តុលាការកំពូលសហរដ្ឋអាមេរិក កាលពីថ្ងៃច័ន្ទ បានចេញសាលក្រមឲ្យអនុវត្តនូវច្បាប់រឹតបន្តឹងមួយ ដែលគាំទ្រដោយគណបក្សសាធារណរដ្ឋ ក្នុងរដ្ឋ South Carolina ដែលតម្រូវឲ្យអ្នកបោះឆ្នោតត្រូវមានហត្ថលេខាសាក្សីម្នាក់ លើសន្លឹកឆ្នោតដែលផ្ញើតាមប្រៃសណីយ៍ សម្រាប់ការបោះឆ្នោតប្រធានាធិបតី នៅថ្ងៃទី៣ ខែវិច្ឆិកាខាងមុខនេះ។
ចៅក្រមតុលាការកំពូល ដែលបានយល់ព្រមតាមសំណើរបស់មន្ត្រីគណបក្សសាធារណរដ្ឋជាច្រើនរូបនោះ បានផ្អាកនូវសេចក្តីសម្រេចរបស់តុលាការជាន់ទាបមួយ ដែលបានសម្រេចរាំងខ្ទប់នូវការហាមប្រាមនោះ។ នៅក្នុងសាលក្រមសង្ខេបរបស់ខ្លួន តុលាការកំពូលបានលើកឡើងថា សន្លឹកឆ្នោតដែលបានផ្ញើរួចហើយ មិនតម្រូវឲ្យបំពេញតាមលក្ខខណ្ឌខាងលើនេះ ដែលត្រូវមានភ្ជាប់ជាមួយហត្ថលេខារបស់សាក្សីនោះទេ។
ច្បាប់នេះត្រូវបានតវ៉ាដោយក្រុមអ្នកបោះឆ្នោត ដែលគាំទ្រគណបក្សប្រជាធិបតេយ្យ និងគណបក្សប្រជាធិបតេយ្យនៅក្នុងរដ្ឋនេះ ដែលបានអះអាងថា ការតម្រូវឲ្យមានសាក្សីចុះហត្ថលេខាលើសន្លឹកឆ្នោតផ្ញើតាមប្រៃសណីយ៍នោះ នឹងបង្កឲ្យមានគ្រោះថ្នាក់ដល់ពលរដ្ឋ ក្នុងអំឡុងពេលនៃការរាតត្បាតនៃវីរុសកូរ៉ូណា ហើយអាចធ្វើឲ្យចំនួនអ្នកបោះឆ្នោតមានការថយចុះផងដែរ។
មន្ត្រីគណបក្សសាធារណរដ្ឋមួយចំនួន ដែលរួមមានគណៈកម្មការរៀបចំការបោះឆ្នោតរបស់រដ្ឋ South Carolina ផងដែរ បានស្នើដល់តុលាការកំពូលឲ្យអនុញ្ញាតឲ្យច្បាប់នោះចូលជាធរមាន សម្រាប់ការបោះឆ្នោតប្រធានាធិបតី ក្នុងខែវិច្ឆិកាខាងមុខនេះ បន្ទាប់ពីចៅក្រមសហព័ន្ធមួយរូប កាលពីថ្ងៃទី១៨ ខែកញ្ញា បានសម្រេចមិនឲ្យអនុវត្តច្បាប់នោះ សម្រាប់ការបោះឆ្នោត ក្នុងខែវិច្ឆិកានោះទេ។
សន្លឹកឆ្នោតសម្រាប់បោះតាមប្រៃសណីយ៍ចំនួនប្រមាណ ១ សែន ៥ ម៉ឺនសន្លឹក ត្រូវបានចែកជូនដល់ពលរដ្ឋនៅក្នុងរដ្ឋ South Carolina រួចហើយ។
ការបោះឆ្នោតតាមប្រៃសណីយ៍ គឺជាការអនុវត្តមួយជាប្រចាំនៅក្នុងការបោះឆ្នោតនានា នៅសហរដ្ឋអាមេរិក ហើយការបោះឆ្នោតតាមប្រៃសណីយ៍ ត្រូវបានគេរំពឹងថា នឹងត្រូវបានអនុវត្តយ៉ាងទូលំទូលាយ ក្នុងអំឡុងពេលដែលមានការរាតត្បាតជាសាកលនៃជំងឺកូវីដ១៩ នេះ ដើម្បីចៀសវាងកុំឲ្យមានមនុស្សច្រើនកកកុញ នៅតាមមណ្ឌលបោះឆ្នោត នៅថ្ងៃបោះឆ្នោត៕