាពនៃជម្លោះដោយសារការប៉ាន់ស្មានខុសលើដៃគូប្រកួតប្រជែងកំពូលរបស់ខ្លួននេះកំពុងកើនឡើង។
ក្រសួងការបរទេសសហរដ្ឋអាមេរិកបានប្រកាសកាលពីថ្ងៃពុធថា រដ្ឋមន្ត្រីក្រសួងការបរទេសលោក Antony Blinken នឹងធ្វើដំណើរទៅកាន់ទីក្រុងប៉េកាំងក្នុងសប្តាហ៍នេះ។
ក្រសួងបានឱ្យដឹងថា ក្នុងអំឡុងពេលនៃដំណើរទស្សនកិច្ចនេះ លោក Blinken ត្រូវបានគេរំពឹងថា នឹងជួបជាមួយមន្ត្រីជាន់ខ្ពស់ចិន រួមទាំងរដ្ឋមន្ត្រីការបរទេសចិនលោក Qin Gang ផងដែរ។
ដំណើរទស្សនកិច្ចនេះត្រូវបានគេមើលឃើញថា ជាផ្នែកមួយនៃកិច្ចខិតខំប្រឹងប្រែងរបស់រដ្ឋបាលប្រធានាធិបតីសហរដ្ឋអាមេរិកលោក Joe Biden ដើម្បីកែសម្រួលទំនាក់ទំនងជាមួយរដ្ឋាភិបាលក្រុងប៉េកាំង បន្ទាប់ពីមានការប៉ះទង្គិចគ្នាផ្នែកការទូតជាបន្តបន្ទាប់រវាងប្រទេសទាំងពីរ។
លោក Daniel Kritenbrink ឧបការីរដ្ឋមន្ត្រីការបរទេសទទួលបន្ទុកកិច្ចការអាស៊ីបូព៌ានិងប៉ាស៊ីហ្វិក បាននិយាយនៅក្នុងសន្និសីទកាសែតតាមទូរសព្ទមួយជាមួយក្រុមអ្នកសារព័ត៌មានកាលពីថ្ងៃពុធថា៖ «យើងធ្វើដំណើរទៅកាន់ទីក្រុងប៉េកាំង ដោយពាំនាំយកទៅជាមួយនូវវិធីសាស្រ្តដែលប្រាកដនិយម និងគួរឱ្យជឿជាក់មួយ និងមានគោលបំណងដ៏ល្អមួយក្នុងការគ្រប់គ្រងការប្រកួតប្រជែងរបស់យើងតាមវិធីដែលមានការទទួលខុសត្រូវខ្ពស់បំផុតតាមតែអាចធ្វើទៅបាន»។
នៅក្នុងសន្និសីទកាសែតតាមទូរសព្ទនោះ លោក Kurt Campbell ជំនួយការរងរបស់លោកប្រធានាធិបតី Joe Biden និងជាអ្នកសម្របសម្រួលកិច្ចការឥណ្ឌូប៉ាស៊ីហ្វិកនៅក្រុមប្រឹក្សាសន្តិសុខជាតិបាននិយាយថា៖ «ឥឡូវនេះគឺជាពេលវេលាសម្រាប់ទំនាក់ទំនងការទូតដ៏ខ្លាំងក្លា»។
កាលពីសប្តាហ៍មុន លោក Campbell បានអំពាវនាវឱ្យរក្សា «ការទូតសមស្រប» ជាមួយនឹងរដ្ឋាភិបាលក្រុងប៉េកាំង ដោយនិយាយថា លទ្ធភាពនៃជម្លោះដោយសារការប៉ាន់ស្មានខុសលើប្រទេសចិនកំពុងកើនឡើង។
លោក Campbell បានលើកឡើងយ៉ាងដូច្នេះនៅក្នុងកម្មវិធីពិភាក្សាមួយ ដែលរៀបចំឡើងដោយវិទ្យាស្ថានHudson ដែលមានមូលដ្ឋាននៅក្នុងរដ្ឋធានីវ៉ាស៊ីនតោន។
រដ្ឋមន្ត្រីការបរទេសសហរដ្ឋអាមេរិកលោក Antony Blinken កាលពីថ្ងៃអង្គារ បានអំពាវនាវឱ្យ «រក្សាទំនាក់ទំនងបើកចំហ» ជាមួយនឹងប្រទេសចិនដើម្បីជៀសវាង «ការប៉ាន់ស្មានខុសនិងជម្លោះ» ក្នុងអំឡុងពេលការហៅទូរសព្ទរបស់លោកជាមួយរដ្ឋមន្ត្រីការបរទេសចិនលោក Qin Gang។ នេះបើយោងតាមសេចក្តីសង្ខេបនៃកិច្ចសន្ទនាតាមទូរសព្ទនេះពីក្រសួងការបរទេសសហរដ្ឋអាមេរិក។
លោក Qin បានអំពាវនាវឱ្យសហរដ្ឋអាមេរិកគោរព «ការព្រួយបារម្ភស្នូលនានារបស់ចិន» និង «បញ្ឈប់ការជ្រៀតជ្រែកក្នុងកិច្ចការផ្ទៃក្នុងរបស់ប្រទេសចិន និងបញ្ឈប់ការធ្វើឱ្យខូចខាតដល់អធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ប្រទេសចិន ដោយប្រើលេសប្រកួតប្រជែង»។ នេះបើយោងតាមសេចក្តីសង្ខេបនៃកិច្ចសន្ទនាតាមទូរសព្ទផ្ញើចេញដោយអ្នកនាំពាក្យក្រសួងការបរទេសចិនលោក Wang Wenbin។
រូបឯកសារ៖ ប្រធានាធិបតីសហរដ្ឋអាមេរិកលោក Joe Biden និងប្រធានាធិបតីចិនលោក Xi Jinping ចាប់ដៃស្វាគមន៍គ្នានៅក្នុងជំនួបមួយ នៅកោះបាលី ប្រទេសឥណ្ឌូណេស៊ី កាលពីថ្ងៃទី ១៤ ខែវិច្ឆិកា ឆ្នាំ ២០២២។
ក្រុមអ្នកវិភាគនិយាយថា លទ្ធភាពនៃការម្រេចលើបញ្ហាទ្វេភាគីសំខាន់ៗនៅតែមានកម្រិតទាបក្នុងអំឡុងពេលនៃទស្សនកិច្ចនេះ។
លោក Dennis Wilder អតីតនាយកក្រុមប្រឹក្សាសន្តិសុខជាតិអាមេរិកទទួលបន្ទុកកិច្ចការប្រទេសចិនបានមានប្រសាសន៍ថា៖ «រឿងល្អបំផុតដែលដំណើរទស្សនកិច្ចនេះអាចសម្រេចបានគឺការបង្កើតវេទិកាទំនាក់ទំនងទ្វេភាគីមួយ និងត្រួសត្រាយផ្លូវសម្រាប់ទំនាក់ទំនងកម្រិតគណៈរដ្ឋមន្ត្រីផ្សេងទៀត»។
លោក Wilder ដែលឥឡូវនេះជាអ្នកស្រាវជ្រាវជាន់ខ្ពស់នៃគំនិតផ្តួចផ្តើមសម្រាប់កិច្ចសន្ទនាសហរដ្ឋអាមេរិក-ចិនស្តីពីបញ្ហាសកលនៅសាកលវិទ្យាល័យ Georgetown ក្នុងសហរដ្ឋអាមេរិកបានថ្លែងបន្ថែមទៀតថា៖ «ស្ថិរភាពពិតប្រាកដនៅក្នុងទំនាក់ទំនងនឹងពិបាកសម្រេចបាន ដោយសារតែកម្រិតខ្ពស់នៃការមិនទុកចិត្តគ្នា និងស្ថានភាពមិនអាចដោះស្រាយបាននៃបញ្ហានានាដូចជាការរឹតបន្តឹងរបស់តៃវ៉ាន់និងសហរដ្ឋអាមេរិកលើការនាំចេញបច្ចេកវិទ្យាទំនើបទៅកាន់ប្រទេសចិនជាដើម»។
លោក Patrick Cronin ប្រធានផ្នែកសន្តិសុខតំបន់អាស៊ីប៉ាស៊ីហ្វិកនៃវិទ្យាស្ថាន Hudson បាននិយាយថា៖ «ការពិភាក្សាគ្នាគឺមានសារៈសំខាន់ បើទោះបីជាមិនមានការសម្រេចបានអ្វីក៏ដោយ»។
លោក Cronin បាននិយាយថា ភាគីទាំងពីរអាចទទួលបានជោគជ័យមួយចំនួនលើបញ្ហាអ៊ុយក្រែន ពាណិជ្ជកម្ម និងការប្រែប្រួលអាកាសធាតុ។
លោក Cronin និយាយថា៖ «ដោយមានគោលបំណងដូចគ្នាក្នុងការទទួលបានជំហរការទូតខ្ពស់នៅពេលក្រុមមេដឹកនាំជួបគ្នាក្នុងកិច្ចប្រជុំកំពូលមួយនៅចុងឆ្នាំនេះ ខ្ញុំគិតថាលោករដ្ឋមន្ត្រី Blinken នឹងអាចរកឃើញផលប្រយោជន៍រួមមួយចំនួន។ ការបញ្ចប់សង្រ្គាមនៅអ៊ុយក្រែនដោយសន្តិវិធីការផ្តួចផ្តើមកិច្ចពិភាក្សាស្តីពីបញ្ញាសិប្បនិម្មិត ឬ AI បញ្ហាពាណិជ្ជកម្ម និងការប្រែប្រួលអាកាសធាតុគឺសុទ្ធតែអាចជាផលប្រយោជន៍រួម។
ដំណើរទស្សនកិច្ចរបស់លោក Blinken ទៅកាន់ទីក្រុងប៉េកាំងនេះត្រូវបានយល់ព្រមដោយប្រធានាធិបតីសហរដ្ឋអាមេរិកលោក Joe Biden និងប្រធានាធិបតីចិនលោក Xi Jinping នៅពេលដែលពួកគេទាំងពីរនាក់បានជួបគ្នានៅកោះបាលី ប្រទេសឥណ្ឌូណេស៊ី កាលពីខែវិច្ឆិកា ឆ្នាំ២០២២។
ជំនួបនោះមិនបានផ្តល់ភាពជោគជ័យអ្វីមួយទេ ប៉ុន្តែគេមើលឃើញថា វាជាជំហានដ៏សំខាន់មួយក្នុងការរក្សាស្ថិរភាពទំនាក់ទំនងរវាងប្រទេសទាំងពីរ។
ប៉ុន្តែភាពតានតឹងបានកើនឡើង ខណៈភាគីទាំងពីរបានប៉ះទង្គិចគ្នាជុំវិញបញ្ហាក្តៅគគុកនានា ដែលរួមមានបញ្ហាតៃវ៉ាន់ និងបញ្ហាអ៊ុយក្រែនជាដើម។
កាលពីខែកុម្ភៈ លោក Blinken បានលុបចោលការដំណើរទស្សនកិច្ចរបស់លោកទៅកាន់ទីក្រុងប៉េកាំង បន្ទាប់ពីមានការសង្ស័យថា បាឡុងចារកម្មរបស់ចិនបានរំលោភលើដែនអាកាសរបស់សហរដ្ឋអាមេរិក។
ចាប់តាំងពីពេលនោះមក សហរដ្ឋអាមេរិកបានខិតខំប្រឹងប្រែងឥតឈប់ឈរ ដើម្បីបន្តកិច្ចសន្ទនាជាមួយរដ្ឋាភិបាលក្រុងប៉េកាំង បើទោះបីជាមានភាពតានតឹងនានាក៏ដោយ។
ក្នុងរយៈពេលប៉ុន្មានសប្តាហ៍ចុងក្រោយនេះ មានកិច្ចពិភាក្សាកម្រិតខ្ពស់រវាងភាគីទាំងពីរអំពីលទ្ធភាពនៃការបែកបាក់ទំនាក់ទំនងទ្វេភាគីរវាងសហរដ្ឋអាមេរិកនិងចិន។
កាលពីសប្តាហ៍មុន លោក Kritenbrink និងអ្នកស្រី Sarah Beran នាយិកាជាន់ខ្ពស់នៃក្រុមប្រឹក្សាសន្តិសុខជាតិទទួលបន្ទុកកិច្ចការប្រទេសចិន បានធ្វើដំណើរទៅកាន់ទីក្រុងប៉េកាំង ដើម្បីជួបជាមួយនឹងលោក Ma Zhaoxu អនុរដ្ឋមន្ត្រីការបរទេសចិន និងលោក Yang Tao ប្រធាននាយកដ្ឋានកិច្ចការអាមេរិកខាងជើងនិងមហាសមុទ្រ៕